Jabura 79
79
Ala mataraŋɛ Darisalamu la ko la
1Asafu la beete do le ka.
Ee Ala, see donu bata tugu i la duge la,
anu bata i la hɔrɔma bon saniyandeŋɛ ma dula saniyanbale la,
anu ka Darisalamu ma kuru fɛrɛŋɛnu la.
2Anu bata i la jondeŋɛnu furenu ma
kondeŋɛnu daɲini feŋɛ la minnu be kantɔ.
Anu ka i la lannante mɔgɛnu sube ma burun butɔ subenu balue la.
3Anu ka anu base bɔn
Darisalamu la miliŋɛ tɔ iko je,
anu mandilá yo ma sɔtɔ.
4Mɔ bɔtɛ bata bɔɔ jama ye minnu be mɔ la miliŋɛ tɔ.
Mɔ sigiɲɔgɛnu be mɔ mayola, anu be mɔ majelela.
5Alatala, i la dumɛ si to han muntuma? Han abada le ba?
I la tɔɔnɛ be tola bitala le ba iko ta yore?
6I la dumɛ lataga jamanɛnu ma minnu ma i lɔn,
anun mansa saanu minnu bele i tɔgɛ labatula.
7Bayi anu bata Yaguba la mɔgɛnu sɔntɔ,
anu ka a la duge tugunsan feu.
8I kana i mira mɔ la junubu kɔtɛnu ma bitugun.
I la hinnɛnteya ni na mɔ ma teriya la,
bayi sɛnbɛ yo bele mɔ bolo bitugun.
9Ee Ala, mɔ lakisilá, mɔ dɛman,
i la nɔɔra tɔgɛ la ko la.
Mɔ lafulen, i ni mɔ la junubenu kafari i tɔgɛ la ko la.
10Fenna i be a tola sii gbɛtɛnu ni naa a fɔ: «Anu la Ala be mina le?»
Ee Ala, a ni yen ma seenu bɛ tɛma
ka a fɔla i la jondeŋɛ minnu base bɔnta, i si wonu tɛŋɛ yɔgɔ le.
11A to gelemanɛnu nuunu kulɛ ni yɛlɛ han a ni ke i ma.
Minnu be faga da tɔ, i sɛnbɛ to kolo, i ni a ma anu ni to balue tɔ.
12N Marige, mɔ sigiɲɔgɛnu be mɔnɛ min donden i ma,
wo ɲɔgɔn wɔrɔwila lasaagi anu ma.
13Mɔle i la jama, i la wɔɔrɛ kolofeŋɛnu,
mɔ si i tantu le abada;
mɔ si i matɔgɛ yita le ka bɔɔ juruya han juruya.
Currently Selected:
Jabura 79: MOG
Highlight
Share
Compare
Copy
Want to have your highlights saved across all your devices? Sign up or sign in
