Jabura 63
63
Ala sɔgɔ madi koe beete
1Dauda la beete do le ka, a ka min bɔɔ a to be Juda janfue tɔ wagate min tɔ.
2Ee Ala, ile le mu n na Ala la; n hajue be i ma koola.
I sɔgɔ be n juse la;
n bale be diren i sɔgɔ bɔɔla
iko kɛ dugu bala be diren je ye ki min na.
3Ee, wo tuma nun n tota le i fɛlɛla i la dula saniyandeŋɛ tɔ,
n ni i sɛnbɛ nun i la biliya yen.
4I la fonisireya fisa simaya ko.
Wo butɔ, n mɛn be diren i tantula tugun.
5Iyon, n si i matɔgɔ le n na simaya bɛ butɔ;
n si n bole mayɛlɛ le i mafanna ka i tɔgɔ saniyandeŋɛ fɔ.
6N sondoŋɛ si wasa i ma
iko mɔgɛnu be wasala dɔmɛ yiriwareŋɛ la ki min na sali luŋɛ.
N da ni i tantu, ka to sɛɛwa kuma tun fɔla i ye.
7N be saren wagate min tɔ benbe tɔ, n be n mirala i la ko la.
Su muru, n be n hakkile latagala ile le ma.
8Iyon, i mu n dɛmanná le la wagati bɛ.
N be n dogonna i gaba kɔtɔ le, ka n kulɛ mayɛlɛ ɲagaliŋɛ la i niiniŋɛ kɔtɔ.
9N bata patu i ma,
i bolo ɲinma ni n kɔtɔ sɔ.
10Minnu be fɛrɛ ɲinila ka n halagi,
wonu si jigi le han fagabaganu dula duge bɔtinɛ tɔ.
11Anu si faga faŋɛ la kɛlɛ tɔ;
wula butɔ wulenu si anu dɔmɔ.
12Mansa kan si sɛɛwa le Ala la ko la.
Minnu be anu kalila Ala la, wonu si wasu le,
bayi foniya fɔlanu tugun da si mɔdɛ le gudu.
Currently Selected:
Jabura 63: MOG
Highlight
Share
Compare
Copy
Want to have your highlights saved across all your devices? Sign up or sign in
