Jabura 81
81
Tolomasɔ koe Ala la
1Asafu la beete do le ka, min be donden beeti bɔɔlanu la kuntige bolo. Beete le mu min be bɔɔla anun kɔra mɔɔle do la.
2Wo mɔ ni ɲagalin beete bɔɔ Ala ye, min mu wo mɔ sɛnbɛ la.
Wo mɔ ni mɔ kulɛ mayɛlɛ sɛɛwa la Yaguba la Ala ye.
3Wo beete lasɔnkɔ, wo ni boote kulɛ labɔɔ,
kɔra nun kɔndiŋɛ kulɛ diyama la.
4Wo bina fe kari sɔ nama la,
wo mɛn ni a fe wo mɔ la sali luŋɛ kare tini a labeya.
5Iyon, sariya le mu bani Isirayila ye,
Yaguba la Ala le la yamɔre mu a la.
6Ala yati le ka wo fɔ Yusufu juruyanu ye,
a be bɔɔla Misira duge digii ma wagate min tɔ.
N ka kumari kulɛ do mɔɛ le, n ma min lɔn nun, min ko:
7«N bata kote bɔɔ i gabakunkuŋɛ ma,
i bolenu te koto yadɛ boroŋɛ jigan bitugun.
8I ka i kulɛ labɔɔ ɲagankata la, n ka i lafulen.
N ka i jaabi le n be dogonden ka min na luuture finma tɔ sangi bula la.
N dita i mafɛlɛla Meriba je dala.
Beeti bɔɔlá la suleŋɛ donden.
9N ko: ‹N na jama, wo tolomasɔ, n ni wo lasogi,
bani Isirayila jama, ka wo si naa wo tolomasɔ n na.
10Ala gbɛtɛ yo kana to wo bata,
wo kana sujudu ala gbɛtɛ yo ye.
11Nde le mu Alatala la, wo la Ala,
min ka wo labɔɔ Misira duge tɔ.
Wo da laka a banba la, n si a lafa le.›
12Kɔnɔ n na jama ma a tolomasɔ n na;
bani Isirayila jama ma sɔn n na ko la.
13Wolo mu, n ka anu to ɲɔ anu la wo sɔnbaliya tɔ,
anu tagamanta anu yɛtɛ hakkile la.
14Haa! Ka n na jama ka a tolomasɔ n na nun;
ka bani Isirayila tagamanta n na kilanu la nun,
15n si anu jaguenu bɛ lamalu le nun teriya la,
n si n ɲamatelen de nun anu jaguenu kɛlɛ koe la.»
16Minnu ka Alatala kɔn, wonu si na a majigi le a ye nun kilaŋɛ butɔ,
anu ni to wo tɔ wagate bɛ.
17Ala si bani Isirayila jama kan balu le nun dɔmɔ ɲinma la,
a mɛn si anu lafa kuru tɔ kumɛ la nun.
Currently Selected:
Jabura 81: MOG
Highlight
Share
Compare
Copy
Want to have your highlights saved across all your devices? Sign up or sign in
