Psalmyn 103
103
PSAL. 103.
Benedic anima mea.
1Bannee yn Chiarn, O m’annym:
as ooilley ny ta cheu-sthie jee’m bannee e Ennym casherick.
2Bannee yn Chiarn, O m’annym:
as ny jarrood ooilley e hoyrtyssyn;
3Ta leih ooilley dty pheccah:
as slaanaghey ooilley dty ghoghanyn;
4Ta sauail dty vioys veih toyrt-mow:
as dy dty chomm'rey lesh myghin as kenjallys-ghraihagh;
5Ta jannoo magh dty veeall lesh nheeghyn mie:
jannoo oo aeg as lajer myr urley.
6Ta’n Chiarn cooilleeney cairys as briwnys:
er nyn son ocsyn ooilley ta tranlaasit lesh aggair.
7Hoilshee eh e raaidyn da Moses:
e obbraghyn da cloan Israel.
8Ta’n Chiarn laane dy hymmey as dy vyghin:
surranse-foddey, as jeh mieys vooar.
9Cha bee eh kinjagh corree:
cha-moo t’eh freayll e yymmoose son dy-bragh.
10Cha vel eh er ghellal rooin lurg nyn beccaghyn:
ny er chooilleeney shin cordail rish nyn mee-chraueeaght;
11Son jeeagh cre cha ard as ta niau ayns co-soyllaghey jeh’n thalloo:
wheesh cheddin ta e vyghin dauesyn ta goaill aggle roïsh.
12Jeeagh cre cha lhean as ta’n shar veih’n sheear:
choud cheddin t’eh er hoiaghey nyn beccaghyn voïn.
13Dy-jarroo, myr ta chymmey ec ayr er e chloan hene:
myr shen ta’n Chiarn myghinagh dauesyn ta goaill aggle roïsh.
14Son shione da cre jeh ta shin jeant:
t’eh cooinaghtyn nagh vel shin agh joan.
15Cha vel laghyn dooinney agh myr faiyr:
son t’eh gaase myr blaa yn vagher.
16Son cha leah as ta’n gheay goll harrish, te ersooyl:
as cha der yn ynnyd ve ayn enney er ny sodjey.
17Agh ta mieys myghinagh y Chiarn farraghtyn son dy-bragh as dy-bragh orroosyn ta goaill aggle roïsh:
as e chairys er cloan chlenney;
18Orroosyn dy-jarroo ta freayll e chonaant:
as ta smooinaghtyn er e annaghyn dy yannoo ad.
19Ta’n Chiarn er hoiaghey seose e stoyl-reeoil ayns niau:
as ta e reeriaght reill harrish ooilley.
20O bannee-jee yn Chiarn, shiuish e ainleyn, shiuish ta pooaral ayns niart:
shiuish ta cooilleeney e haarey, as ta geaishtagh rish coraa e ghoan.
21O bannee-jee yn Chiarn, ooilley shiuish e heshaght-flaunys:
shiuish e harvaantyn ta cooilleeney e aigney.
22O loayr-jee dy-mie jeh’n Chiarn, ooilley shiuish e obbraghyn, ayns dy-chooilley ynnyd jeh e reilltys:
bannee yn Chiarn, O m’annym.
Currently Selected:
Psalmyn 103: PS1765
Highlight
Copy
Compare
Share
Want to have your highlights saved across all your devices? Sign up or sign in
maintained by the British and Foreign Bible Society
