Jabura 78
78
Isirayila la ko tanbireŋɛnu mɔgɔ ma bɛn ɲinala minnu la
1Asafu la mɔgɔ lakaran beete do le ka.
N na jama, wo ni n na karaŋɛ lamɔɛ!
Wo tolomasɔ n na kumanu la minnu be bɔɔla n da tɔ.
2N be kumala wo ye a taali nɛŋɛ le la ka,
n ni ko tanbireŋɛnu mataali wo ye.
3Koenu le mu wonu la mɔ ka minnu mɔɛ anun mɔ ka minnu lɔn,
mɔ baabanu ka minnu fɔ mɔ ye.
4Alatala matɔgɛ anun a sɛnbɛ,
mɔ te wonu dogon anu la deŋɛnu la.
Mɔ mɛn si a ɲamakaran de anu juruyanu ye a bata kabanakoe minnu ma.
5A bata seedeɲɔgɔya do to Yaguba bolo,
ka sariya sa Isirayila duge tɔ,
ka mɔ benbanu yamɔri anu ni anu la deŋɛnu lakaran a la.
6Wolo mu deŋɛnu minnu be naala sɔtɔla, wonu si a lɔn.
Wo juruya tugun ni a tafɔ anu la deŋɛnu ye, anu be minnu sɔtɔla.
7Wo butɔ, anu si anu la lannanteya sa Ala ma,
anu te ɲina Ala la walenu ma,
anu si anu mɛnni Ala la yamɔrenu ma.
8Anu kana to iko anu benbanu,
wo kantabɛlɛ bɔnsɔ murutɛreŋɛ,
minnu te lannanteya lakamali,
anu hakkile bele sɔren Ala dɔrɔn ma.
9Misali la, hali ndakanu be Efirayimu kaanu minnu bolo,
anu ka anu kɔ sɔ le kɛlɛ la kɛlɛ ma luŋɛ.
10Anu ma Ala la lahire lakamali,
anu balanta a la sariya labatula.
11Anu ɲinata Ala la wali belebelenu ma,
a ka kabanakoe minnu ma nun anu ɲala anu ka a yen.
12A ka kabanakoenu ma le anu benbanu ɲala
Sowan dula yiriwareŋɛ tɔ, Misira duge tɔ.
13A ka ba je fatan fila la alako anu ni tɛgɛ,
a ka je lasɔ a mata tatta la.
14Tele tɔ, a ka kila yita anu luuture sabu la;
su muru, a ka anu latagaman ta yore la.
15A ka fatanu fara janfue tɔ,
a ka je siyama labɔɔ ɲɔ a ni ma minnɛŋɛ la anu ye.
16A ka ji woyi dulanu labula fata tɔ,
je tota jigila iko kɔɛɛ.
17Kɔnɔ anu tota junubu koe mala Ala la.
Ala min mayɛlɛta, anu murutɛta a ma janfu bala tɔ.
18Anu ka Ala laɲini anu juse tɔ,
ka dɔmɛnu maɲininka anu be diren minnu ye.
19Anu be kumala Ala ma,
anu be a fɔla:
«Ala si nɔ dɔmɔri feŋɛnu labɔɔla mɔ ye ba kɛ janfue tɔ?
20I ma a yen, a ka fata garin, je bɔɔta sɛnbɛ la,
ji woyindanu tota ɲɔ.
Kɔnɔ a si nɔ mɔ kɔla dɛgɛ tugun na ba?
A si nɔ sube diila mɔle a la jama ma ba?»
21Alatala to ka wo kumanu mɔɛ anu la, a dumɛnta.
Ta bɔɔta Yaguba bɔnsɛ digii ma,
a ni fitina sa bani Isirayila kaanu kunma,
22bayi anu bele laaren Ala la,
anu bele lannanteya saren a la dɛmare ma.
23A dun, a nata yamɔre dii luuture ma saŋɛ tɔ,
a ka saŋɛ bondanu laka.
24A ka dɔmɛ lajigi anu ye duge tɔ balue la, min tɔgɔ Mana.
A ka sumankole dii anu ma bɔɔla saŋɛ tɔ.
25Bɛ ka dɛgɛ sɔtɔ a be min dɔmɔla, malekanu la dɔmɛ,
a ka dɔmɛ lajigi anu ye min si anu fa.
26Ala ka fɔɲɛ labɔɔ saŋɛ tɔ bɔɔla tele yɛlɛ,
a ka do labɔɔ a sɛnbɛ la bolo ɲinma tɔ,
27min ka a ma kondeŋɛnu jigita anu ma,
minnu siyata iko banbaŋɛ ka wo ma ba dala mɛɲɛn kolenu,
wonu mata anu ye subu dɔmɔnɛŋɛ la.
28Ala ka wonu laboe anu la tantanu la miliŋɛnu tɔ,
anu la daaka tɛma ɲɔ.
29Anu ka a dɔmɔ han anu fata tɛpu.
Anu dita min ye, Ala ka wo nati anu ye.
30A ka dɔmɛ min dii anu ma,
anu ɲan ma ban wo dɔmɔla,
wo dɔmɛ be anu da tɔ,
31wo wagate le Ala la dumɛ jigita anu ma.
Minnu fisa ŋarinteya la anu tɔ, a ka wonu faga,
a ka bani Isirayila kamareŋɛnu laboe.
32Hali wo bɛ to mata, anu mɛn ka junubu koe ma le,
anu ma laa Ala la wo kabanakoenu la feu.
33Wo butɔ, a ka anu la dunuya tatɛgɛ laban iko foofi layɛlɛ dɔndɔ,
anu labanta kilaŋɛ le butɔ.
34Fɔ a tini be anu fagala, anu ni a la ko talɔn,
anu ni anu yɛtɛ lasaagi a ma, ka Ala batue bita.
35Anu naata a talɔn aa Ala le mu anu la fata la,
aa Ala min mayɛlɛta le mu anu kunkalá la.
36Kɔnɔ anu be diren a mafula anu la kuma la
ka kɛnɛ foniya fɔla a ye da tɔ.
37A la ko ɲan bele sabatiren anu juse tɔ a ɲinma la nun,
anu mɛn bele a la lahire mabanbanna.
38Kɔnɔ ale kan mu kinikininte le la,
a be anu junube kafarila le, a ma anu sɔntɔ.
A tota diɲala a dumɛn koe ma,
a ma a la dumɛ bɛ labɔɔ anu ma.
39A ka a lɔn, fenfen ma adamadeŋɛ la fɔ sube,
ka a foofe bɔɔta a bale tɔ, a te saagi bitugun.
40Kunɲama jelu le ka, anu be murutɛla a ma janfue tɔ?
Kunɲama jelu le ka, anu be a ladumɛnna wo dula mabalareŋɛ tɔ?
41Anu mɛn bata fɔlɔ Ala laɲinila,
anu be kɛlɛ tɛgɛla bani Isirayila la Ala saniyandeŋɛ ma.
42Anu ma a sɛnbɛ la koloya talɔn,
anu mɛn ma a talɔn a ka anu bɔɔ lun min na anu kɛlɛlanu bolo.
43Anu ɲinata le wo tɔnkumanu yati la a ka minnu yita Misira,
anun a ka wali makaabɛreŋɛnu minnu ma Sowan dula yiriwareŋɛ tɔ.
44A ka Misira kaanu la kɔɛɛnu yɛlɛman anu mata base la,
han anu ma nɔ a je minna bitugun.
45A ka siisa da kunamanu latugu anu la, anu ka anu kin koola.
Langansarimanu tugun ka anu kunnatiɲa.
46A ka tugumɛnu latugu anu la sɛnɛnu la,
ka babatenu latugu anu wali gbaanu la.
47A ka anu la rɛsɛn suntenu tiɲa sangi kure la.
A ka anu la toore lɔgɛnu tiɲa kima la.
48A ka a to anu la kolofeŋɛnu ni faga sangi kure la,
balamantaŋɛ ni jigi anu la wɔɔrɛnu ma.
49A fitinata Misira kaanu digii ma;
a ka a la mɔnɛ koroŋɛ, a la jusu yɛlɛ nun a la dumɛŋɛ lajigi anu ma,
a la halagi malá le mu wonu la a be minnu kiiren anu ma.
50A ka a la dumɛ bɛ dusu anu kunma.
A ka anu to bandiya makilandeŋɛ bolo,
a ma anu nɛɛ latanga faga ma.
51Misira denbayanu tɛma, Hima bɔnsɛ la fɔgɔ danu tɔ,
a ka den kayiren fɔlɛnu bɛ faga, anu ka minnu sɔtɔ sɛnbɛ be anu la wagate min tɔ.
52A ka a la jama labɔɔ iko ningi wɔɔrɛ,
a ka anu labɛnbɛn janfue butɔ iko kolofeŋɛnu.
53A ka anu latagaman ka anu doni jususa tɔ, kilan yo bele anu la.
Ba je tugun dusuta anu jaguenu kunma.
54A ka anu doni a la dugu saniyandeŋɛ tɔ,
kɔnkɛ mafanna, a ka min sɔtɔ a sɛnbɛ la.
55A ka see gbɛtɛnu bee anu ɲa tɔ,
a ka duge fatan anu ma kɛɛ la,
a mɛn ka bani Isirayila bɔnsɛnu lasabati wonu la boŋɛnu tɔ.
56Kɔnɔ anu ka Ala laɲini, Ala min mayɛlɛta,
anu murutɛta a ma,
anu ma sɔn a la yamɔrenu labatula.
57Anu ka anu matuntun Ala la,
anu mata janfante la, anu tota iko anu benbanu,
anu bata saagi kɔma han anu fota iko ndaka filifeŋɛ tini tiɲa a fili wagate.
58Anu ka a ladumɛn anu la kuye batu dulanu la;
anu ka a ma Ala ni tɔɔnɛ ma wo lɔgɔ malasɛreŋɛnu la ko la.
59Ala ka wo mɔɛ, a dumɛnta.
A ka bani Isirayila aɲɛ feu.
60A bɔɔta Silo a la hɔrɔma dingira tɔ,
a be sabatiren ka min na mɔgɛnu tɛma.
61Kankira min be a sɛnbɛ nun a la kuntigiya yitaren,
a ka wo to a jaguenu bolo, anu ka a doni anu fɛ.
62A ka a la jama to faŋɛ bolo.
Mɔgɛnu minnu be maren a tɛŋɛ la nun kudai, a dumɛnta wonu ma.
63Ta ka fonikenu bintan,
anu la sunkutuŋɛnu ma mamatɔgɛ sɔtɔ bitugun.
64Faŋɛ le ka anu la sarika lakelanu faga,
anu la furuɲa musenu ma di.
65Marige tota le iko a be kinnɔgɔla le nun,
kɔnɔ a to wulita, a sɛnbɛ tota le
iko beere ka sɛnbɛ dii koroba min ma.
66A ka a jaguenu botege, a ka anu lasaagi kɔma,
a ka abada maluya sigi anu ma.
67A ma Efirayimu bɔnsɛ masubɛ.
Ande Yusufu mamareŋɛnu, a ma sɔn anu jiganna.
68Kɔnɔ a ka Juda le bɔnsɛ masubɛ,
Siyɔn kɔnkɛ, a be min kanuren.
69A ka a la hɔrɔma dingira sɔ ɲɔ le iko dula mayɛlɛreŋɛnu,
ɲɔ ni to iko duge a be min mabanbanden kudai.
70A ka a la jondeŋɛ Dauda masubɛ,
a tagata a jigan saaka wɔɔrɛ le tɔ.
71A ka a bɔɔ saaka deŋɛnu le kunma minnu be susula,
a ni na Yaguba bɔnsɛ latagaman, bani Isirayila jama min be maren Ala tɛŋɛ la kudai.
72Dauda ka anu damaɲini le a hanige beeyareŋɛ la.
A mɛn ka anu mɛnni hakkili ɲinmaya le la.
Currently Selected:
Jabura 78: MOG
Highlight
Share
Compare
Copy
Want to have your highlights saved across all your devices? Sign up or sign in
