Jabura 69
69
Biribaga la Ala mataraŋɛ
1Dauda la beete do le ka, min be donden beeti bɔɔlanu la kuntige bolo. Beete le mu min be bɔɔla iko beete min tɔgɔ: «Feere ɲinmanu.»
2Ee Ala, i ni n nakisi,
je bata n bita n kaŋɛ tɔ.
3Bɔra be n dɔmɔ koe tɔ, n kɛn sɔdula yo bele.
A fɛlɛ, n bata jigi je kɔtɔ, mɔrɔn banbanu bata dusu n kunma.
4N bata i kele han n kulɛ bata saalɛ,
n ɲanu bata n dumɛn ile n Marige Ala ɲini koe la.
5Mɔgɛ minnu be n kɔnna fufafu la,
wonu siyata n kunsigenu ko.
N jague minnu be n tɔɲɛgɛla, sɛnbɛ be wonu la;
a mɛn, n faga sɔgɛ be anu la.
Adun, n to ma fenfen kanka,
n si nɔ fondo lasaagila kama le?
6Ee Ala, n na hakkilibɔnɔya bele dogonden i la,
i be n na junube bɛ lɔnden.
7Ee Alatala, dunuya bɛ da mansa,
minnu be anu yige saren i ma,
i kana a to anu ni malu n na ko la.
Bani Isirayila la Ala, minnu be i batula,
i kana a to wonu ni jarabi n na ko la.
8Tɔɲa le, n ka narile sɔtɔ,
n ka maluya sɔtɔ ile le la ko la.
9N be toren n baabadɔndɛnu ye iko luntaŋɛ;
n be toren n nɛɛnɛdɔndɛnu ye iko nabaga.
10I la batu bon banba la ko hanmɛ be n na han a ni n faga.
Wo butɔ, mɔgɛnu be i fɛɛya min mala, wo bɛ bata boe n ma.
11Hali n be dila, n bele sɔnden n daɲinila,
kɔnɔ mɔgɛnu be n majelela.
12Hali n be suunu kuta lajigila n ma,
anu be yola n ma anu la finare kumanu tɔ.
13Minnu be sigiren saa dondula, anu be n mayola,
beere minnanu tugun be n mayola sigi sa le la.
14Kɔnɔ Alatala; nde be i táranna.
Ee Ala, i ni hinnɛ n na kɛ wagate yati le,
bayi dan bele i la kanunteya la.
N nakisi, bayi kulɛ dɔndɔ tige le mu i la.
15I ni n sabaa bɔra tɔ, n kana biri,
alako n ni kisi n kɔnnɛlanu ma,
n ni yɛlɛ ji dulá butɔ.
16I kana a to mɔrɔn banbanu ni n nadula,
je kana n mabutin,
kɔlɔŋɛ da kana tagun n kunma.
17Ee Alatala, i ni n jaabi, bayi i la kanunteya kolo.
I mu kinikininte banba le la,
wo butɔ, i ni i firifiri n ma.
18Iyon, i kana i ɲakɔtɔ dogon nde i la walilá la.
N be tɔɔrɛ banba tɔ; i ni n jaabi teriya la.
19I ni i madon n na, i ni n nakisi,
i ni n kunka n jaguenu bolo.
20I ɲa be sɔren n jaguenu bɛ la.
Mamayoe min kɔnte be n kunma, ile le ka a lɔn, anun maluya, anun malajarabe.
21Mamayoe bata n juse makasa han n bata bandi.
N yili be mɔgɛnu la kinikinɛ ma nun, kɔnɔ n ma fenfen sɔtɔ;
n ka mamajɛjɛlá ɲini, kɔnɔ n ma mɔgɔ yo sɔtɔ.
22Anu be maladɔmɛ sala n na dɔmɛ tɔ,
Ji sɔgɛ be n na wagate min tɔ,
anu be ji kunama donna n bolo je faliŋɛ la.
23Ala mu a mala anu dɔmɔre ma dula ni ma anu ye julu yɛlɛreŋɛ la
jala min be anu bitala,
anun anu daɲiniɲɔgɛnu.
24Ala mu anu ɲanu lapinpila alako anu kana ɲɔ tayen,
anu ni to kunkurunna kudai.
25Ala, i ni i la mɔnɛ bɔn anu ma.
I la dumɛ ni anu take.
26I ni anu la fɔgɛnu tiɲa,
alako mɔgɔ yo kana to anu kiri boŋɛnu tɔ bitugun.
27Bayi ile ka mɔgɛ minnu ɲagankata, ande tugun be wonu beela.
I ka mɔgɛ minnu halagi, anu ɲan be do sala wonu la tɔɔrɛ kunma.
28I ni anu la wali koroŋɛ kote bɛ sigi anu kunma;
alako anu kana i la kise sɔtɔ bitugun.
29Mɔgɔ kisireŋɛnu tɔgɛ be sɛbɛren bukke min tɔ, anu tɔgɛ bɔɔ wo tɔ,
anu kana to telenbaganu tɛma.
30Kɔnɔ nde kan, n be tɔɔrɛ le tɔ, anun dumɛŋɛ.
Ee Ala, i ni n nawuli ka n nakisi.
31Wo butɔ, n si Ala tantu beeti bɔɛ la,
n si a biliya lake ka a la walisa.
32Wo si diya Alatala ye ka tanbi sarika la,
hali a mata ningi tuura la kɔnɔ bele min na.
33Tɔɔrɔbaganu tini n na kise yen, anu si sɛɛwa le.
Iyon, wo si sɛnbɛ don de, wole min be Ala batula!
34Bayi, Alatala be a tolomasɔla tɔɔrɔbaganu la,
a te ɲina a la mɔgɛnu ma ka anu be geele tɔ.
35Saŋɛ nun duge, wo tantue ma Ala ye.
Wole nun ba anun a butɔ feŋɛnu, wo a tantu.
36Bayi, a si naa Siyɔn#69:36 Darisalamu tɔgɔ do le mu Siyɔn na. nakisi le, a ni Juda duge saanu sɔ mɛn tugun.
A la mɔgɛnu si sigi ɲɔ, wo duge ni ma anu tɛŋɛ la.
37A si ma a la joŋɛnu tɛŋɛ la ka bɔɔ juruya han juruya.
A kanunteŋɛnu si sabati le ɲɔ.
Currently Selected:
Jabura 69: MOG
Highlight
Share
Compare
Copy
Want to have your highlights saved across all your devices? Sign up or sign in
