Psalmyn 104
104
EVENING PRAYER.
PSAL. 104.
Benedic, anima mea.
1Bannee yn Chiarn, O m’annym:
O Hiarn my Yee, t’ow er-skyn towse gloyroil, t’ow er ny choamrey lesh Ard-ooashley as onnor.
2T’ow dy choamrey oo hene lesh soilshey myr lesh garmad:
as skeayley magh ny niaughyn myr curtan;
3Ta soiaghey beamyn e hiamyryn ayns ny hushtaghyn:
as jannoo ny bodjallyn e ainagh, as goll er skainyn ny geayee.
4T’eh jannoo e ainleyn spyrrydyn (ny geayghyn):
as e hirveishee lossey dy aile.
5T’eh er hoiaghey undinyn y thallooin:
nagh bee eh ec traa erbee er ny scughey.
6Choodee oo eh lesh y diunid myr lesh garmad:
ta ny hushtaghyn lhie ayns ny croink.
7Ec yn oghsan ayds t’ad chea ersooyl:
ec coraa dty haarnagh ta aggle orroo.
8T’ad goll seose cha ard as ny croink, as sheese gys ny coanyn:
eer gys yn ynnyd t’ow er phointeil daue.
9T’ow er hoiaghey ny cagliaghyn oc nagh jed ad harrish:
ny chyndaa reesht dy choodaghey yn thalloo.
10T’eh cur ny geillyn gys ny awinyn:
ta roih mastey ny croink.
11Ta ooilley beïyn y vagher giu jeu:
as ta ny assyllyn feïe cuir nyn baa.
12Lioroo vees nyn gummal ec eeanlee’n aer:
as nee ad bingys mastey ny banglaneyn.
13T’eh gushtaghey ny croink veih yn yrjid:
ta’n seihll er ny lhieeney lesh mess dt’obbraghyn.
14T’eh cur magh faiyr son y maase:
as lhuss glass son ymmyd dooinney;
15Dy vod eh beaghey y chur lesh magh ass y thalloo, as feeyn ta gerjaghey cree dooinney:
as ooïll dy chur da eddin ghennal, as arran dy niartaghey cree dooinney.
16Ta biljyn y Chiarn myrgeddin laane dy hoo:
dy-jarroo cedaryn Libanus t’eshyn er hoiaghey;
17Ayndoo ta ny eeanlee jannoo nyn idd:
as ta ny biljyn-juys ynnyd-cummal son y stork.
18Ta ny croink ard oayll son ny goair feïe:
as myr shen ta ny creggyn son ny conninyn.
19Ren eh yn eayst y phointeil son imbaghyn shickyr:
as shione da’n ghrian yn traa dy lhie.
20T’ow jannoo dorraghys dy chur stiagh yn oie:
ayn ta ooilley beïyn y cheyll rowail mygeayrt.
21Ta ny lionyn garveagagh son nyn spooilley:
shirrey nyn meaghey veih Jee.
22Ta’n ghrian girree, as t’ad cosney rhymboo cooidjagh:
as lhie sheese ayns nyn ooigyn.
23Ta dooinney goll magh gys e obbyr, as gys e laboraght:
derrey’n astyr.
24O Hiarn, cre cha ymmodee ta dt’obbraghyn:
ayns creenaght t’ow er n’yannoo ad ooilley, ta’n seihll laane jeh dty verchys!
25Myr shen ta’n faarkey mooar as faayn myrgeddin:
ayn ta cretooryn snaauee gyn earroo, beishtyn chammah beg as mooar.
26Shen y raad ta ny lhongyn shiauley, as ayns shen ta’n Leviathan:
t’ow uss er n’yannoo dy ghoaill yn reamys echey ayn.
27T’ad shoh ooilley farkiaght ort:
dy vod oo beaghey y chur daue ayns imbagh cooie.
28Tra t’ow dy chur daue eh, t’ad dy hagglym eh:
as tra t’ow fosley dty laue, t’ad jeant magh lesh mie.
29Tra t’ow follaghey dt’eddin, t’ad seaghnit:
tra t’ow goaill ersooyl yn ennal oc, t’ad geddyn baase, as t’ad chyndaait reesht gys nyn ooir;
30Tra t’ow lhiggey magh dt’ennal, bee ad er nyn groo:
as t’ow cur eddin noa da eaghtyr y thallooin.
31Nee Ard-ooashley gloyroil y Chiarn farraghtyn son dy-bragh:
nee yn Chiarn boggey ’ghoaill ayns e obbraghyn.
32Bee yn thalloo er-creau ec e hilley:
my nee eh agh bennaylt rish ny sleïtyn, bee ad ayns jaagh.
33Goym arrane da’n Chiarn choud as s’bio mee:
nee’m my Yee y voylley choud as vee’m er-mayrn.
34As shen myr nee my ghoan eshyn y wooiys:
bee my voggey ayns y Chiarn.
35Er son peccee, bee adsyn er nyn ghoyrt mow veih’n thalloo, as hig jerrey er ny mee-chrauee:
cur uss moylley da’n Chiarn, O m’annym, cur moylley da’n Chiarn.
Currently Selected:
Psalmyn 104: PS1765
Highlight
Copy
Compare
Share
Want to have your highlights saved across all your devices? Sign up or sign in
maintained by the British and Foreign Bible Society
