Jabura 73
73
Telenbaga la kɔntɔfile telenbalenu la hɛra la ko la
1Asafu la beete do le ka.
Iyon, Ala kaɲin bani Isirayila kaanu ye,
minnu juse beta.
2Adun nde kan, n kɛŋɛnu dita le surunna,
donden n ma boe.
3Bayi n to ka ko koron malanu la hɛra yen,
n be ande Ala lamagalanu tɔɔnɛla.
4Mantɔɔrɔ yo bele anu ma han anu la saya.
Anu kendeta, anu gbangbalanta.
5Bɛlɛya yo bele anu ma iko doenu;
ɲagankata min be doenu ma, wo bele kela ande kan ma.
6A mɛn, fan nakoloya be anu tɔ iko kɔniŋɛ be mɔgɛ kaŋɛ tɔ ki min na.
Anu bata nanbara lajigi anu ma doroke la.
7Anu ɲakɔtɔ be yitiren kɛ́ŋɛ la, anu ɲakolenu be malanna.
Anu juse la mira koroŋɛnu tanbita a tɔ.
8Anu yoyante, anu be kumala mɔgɛnu ma a koroŋɛ la.
Anu la fan nakoloya butɔ, anu be kumala mɔgɛnu tɔɔrɔ koe la.
9Hali saŋɛ, anu si anu da layɛlɛ a la.
Anu nɛŋɛ te fenfen to duge kunma.
10Wolo si a ma Ala la jama si firifiri anu ma,
anu ni laa anu la kuma la min bata bɔn anu kunma iko je banba.
11Ala la jama si a fɔ le wo butɔ: «Ala be kɛ lɔnna kama le?
Ala min mayɛlɛta, a bata lɔn sɔtɔ kɛ ma ba?»
12Wo ko koron malanu fɛlɛ ba!
Wagati bɛ anu be jususa tɔ, anu be anu la harige kunmasala.
13Yaga, n ka n yɛtɛ lasaniyan fu!
N ka n yɛtɛ mɛnni fu kɔnɔ yo kana to n na!
14Lun go lun anu be n botegela,
saguma bɛ ɲagankata be n ɲɛ.
15Ka n ka a fɔ le nun n be diren kumala iko ande,
wo butɔ n si Ala lɔnnanu bɔnsɛ janfa le nun.
16N tota n mirala wo la, ka n si a fahamu;
n ka a yen a bɛlɛ n ɲɛ,
17han n donta Ala la dula saniyandeŋɛ butɔ,
n ka n mira ko koron malanu la ban ɲa ma ɲɔ.
18Ee Ala, i si anu sɔ le kila namayareŋɛ tɔ,
i si anu laboe le ka anu la ko lamɔdɛ feu.
19A fɛlɛ, anu la ko dufenta kisanna.
Kilaŋɛ ka anu bita han anu labanta halage tɔ.
20Anu si to iko kiboe min be muttɛla kunɛn wagate.
Ee Marige, i tini wuli, i si yo le anu kɛɲa bɛ ma.
21N ka koe min yen nun, wolo ka a ma n juse ma diya n ɲɛ,
a be toren n ɲɛ iko tanba le be n sɔgɔla.
22Kɔnɔ wo bɛ butɔ, n mu hakkilibɔnɛ le la nun, n ma fenfen lɔn.
N be toren i ye nun iko subu mira bale.
23Kɔnɔ hali wolo, wagate bɛ nde nun ile le mu,
i be n bolo ɲinma bitaren.
24I si n natagaman iko i be a hanigeren ki min na,
wo kɔma i si n nabɛn kunnawule butɔ.
25Ɲɔmɔ le si nɔ n dɛmanna saŋɛ tɔ, bɔɔ ile la?
Ka bɔɔ ile la, fenfen gbɛtɛ te n hɛnɛ duge tɔ.
26N bali bangue nun n nɛ si nɔ laganfunna,
kɔnɔ Ala le mu n na fata la; n mafanna be bɔɔren ile le ma kudai.
27Minnu be anu matuntunna i la, wonu si halagi le,
minnu bɛ ka i kɔn, i si wonu la ko lasama le.
28Min kaɲin nde kan ye, n ni n madon ile Ala la.
N Marige Alatala, n bata n yigi sa ile le ma,
alako n ni i la wale bɛ masifɛ.
Currently Selected:
Jabura 73: MOG
Highlight
Share
Compare
Copy
Want to have your highlights saved across all your devices? Sign up or sign in
