Jabura 80
80
Ala mataraŋɛ a la jama ye ka tasaagi kunnawule ma
1Asafu la seedeɲɔgɔya beete do le ka, min be donden beeti bɔɔlanu la kuntige bolo. Beete le mu min be bɔɔla iko beete min tɔgɔ «Feere ɲinmanu».
2Bani Isirayila kolofen kantalá, yandi i tolomasɔ,
ile min ka Yusufu labɛnbɛn iko kolofen kuruŋɛ.
Ile min be majigiren malekanu tɛma,
i yɛtɛ labɔɔ i la nɔɔra tɔ.
3I sɛnbɛ labɔɔ Efirayimu, Bunyamin nun Manasi bɔnsɛnu ye.
I ni wuli ka kila bita mɔ lakisi koe la.
4Ee Ala, mɔ lasaagi!
I ɲakɔtɔ lahenti mɔ ye alako mɔ ni kisi.
5Marige Alatala, dunuya bɛ da Mansa,
i be mɔle i la jama la mamataraŋɛ aɲɛla dumɛ butɔ han muntuma?
6I be mɔ labalula dɛgɛ la min be lamulanden ɲaje la,
i be ɲaje diila mɔ ma ji minnɛŋɛ la han.
7I bata a ma mɔ sigiɲɔgɛnu be ɲɔgɔn masɔsɔla mɔ la duge la ko la.
Mɔ jaguenu be yoren mɔ ma.
8Ee Ala, dunuya bɛ da Mansa, mɔ lasaagi!
I ɲakɔtɔ lahenti mɔ ye alako mɔ ni kisi.
9Mɔ la jama be toren iko rɛsɛn lɔgɛ,
i ka min wutun Misira duge tɔ.
I ka see donu bee anu ni bɔɔ yan,
i naata ale rɛsɛn lɔgɛ kan ki yan,
10i ka dula min tabɛn a ye nun.
A liilenu banbanta, a ka duge lafa.
11A niiniŋɛ naata to kɔnkɛnu kunma.
A boliŋɛnu tota le iko Ala la lɔgɔ kutu banba.
12A ka a boliŋɛnu lafonti han ba kunma,
a nɛlunta le han a boliŋɛnu linbanta kɔɛɛ kunma.
13Tatta min be a lamilinden, i ka a wɛɲɛnkin fenna?
I bata a ma tanbibaganu ni to a wolenu bɛ tettila.
14Burun butɔ kɔsɛ́nu be a yegelenna,
ɲɔ be mala burun butɔ subenu tugun daɲini dula le la.
15Ee Ala, dunuya bɛ da Mansa, i ni saagi!
I ɲa lajigi mɔ ma bɔɔla saŋɛ tɔ, i ni mɔ fɛlɛ,
i ni mɔ la ko bita, mɔle minnu mu wo rɛsɛn lɔgɛ la.
16Ile yɛtɛ ka min ki,
i ka sɛnbɛ dii deŋɛ min ma,
awa a makanta.
17Ta bata i la rɛsɛn lɔgɛ bintan, anu bata a kuntu.
I la jama be sɔntɔla le i ɲala, i la dumɛ butɔ!
18I bole kafu mɔgɛ ma min be i bolo ɲinma tɔ,
i be sɛnbɛ diiren min ma.
19Wolo mu mɔ te mɔ matuntun i la bitugun.
I ni mɔ to balue tɔ, mɔ si i tɔgɛ labatu le.
20Marige Alatala, dunuya bɛ da Mansa, mɔ lasaagi,
I ɲakɔtɔ lahenti mɔ ye alako mɔ ni kisi.
Currently Selected:
Jabura 80: MOG
Highlight
Share
Compare
Copy
Want to have your highlights saved across all your devices? Sign up or sign in
