Jabura 68
68
Ala tantu beete a la nɔɛ to be seenu kunma
1Dauda la beete do le ka, min be donden beeti bɔɔlanu la kuntige bolo.
2Ala ni wuli a jaguenu ni mafatan.
Minnu be a kɔnden, wonu ni bori a ɲala.
3I ni anu lamuttɛ iko fɔɲɛ be siise mala ki min na.
Ko koron malanu ni halagi ile Ala ɲala,
iko ta be dole lalɛɛla ki min na.
4Kɔnɔ, telenbaganu si sɛɛwa le, ka ɲagalin Ala ɲakɔtɔ.
Anu ni ɲagalin kulɛ banba labɔɔ.
5Wo beete bɔɔ Ala ye, ka tantue ma a ye beeti bɔɛ la.
Ale min be tagamanna luuture tɔ, wo mɔ ni a lasɛnɛ.
A tɔgɔ le Alatala; wo mɔ ni ɲagalin a ɲala.
6Ala min be a la dula saniyandeŋɛ tɔ,
ale le mu aliyatimɛ baaba nun furuɲa musenu makantalá la.
7Ala le si denbaya dii mɔgɛ ma min be a dɔrɔn,
a ni gelemanɛnu kunka a ni anu lasɛɛwa.
Kɔnɔ mɔgɔ murutɛreŋɛnu kan si lafili dugu bala tɔ anu ni to ɲɔ.
8Ee Ala, i sɔta i la jama ɲatɔ wagate min tɔ taga koe la kɛlɛ tɔ,
i be tagamanna anu ɲatɔ janfue butɔ,
(beeti bɔɔlá la suleŋɛ donden)
9duge sɛrɛnta; sange woyita Ala ɲala,
ile bani Isirayila Marige Ala min be Turisinina.
10Ee Ala, i ka sangi je banba lawoyi.
I la jamanɛ be sɛɛyaren de nun, kɔnɔ i ka sɛnbɛ dii a ma.
11I la jama sigita wo duge tɔ,
ile Ala ka min tabɛn tɔɔrɔbaganu ye i la ɲinmaya la.
12Marige to ka kuma do fɔ ki min na,
musu jama banba mata le wo kibaru ɲinma lakelá la.
13Anu ko: «Sii gbɛtɛ la mansanu nun anu la kɛlɛ malanu ka anu bori!»
Mɔ la musenu minnu tota boŋɛ tɔ, wonu nata kɛlɛ tɔnɛ mafatan.
14Bɔ, wole tota saren kolofeŋɛnu kɛnna fenna?
Ala dun be a la jama kɔla kɛlɛ tɔnɛ la,
anu ni to iko gabue
min gabataŋɛ be mabutinden kaalise la,
a tenu be malanna iko sanu ɲinma.
15Ala sɛnbɛ tige ka mansanu mafatan wagate min tɔ,
a mɛn ka sangi kure lajigi Salimon kɔnkɛ tɔ.
16Baasan kɔnkɛ mu kɔnkɔ belebele le la,
min kuntɛmanu siyata.
17Ile kɔnkɔ kuntɛma siyama, fenna i be tɔɔnɛ mala kɔnkɛ la
Ala be min masubɛren a la kɔnkɛ la?
Alatala dun si sabati le ɲɔ abada.
18Marige Alatala jigita Turisinina kɔnkɛ tɔ,
a ni ke a la dula saniyandeŋɛ tɔ,
a nun a la sarɛti wulu wulu.
19Alatala, i ka gelemanɛnu doni i fɛ,
i ka sanba siyama sɔtɔ mɔgɛnu la, hali mɔgɔ murutɛreŋɛnu,
han i yɛlɛta i la dula mayɛlɛreŋɛ tɔ,
ile Ala ni to ɲɔ.
20Mamatɔgɛ be Marige ye,
min be sorilen mɔ la kotenu la lun go lun.
Ale le mu mɔ la Ala la, min be mɔ lakisila.
Beeti bɔɔlá la suleŋɛ donden.
21Mɔ la Ala mu malakise tige le la,
ale le mu Alatala la, mɔ Marige, min be mɔ kunkala saya ma.
22Ala si a jaguenu kuŋɛnu jɔnjɔn de nɛti,
kɛ kun bitireŋɛnu minnu bata anu sɔɔbɛ don ko koroŋɛ la.
23Marige ka a fɔ, a ko: «N si anu tanati le bɔɔla Baasan.
N si anu tanati bɔɔla ba luggɛreŋɛnu tugun tɔ,
24alako wo ni anu madanpɛ ka tagaman anu base tɔ,
wo la wulenu nɛŋɛ ni munanfaŋɛ sɔtɔ wo jaguenu base tɔ.»
25Ee Ala, bɛ ka i yen de tagala anun i la miliŋɛ.
Ee Ala, n na mansa, bɛ ka i nun i la miliŋɛ yen de tagala han i la dula saniyandeŋɛ tɔ.
26Beeti bɔɔlanu be i ɲatɔ, basiri malanu be i kɔma,
sunkutuŋɛ minnu be anu tɛma, wonu be boote botegela.
27Wo ni Ala matɔgɔ mamadɛŋɛnu tɔ.
Wole Isirayila bɔnsɛnu bɛ ni Alatala matɔgɔ.
28Bunyamin, min be maren bɔnsɛnu bɛ dɔgɔmaŋɛ la, wo be sɔren ɲatɔ.
Wo kɔma, Juda bɔnsɛ kuntigenu nun anu la mɔgɛnu,
Sabulɔn kuntigenu nun Nafutali tɛŋɛnu tugun sɔta wonu kɔma.
29Ee Ala, i sɛnbɛ la, yamɔre sa,
i ka wale min ma mɔ mafanna nun, i ni wo sɛnbɛ don.
30Wo butɔ, mansanu si na i la buuɲa dantɛgɛ i ye
i la batu bon banba tɔ min be mayɛlɛren Darisalamu saa kunma.
31I ni fatiya subu fatima ma min be kaliŋɛnu tɛma.
A mɛn, i ni fatiya tuura kuruŋɛ ma,
ande nun tuuradeŋɛnu minnu be bɔɔla jamanɛnu tɔ.
Wo jamanɛ mɔgɛnu ni naa anu majigi ka kaalisi dii i ma.
I ni wo jamanɛ mɔgɛnu malansan minnu bata kɛlɛ makanu.
32Misira kaanu la mɔgɔ banbanu si na anu dantɛgɛ Ala ye.
Kusi kaanu tugun si anu bole lafonti teriya la ka duute dii a ma.
33Dunuya jamanɛnu, wo beeti bɔɔ Ala ye;
wo ni Marige Alatala tantu.
Beeti bɔɔlá la suleŋɛ donden.
34Wo ni a tantu, ale min be a matagamanna saŋɛ tɔ, saŋɛ min be ɲɔ kudai.
Wo wo tolomasɔ! A be a kulɛ labɔɔla, a kulɛ sɛnbɛma.
35Wo ni a talɔn ka a fɔla Ala sɛnbɛ kolo,
a la nɔɛ be bani Isirayila kunma, a sɛnbɛ be saŋɛ tɔ.
36Ala, i to be i yɛtɛ labɔɔla i la hɔrɔma dingira tɔ,
mɔgɛnu bɛ bɛnta kilanna i la.
Bani Isirayila kaanu la Ala be sɛnbɛ diila a la jama ma.
Mamatɔgɛ be Ala ye!
Currently Selected:
Jabura 68: MOG
Highlight
Share
Compare
Copy
Want to have your highlights saved across all your devices? Sign up or sign in
