Jabura 89
89
Ala mataran koe jama ye lahire la ko la a nun Dauda tɛma
1Etani la mɔgɔ lakaran beete do le ka, Esira bɔnsɛ mɔgɛ do.
2N si beete bɔɔ wagati bɛ Alatala la fonisireya la ko la.
N da si a la kuma dɔndɔ tigiya la ko fɔ le bɔɔla bɔnsɔ ma han bɔnsɔ.
3Iyon, n ni a fɔ, i la fonisireya lasabate abada le mu;
i la kuma dɔndɔ tigiya le be sabatiren saŋɛ tɔ.
4I bata a fɔ, i ko: «N bata lahire kiti n nun n na mɔgɔ masubɛreŋɛ tɛma;
n bata n kali n na jondeŋɛ Dauda ye, n ko:
5‹N si i bɔnsɛ lasabati le kudai,
n si i la mansa tintiŋɛ tugun makanta le han i bɔnsɔ bɔnsɔ.›»
Beeti bɔɔlá la suleŋɛ donden.
6Alatala, daalenu minnu be kantɔ, wonu be i matɔgɔla i la kabanakoe le la ko la.
Maleka saniyandeŋɛnu la mamadɛŋɛ tɔ, anu be i matɔgɔla i la kuma dɔndɔ tigiya le la.
7Ɲɔmɔ le be saŋɛ tɔ min si nɔ a yɛtɛ lamulunna Alatala la?
Ɲɔmɔ le be toren iko Alatala, maleka sɛnbɛmanu tɛma?
8Ala makilanta a banba la a la saniyanbaganu la mamadɛŋɛ tɔ.
Minnu bɛ be a lamilinden, a makilanta wonu ko.
9Marige Alatala, koe bɛ da mansa!
Ɲɔmɔ le sɛnbɛ kolo iko ile Alatala?
I la kuma dɔndɔ tigiya le be i lamilinden.
10Ile le be sɛnbɛ sɔtɔren ba la fatiya kunma;
a la mɔrɔŋɛnu tini wuli, ile le be anu lakarala.
11Ile le ka Rahabi#89:11 Rahabi be maren dalifen makilandeŋɛ do le la, min be ba sɛnbɛ misaliren, ka wo ma Misira jamanɛ. Alatala dunuya bɛ da Mansa ka sɛnbɛ sɔtɔ wo kunma. masɔgɔ, i ka a muɲunkun.
I ka i jaguenu lansan i bolo sɛnbɛma la.
12I tɛŋɛ le saŋɛ la, i tɛŋɛ le duge tugun na.
Ile le ka dunuya latenkun, anun a butɔ feŋɛ bɛ.
13Bɔɔla bolo mara han bolo ɲinma ile le be a bɛ daren.
Tabori kɔnkɛ nun Herimon kɔnkɛ be sɛɛwa sɔnkɛ layɛlɛla i tɔgɛ la ko la.
14Ile Marige, i bole be ŋarinteya wale le maren;
i sɛnbɛ kolo, kunnawule be i ye.
15Teleŋɛ nun kiiti ɲinma le mu i la tintiŋɛ lasabate la.
I be fonisireya nun kuma dɔndɔ tigiya sɔren i ɲatɔ.
16Hɛra be jama ye minnu kusan anu kulɛ mayɛlɛla i ye!
Alatala, anu be tagamanna i ɲakɔtɔ la malaŋɛ le la.
17Anu si sɛɛwa le i tɔgɛ la ko la wagate bɛ.
Anu si kunnawule sɔtɔ le i la teleŋɛ sabu la.
18Ile le be maren anu la biliya nun anu la sɛnbɛ la.
I la dɛmare le la ko be mɔ sɛnbɛ lakoloyala.
19Mɔ la tangare be fatanden Alatala le la,
mɔ la mansa be fatanden ale Isirayila la Ala saniyandeŋɛ le la.
20I kumata le i la lannanteya mɔgɛnu ye laamute tɔ,
i ko: «N bata kɛlɛ malá ɲalama do dɛman,
n bata kamareŋɛ do masubɛ n ni a la ko mayɛlɛ jama tɛma.
21N be n na jondeŋɛ Dauda le yenden,
n bata ale le masubɛ n ni mansaya tulu saniyandeŋɛ bɔn a ma.
22N be n bole lasorila ale len na ko kɔtɔ.
N be sɛnbɛ diila ale le ma.
23Jague te a latɛrɛnna,
ko koron malá te a lajarabi.
24N si a jaguenu muɲunkun de a ɲala.
Minnu be a kɔnden, n ni wonu faga.
25N si to le a fɛ n na fonisireya nun n na kuma dɔndɔ tigiya la.
A sɛnbɛ be koloyala n tɔgɛ le la.
26N si ba to le a sagoe tɔ,
kɔɛɛnu tugun ni to a la mansaya kɔlɔre kɔtɔ.
27Ale le si a kulɛ labɔɔ n ma, a ni a fɔ n ma: ‹N Baaba›,
anun: ‹N Marige Ala, n nakisilá fata›.
28Nde tugun si a ma le iko n na den fɔlɛ,
min na ko si mayɛlɛ dunuya mansanu bɛ ko.
29N si n na fonisireya to le a ye kudai.
N mɛn si n na lahire mabanban de a ye.
30N si a ma le a bɔnsɛ ni to ɲɔ kudai.
Fanni saŋɛ be, a la mansaya tintiŋɛ si to ɲɔ kudai.
31Ka a la deŋɛnu ka n na sariya boloka,
anu ma tagaman n na yamɔrenu la,
32ka anu ka n na tɔŋɛnu bɔtɛ boe,
anu ma n na sariya labatu,
33wo butɔ, n si anu la murutɛ sɔŋɛ lasaagi luubɛre la,
n ni anu ɲagankata anu la junubenu la ko la.
34Kɔnɔ hali wolo, n te n na fonisireya tiɲa ale Dauda kan mafanna,
n mɛn te n na kuma dɔndɔ tigiya tiɲa a mafanna.
35N te n na lahire tiɲa a mafanna,
n mɛn te n kulɛ masara min bɔɔta n da tɔ.
36N bata n na kalire tɔɛ ma Dauda ye n na saniyaŋɛ la,
n ko n te foniya fɔ a ye feu.
37A bɔnsɛ te mule abada,
a la mansaya tintiŋɛ si to le n ɲakɔtɔ iko tele.
38Wo mansaya si sabati le kudai iko kare,
seede min be kantɔ, a mu lannanteya seede le la.»
Beeti bɔɔlá la suleŋɛ donden.
39Adun i bata a aɲɛ, i bata a lafili!
I bata dumɛn i la mansa masubɛreŋɛ ma!
40I bata i la lahire tiɲa i la jondeŋɛ ye.
I bata a la mansaya kufunɛ fɛɛya, i bata a laboe duge tɔ.
41I bata a la saa tattanu bɛ wɛɲɛnkin,
i bata a la dula makantareŋɛnu bɛ kunnatiɲa.
42Tanbibaganu bɛ tuguta a bolofeŋɛnu la.
A bata ma a sigiɲɔgɛnu la mamayo feŋɛ la.
43I bata kunnawule dii a kɛlɛlanu ma,
i ka a jaguenu bɛ lasɛɛwa.
44I bata a la fan da diyama da lasɛɛya.
I ma a kɔtɔ sɔ kɛlɛ butɔ.
45I bata a la darija ladufen,
i ka a la mansaya tintiŋɛ lafili duge tɔ.
46I bata a la kamarenya wagate lawutuya,
i ka maluya dusu a kunma.
Beeti bɔɔlá la suleŋɛ donden.
47Alatala, i be dogonden han wagati miniman i to bele a tola?
I la dumɛ to be bitaren ka iko ta, han muntuma le?
48I la mira lataga ba n na simaya kɔnte ma.
Kaa, i ka kɛ mɔgɛnu bɛ da le fu?
49Mɔgɔ miniman si nɔ tola balue tɔ a ni to a ma faga,
ka wo ma min si a nɛ lakisi faga ma?
Beeti bɔɔlá la suleŋɛ donden.
50N Marige, i la fonisireya be mina le kɔtɛ,
anun i ka i kali koe minnu la Dauda ye i la kuma dɔndɔ tigiya butɔ?
51N Marige, i la jondeŋɛnu la maluya talɔn;
anun jama banba labɛndeŋɛ la kote, min be sigiren n kunma.
52Alatala, a talɔn i jaguenu be mamayoe kuma min fɔla,
anu be i la mɔgɔ masubɛreŋɛ kɛnbaa mayola ki min na.
53 Abada mamatɔgɛ ni to Alatala ye! Amina! Amina!
Currently Selected:
Jabura 89: MOG
Highlight
Share
Compare
Copy
Want to have your highlights saved across all your devices? Sign up or sign in
