Jabura 90
90
Ala mataraŋɛ mɔgɛnu la simaya wutuyareŋɛ la ko la
1Musa la Ala mataraŋɛ, Ala la mɔgɛ.
N Marige, ile le bata ma mɔ ye kun taaku dula la,
ka bɔɔ bɔnsɔ ma han bɔnsɔ.
2Yannun kɔnkɛnu ni da,
yannun i ni dunuya da anun duge,
ka bɔɔ hau han abada ile le mu Ala la.
3I si mɔgɛ lasaagi le bangue tɔ,
i ni a fɔ: «Adamadeŋɛ, saagi!»
4Bayi san wulu dɔndɔ sutu i ye,
iko kunun tele tanbireŋɛ,
iko su dɔndɔ sumun wagate.
5I be adamadeŋɛ la simaya labanna le teriya la
iko yoriyori kinnɔgɛ min be tanbila saguma.
Anu be tola le iko biŋɛ:
6a ni feere saguma, a la jabue ni tanbi;
a ni tɛgɛ, a ni bala wura la.
7Iyon, i la jusu yɛlɛ si mɔ lamuttɛ,
i la dumɛ si mɔ makilan le.
8I be mɔ la ko koroŋɛnu saren i ɲakɔtɔ,
mɔ la tiɲare gundo bɛ be saren kɛnɛ ma i ɲala.
9Iyon, mɔ la simaya bɛ be wutuyala le i la dumɛ butɔ.
Mɔ be a yenna le, mɔ la simaya be banna iko foofi layɛlɛ dɔndɔ.
10Mɔ la saŋɛnu kɔnte si yɛlɛ le han san bi wɔrɔwila,
ka mɔ kende ken, a si yɛlɛ le han san bi sagin.
Kɔnɔ mɔgɛnu la korobokaraba bele maren fenfen na, fɔ tɔɔrɛ nun ɲagankata,
bayi simaya si tanbi iko ɲamakate, mɔ la ko ni sama feu.
11Ɲɔmɔ le ka i la jusu yɛlɛ sɛnbɛ lɔn, anun i la dumɛ?
A kolo han mɔgɛnu ni kilan i la.
12Wo butɔ, mɔ degen mɔ la saŋɛnu kɔnti ma,
alako mɔ la dunuya tatɛgɛ butɔ, mɔ ni hakkilimaya sɔtɔ.
13Alatala, i mɛn ká saagi, i la dumɛ be mandiren han wagati miniman de?
Kinikini i la jondeŋɛnu ma.
14Bɔɔla saguma, i ni mɔ lawasa i la fonisireya la,
alako mɔ ni ɲagalin kulɛ labɔɔ ka sɛɛwa mɔ la simaya bɛ butɔ.
15I ka mɔ tɔɔrɛ min bere ma,
mɔ ka bɛlɛya min yen saŋɛnu tɔ,
i mɛn ni mɔ lasɛɛwa wo bere la.
16I la wale ni makɛnɛn i la jondeŋɛnu ma,
i la nɔɔra ni yen anu la deŋɛnu ma.
17Mɔ Marige Ala la nɛɛma ni to mɔ ma.
I ni mɔ la bolo la walenu lasabati mɔ ye.
Iyon, i ni sɛnbɛ sa mɔ la bolo la walenu tɔ.
Currently Selected:
Jabura 90: MOG
Highlight
Share
Compare
Copy
Want to have your highlights saved across all your devices? Sign up or sign in
