Jabura 65
65
Ala tantu beete a la barikɛ la ko la
1Dauda la beete do le ka, min be donden beeti bɔɔlanu la kuntige bolo.
2Ee Ala, mɔ ni i tantu mɔ be lakararen, ile min be Siyɔn kɔnkɛ kunma.
Mɔ ka lahire minnu jigan i ye, mɔ si anu lakamali le.
3Mɔgɛ bɛ si na le i ma,
bayi ile le si mamataraŋɛ lamɔɛ.
4Ko koroŋɛnu ka nɔ sɔtɔ n ma nun,
kɔnɔ ile le be mɔ la junubenu kafarila.
5I bata minnu masubɛ i ka anu nati i kɛnna,
anu sabatita i la dula saniyandeŋɛ tɔ, hɛra be wonu ye.
Mɔ si wasa le i la bon butɔ ko ɲinmanu la,
anun ko saniyandeŋɛnu la minnu be i la batu boŋɛ tɔ.
6Mɔ lakisilá Ala, i la teleŋɛ butɔ,
i be mɔ jaabila kabanakoenu la.
Mɔgɛnu bɛ si anu yigi sa i ma,
han dunuya daŋɛ mɔgɛnu,
hali minnu be ba dala kan yanfama.
7I bata kɔnkɛnu tenkun i sɛnbɛ la,
bayi sɛnbɛma le mu i la.
8Ile le be ba je wuruntun kulɛ lamɔdɛla, anun mɔrɔŋɛnu kɔnkɔn kulɛ,
anun seenu minnu be kɔnkɔre kulɛ labɔɔla.
9Mɔgɛnu minnu be sabatiren han dunuya daŋɛ tɔ, anu bata kilan i la kabanakoenu ɲala.
Ka bɔɔ tele yɛlɛ han tele jige tɔ, anu be anu ɲagalin kulɛ labɔɔla le i la ko la.
10I be mɛnniren duge ma ka sange je lasanba a banba la, wolo mu nɛɛma banba si to duge tɔ.
I si kɛnɛ i la kɔɛɛ lafala je la, ka mɔgɛnu kɔ sugu kole la.
I be duge la ko ɲinma tabɛnna ɲɔgɔnna le.
11I be sangi je siyama min natila duge kunma,
a si jigi birin folenu tɛma, a ni duge lasɛnsɛn.
I be barikɛ sala sɛnɛ ma, kifeŋɛnu ni ɲiɲa,
12alako sɛnɛ tɛgɛ wagate i ni ko ɲinmanu labɔɔ.
I tanbita kan do kan, ko yiriwareŋɛ si sɔtɔ le ɲɔ.
13Janfue tɔ kifeŋɛnu si ma le a la a ɲinma la.
Tenteŋɛ fɛfɛ bɛ, ɲagalin kulɛ be mɔɛla le.
14Kolofeŋɛnu be yiriwala le anu daɲini dula butɔ.
Suge be kɔnkɛnu kɔtɔ mabutinden.
Dalifeŋɛ bɛ be anu kulɛ labɔɔla ka beeti bɔɛ ma sɛɛwa la.
Currently Selected:
Jabura 65: MOG
Highlight
Share
Compare
Copy
Want to have your highlights saved across all your devices? Sign up or sign in
