Koula 20
20
1Gè té tòkou boula eo, Paul bar ndjè kao go Jésus té, tokou nè ndedjidè nè nïyadè ta kao Macédoine té.
2Tokou nè ndai loou té ke nou ke nè ndedjidè nya, nè nao Grèce té.
3Nè nisi kendé nnè mouta, tokou Juifdjé edji naaté ta kwaa Paul tokou nè nao ta koun to ta kao Syrie té, nè mpa mèa té ta tél deo Macédoine té.
4Sopater ke Bérée ngon lo Pyrrhus ao ke Paul, Aristarque ke Second ke béh Thessalonique té, ke Gaïus ke béh Derbe té, ke Timothée, ke Tychique ke Trophime dooudjé ke Asie,
5Dèdè dao kèté, dèdè ngebedjè Troas té.
6Gè té ndò kousa mourou ke nkourou ke sér ang, djèdjè djï béh té ke Philippe, djao ke to dò man té, gè té ndò mi djèdjè ntéh ròdè té Troas té. Djèdjè djisi nou ndò shiri.
7Ndò té ke dongor ke to ndò shiri, tokou djèdjè mbòna naaté ta kon mourou, Paul pa tar kedè. Nè nedji mèa té ta kao bara. Nè mpa tar nderèng loou oso kon yènènè.
8Pourou lampe to nya mè kei té ke to dò marè té, loou té ke djèdjè mbòna kendé.
9Mare basä kada ria na Eutychus isi kem kei té. Tokou Paul pa tar gè eo nya bi da basä lé, nè ntibi, nè nï kei té ke mouta ke dò marè té noso, doun ninè.
10Paul disi nange ao rè té, nè nwèè mpana, Aridjé mèsè toosè ang mbata nè nai ke tébe bai.
11Tokou Paul tél mè kei té ke nè noukou mourou nön, nè mpa tar naredè bai nderèng loou arè, tokou ban nè nao.
12Basä tél kedè ke tébe, mèdè isi dèkèkè ke koukou.
13Djèdjè djao ke to kèté, djèdjè djao dò man té ta kao Assos, ke mèdjè té djèdjè djedji ta koun Paul mè to té nou, mbata nè mpa ban tò, nè ndiki ta ndja ke gòlè ke deo.
14Tokou nè ntéh ròdjè té Assos té, djèdjè djounè mè to té, djèdjè ndé Mytilène té.
15Djèdjè djï loou té ke nou, djao dò man té, gè té ndò kada djèdjè djo Chios nòdjè té, mare ndò ke kada djèdjè ndé Samos té, mare ndò ke kada bai djèdjè ndé Milet té.
16Paul ndiki ta ndai Ephèse mbata nè ndiki ta kisi Asie té gè eo ang, mbata nè ndja loshénè loshénè baa nè nase kisi Jérusalem té ndò Pentecôte té.
17Ke Milet nè noula koula béh Ephèse té ta bar tòkou dooudjé ke kei Allah té ta dé rè té.
18Tokou dèdè ndé rè té, nè mpana,
Sésè ndja egeridjé tar lom toï, tokou ma misi horosè té ke ndò té ke dongor baa moun gèlem dò nange té ke Asie.
19Mam nda koula mare Mbaibé Seigneur ke mè ke ïya ang, ke man kem, ke mè né ongou té ke oso dòm té deo té lo tar lo Juifdjé.
20Ma mbeté ang ta pa karesè né toï ke to madji mbata losè, ke mam ntòdjousè nò dooudjé té toï, ke mè kei té kada kada tò.
21Ma mpa tar nadji mare Juifdjé ke Grecdjé tò, tar mbeté kedji né da ke madjang, ta dé rò Allah té, ke ta ko mèdè té ke Mbaibé lodjè Jésus Christ.
22Loshénè woidjé, Ndil ndja tòm ta karem mao Jérusalem té, mam ngeré ang né ke a dé rom té nou.
23Baa né kadaba nèn ke Ndil ke madji toï pa tar nadji arem ke béh té kada kada toï, nè mpana kei koula ke né ongou ngebem.
24Ma mo tébe lom ndja tokou né ke madji kem té ang, baa ta karem nda koula lom ase toï, ke ta pa tar ke Mbaibé Jésus arem, ta pa tar nadji tar ke madji lo tokou mè madji lo Allah.
25Loshénè woidjé, mam ngeré ke sésè toï ke mam ndja horosè té ta pa tar lo béh ko lo Allah, sésè a koidjé kem marè ang nga.
26Tokou ban ma mpa tar nadji maresè bokonè, tar mese losè toï to dòm té ang nga.
27Mbata ma mbeté ang ta pa karesè tar ndedji lo Allah toï.
28Ngemidjé ròsè madji ke dèdè ke loou mbona té toï ke Ndil ke madji toï aresè tokou ndjè ngem né, ta kare mourou dooudjé ke kei Allah té, ke nè ndokodè mbata la ndja ke mese la.
29Mam ngeré tokou ma mao mbä ndjakemdjardjé ke madjang nya a dé horosè té, dèdè da kïya loou mbòna ang.
30Ke mare dooudjé a kï horosè té, dèdè da pa tar ke gatang, ta kòrou ndjè kao go Jésus té ta karedè dao godè té.
31Mbata tar nèn ngemidjé madji, olidjé mèsè mbata bal mouta ma mïya ang ta ndedji dooudjé toï, tilti rem kade rem ke man kem.
32Loshénè ma mïyasè dji Allah té ke tar tokou mè madji la, nè ke nase ta karesè ta tokou, ke ta karesè né ndouba ke horodè té toï ke Allah bardè ke daka mbata la ndja.
33Mounda mem dò narè argent té aséh narè lor aséh koubou lo doou kada ang.
34Sésè ndja egeridjé djim nèn da koula ta kinga né ke doum, ke dèdè ke déh sem.
35Mam ntòdjousè ke né toï deo koula té nèn, sésè asidjé kouma dèdè ke tòkoudè goto, ke ta kolé mèsè dò tar té ke Mbaibé Jésus pa tokou nè mpana,
Koukou né kare to madji wota koukou kinga né.
36Tokou nè mpa ban mbä, nè nongou mekedjé gòlè nange, nè ndoudjou Allah dodè té toï.
37Dèdè toï nnò ke ongou nya, dèdè dwaa gosè nto mbia.
38Ongou dadè wota toï mbata tar ke nè mpa naredè mpana, da ko kem nè marè ang nga. Dèdè dao sa deo bo nderèng mè to té.
Currently Selected:
Koula 20: KL1960
Highlight
Copy
Compare
Share
Want to have your highlights saved across all your devices? Sign up or sign in
© 1960, 2018.
To learn more or sign up for email updates about the mission of BFBS, click here:
