Koula 19
19
1Tokou Apollos isi Corinthe té, Paul ase loou béh té ke ndeo, nè ndé Ephèse té. Nè ninga mare ndjè kao go Jésus té nou.
2Nè mpa naredè, Sésè ingaidjé Ndil ke madji toï tokou sésè woidjé mèsè té wa? Dèdè mpana, Eë, djèdjè djo tar lo Ndil ke madji toï kada ang bai.
3Nè mpana, Ndasè baptême ke baptême di wa? Dèdè mpana, Ke baptême lo Jean.
4Paul pana, Jean da baptême ke baptême ta mbeté kedji né da ke madjang, ke nè mpa nare dooudjé ta ko mèdè té ke nè ke nao ndé gè té, nè ke nto Jésus.
5Tokou dèdè do tar nèn, dèdè dinga baptême ke ri Mbaibé Jésus.
6Tokou Paul ila dja dòdè té Ndil ke madji toï dé dòdè té, ke dèdè mpa tar ke ta ke dang dang, dèdè ntòdjou tar lo Allah ke daka.
7Dèdè toï déh ase dooudjé dòkou gérè djo.
8Paul ao mè kei Allah té, ke nè mpa tar nnè mouta ke bel ang, nè mmaitar ke nè ndedjidè mbata béh ko lo Allah.
9A tokou maredjé mbeté, ke do mèdè té ang, dao mpa tar ke madjang dò Deo té nèn nò dooudjé té ke kei Allah, Paul ïyadè. Nè nkai ndjè kao go Jésus té naredè dao sa, ke nè ntòdjou gel tar ke ndò toï mè kei tòdjou tar té lo Tyrannus.
10Nè nda ban ase bal djo, tokou ban dooudjé toï ke isi Asie té wo tar lo Mbaibé Seigneur, Juifdjé ke Grecdjé tò.
11Allah da tòkou né mori deo dji Paul té.
12Tokou ban ntaa ngan koubou bòrou kem aséh mare koubou ke rò Paul té, dao kedè dare ndjè rò toodjé, bana rò too lodè goto ke ndildjé ke madjang téh ke daka mèdè té.
13Tokou ban mare Juifdjé ke to ndjè ndja tar nya, dèdè nto ndjè né ndön ke ntouba ndildjé ke madjang, dèdè mmar ri Mbaibé Jésus dò dooudjé té ke isi ke ndildjé ke madjang, mpana, Ma mpa mari ke ri Jésus ke Paul pa tarè.
14Dèdè ke nda ban dè shiri ke nto ngan lo Juif kada, ria na Scéva, nè nto mbai lo ndjè kòrdjé.
15A ndii ke madjang tél tar aredè pana, Mam ngeré Jésus ke mam ngeré Paul, a sésè etoidjé ndjè ke da wa?
16Doou ke isi ke ndii ke madjang oso dodè té waadè toï, ke nè noutadè ke singa, tokou ban dèdè ntéh daka ke mè kei té, dèdè daïn ke ròdè ba, ke doo to ròdè té.
17Dooudjé toï ke isi Ephèse té wo tar nèn, Juifdjé ke Grecdjé tò, bel dadè toï, ke dèdè mpiti ri Mbaibé Jésus.
18Mare dooudjé baya ke horodè té ke wo mèdè té mba, dèdè ndé mpa né ke madjang lodè ke dèdè nda ke daka.
19Maredjé horodè té ke ndön né, dèdè mbòn maketourou lodè naaté, dongou pouro no dooudjé té toï, dèdè ntoura narè ndoko maketourou nèn, narè ndoko maketourou ntoura ase narè argent dourou dòkou mi.
20Tokou ban tar lo Mbaibé Seigneur bar nya, ndé wota né toï.
21Go tar té nèn, Paul pa ke mèa té deo té lo Ndil ndja, ta ndai dò nange té ke Macédoine ke Achaïe, ta kao Jérusalem té, nè mpana, Gè té tokou ma misi nou, ma mase ta ko Rome tò.
22Tokou nè noula Timothée ke Eraste, dooudjé djo ke to ndjè koumè Macédoine té, nè nisi Asie té marè bai.
23Ngosiba ke ndò té ke nou, tar ï nya mbata tar Deo nèn.
24Mbata mare doou kada ria na Démétrius, ndjè da kòdou argent ke nda kòr Diane ke narè argent, deo té la dooudjé ke ndjè kòdou inga narè nya.
25Nè mbòndè toï naaté deo kadaba ke mare dooudjé ke da koula tokou ban tò, nè mpana, Dooudjé, sésè egeridjé djèdjè djinga né kinga lodjè deo koula té nèn.
26Sésè woidjé ke kemsè ke mbisè tò ke Ephèse kadaba ang, a nai ngadjiba ke dò nange té ke Asie toï, Paul nèn ndedji ke nè ntourou mè dooudjé nya nya. Nè mpana kòr ke dooudjé da ke djidè to to Allah ke tokoro ang.
27Tokou ban djedji to koula lodjè a dé né ke ba ke kadè ang, a kei lo tokou kòr dènè Diane a dé to né ke ba to, ke dèdè da kòrè loou piti té la, nè ke dooudjé ke Asie ke nange nèn toï walè.
28Tokou dèdè do tar nèn ongou dousou mèdè, dèdè mpa ke tarr, Diane ke Ephèse té to tokou né.
29Tokou ban, tokou tar ï mè bouka béh té nèn, dèdè daïngòrou mè tokou kei té naaté, dèdè dwaa Gaïus ke Aristarque dòroudè godè té, dèdè ke nto dooudjé ke Macédoine ke ndja ke Paul.
30Paul ndiki ta kao horo dooudjé té ke baya nèn, a ndjè kao go Jésus té gangè.
31Mare tokou dooudjé ke Asie té tò, dèdè ke nto ndjè bokoradjé lo Paul, dèdè doula rè té ndoudjè nya ta kao mè tòkou kei té nèn ang.
32Mare dooudjé pa ke tar ke kada, maredjé pa ke tar ke dang, mbata do dooudjé ke mbona tourou, mbata maredjé baya geré ang di a mbònè na wa.
33Maredjé òrou Alexandre ao sa no dooudjé té, nè ke Juifdjé oulè ta téh no dooudjé té. Alexandre yè dja mbata nè ndiki ta pa karedè.
34A tokou dèdè doè nto Juif, dèdè toï mpa ke tarr deo kadaba gè eo, Diane ke Ephèse to tòkou né.
35Tokou doou ke ndjè da maketourou mè béh té are dooudjé isi dèkèkè, nè mpana, Dooudjé ke Ephèse, doou ke da baa geré ang ke béh ke Ephèse té to béh ke ta ngem tòkou kei lo Diane, ke ta ngem kòr lo Jupiter ke ï dara oso nange ang wa?
36Tokou ban, mbata dooudjé ase mbeté tar nèn ang, ase kare isidjé dèkèkè, edaidjé né singa ke tòkè ang bai.
37Mbata sésè edéidjé ke dooudjé nèn loou té ke nèn, dèdè ke nto ndjè boukoudjé né ke kei kòr té nèn aséh ndjè tadji kòr dènè lodjè nèn ang.
38Tokou ban, tokou Démétrius ke ndjè kouladjé ke éh sa, déh ke mare tar do doou té, loou gange saria éh tén ke ndjè gange saria éh kendé, dïya dare mare òrou nadji la.
39Tokou sésè esangidjé mare tar ke dang, da da tarè deo té lo ndjè ko gel tar.
40Mbata tokoro, dèdè dase toula dòdjè mbata tar boula ke ï bokonè loou té ke nèn, mbata mare tar saria goto, tokou ban djèdjè djase ta tòdjou gel tar lé ang, dooudjé mbòna tokou ban mbata di wa.
41Gè té ke nè mpa tar nèn, nè nïya dooudjé ke mbòna baya baya naredè dao.
Currently Selected:
Koula 19: KL1960
Highlight
Copy
Compare
Share
Want to have your highlights saved across all your devices? Sign up or sign in
© 1960, 2018.
To learn more or sign up for email updates about the mission of BFBS, click here:
