Jabura 72
72
Ala mataraŋɛ mansa ye
1Sulemani ye.
Ee Ala, mansa dɛman a ni kiiti ɲinma sa.
Kɛ mansa min ɲan mu mansa deŋɛ la, i la teleŋɛ ni to a bolo.
2A ni mansaya ma i la mɔgɛnu kunma teleŋɛ la,
a ni tɔɔrɔbaganu la ko bita sariya kɛɲa ma.
3Hɛra ni jigi bɔɔla kɔnkɛnu tɔ,
tenteŋɛnu tugun ni teleŋɛ labɔɔ jama ye.
4Mansa ni kiite sa tɔɔrɔbaganu ye a ɲinma la,
a ni fondobɔnɛ la deŋɛnu lakisi.
A ni anu ɲagankatalanu muɲunkun.
5Fanni tele nun kare be malanna,
mɔgɛnu ni i biliya yɛlɛman yo yɛlɛman.
6Mansa ni ma iko sangi je min be nala sɛnɛ tɔ,
iko sangi je min be sulenna duge tɔ.
7Telenbaga ni sabati ale mansa la simaya wagatenu tɔ.
Hɛra ni to a banba la han kare la malaŋɛ ni ban.
8A ni fisamanteya sɔtɔ kabɔɔ ba doe ma han ka ke ba doe ma,
kabɔɔ Efirati kɔɛɛ ma han ka ke dunuya daŋɛ ma.
9Janfu tɔ mɔgɔ labolokareŋɛnu ni na anu majigi a ye.
A jaguenu ni buguta muga a kɛn kɔtɔ.
10Tarisi mansanu anun minnu be surenu tɔ, anu ni sanba nati a ye.
Seeba nun Seba mansanu ni duute dii a ma.
11Mansa bɛ ni kimisirin a kɛn kɔtɔ;
see bɛ ni wali a ye.
12Iyon, fondobɔnɛ minnu be anu kulɛ labɔɔla a ma,
anun minnu dɛmanná bele,
a si wonu lafulen de.
13A si kinikini le misikinɛnu nun fondobɔnɛnu ma.
A si tɔɔrɔbaganu lakisi le.
14A si wo mɔgɛnu kunka le ka anu latanga mamafue nun nanbara ma,
bayi anu sɔdula kolo a ye, a te sɔn anu base ni bɔn.
15Ala mu mansa lamɛla! A ni Seeba sanuɛnu sɔtɔ dinma la.
Bɛ ni mamataraŋɛnu ma a ye wagate bɛ,
lun go lun anu ni duba a ye.
16Dɔmɔ siyama ni sɔtɔ a la duge tɔ.
Kɔnkɛ kun tɛmanu ni lafa tɔnsɛnu la.
Fɔɲɛ ni anu lamaga kɛnɛ, iko a be mala Liban ki min na.
Mɔ la saanu ni lafa mɔgɛnu la iko sɛnɛ be lafaren ɲagama la ki min na.
17Ala mu mansa tɔgɛ lakoloyala abada,
dan kana to a tɔgɛ la fanni tele be.
See bɛ ni barikɛ sɔtɔ a sabu la,
anu ni a fɔ hɛra be a ye.
18Mamatɔgɛ be Alatala ye, bani Isirayila la Ala.
A dɔrɔn pɛti le be kabanakoenu mala.
19Ala mu a mala a la biliya ni ke dunuya bɛ tɔ,
a tɔgɔ banba ni matɔgɔ kudai.
Amina! Amina!
20 Jese la den Dauda la Ala mataraŋɛnu bata ban yan.
Currently Selected:
Jabura 72: MOG
Highlight
Share
Compare
Copy
Want to have your highlights saved across all your devices? Sign up or sign in
