Jabura 60
60
Ala mataraŋɛ a ni kunnawule dii a la jama ma
1Dauda la mɔgɔ lakaran beeti sɛbɛreŋɛ do le ka, min be donden beeti bɔɔlanu la kuntige bolo. Beete le mu min be bɔɔla iko beete min tɔgɔ «Feere ɲinma min mu lahire la seedeɲɔgɔya la». 2Anu ka kɛ beete bɔɔ wagate min tɔ, wo ka a taran Dauda nun a la jama bata bɔɔ nun Arami kaanu kɛlɛ dula wonu la duge tɔ, ka min be kɔɔ banba fila tɛma, anun Arami kaanu minnu be Soba duge tɔ. Anu saagi wagate tugun, wo ka a taran Yowaba bata Edɔmi kaa wulu tan nun fila faga Kɔɔkɛ Fole tɔ.
3Ee Ala, i balanta mɔ ye!
I to bata mɔnɛ mɔ ma,
i ka kasara dusu mɔ kunma.
Kɔnɔ kɔtɛ, i ni tasaagi mɔ sɔɲa ɲiɲala.
4I bata duge lasɛrɛn ka a tafara.
Awa kɔtɛ, i ni a farareŋɛnu lafa, bayi a bata di tiɲala.
5I bata i la jama latanbi wagati bɛlɛŋɛnu tɔ,
i ka a ma mɔ jingijangata iko beere minná siisireŋɛnu.
6Mɔle i ɲalakilannanu, i bata tabaldɛ botege mɔ ye,
a yita koe la mɔ ni bori ndaka fililanu la.
Beeti bɔɔlá la suleŋɛ donden.
7I ni mɔ lakisi i sɛnbɛ la, i mɛn ni mɔ jaabi,
alako mɔle i kanunteŋɛnu, i ni mɔ lafulen.
8Ala bata kuma a la dula saniyandeŋɛ tɔ, a ko:
«N si kunnawule sɔtɔ le wo jaguenu kunma.
Wo butɔ, n si Sisɛmu saa fatan de,
ka Sukoti gulunba suman, n ni naa a dii n na mɔgɛnu ma.
9Galadi duge mu n tɛŋɛ le la, anun Manasi duge.
Efirayimu duge mu n na nɛgɛ kufunɛ le la.
Juda mu n na mansa tungare le la.
10Mowaba duge bele maren fenfen na, fɔ n bolo ko miraŋɛ.
N tini n kɛŋɛ sɔ Edɔmi duge tɔ ki min na, a si ma n tɛŋɛ la.
Wole Filisiti kaanu, wo ni ɲagalin sɔnkɛ layɛlɛ n ɲɛ!»
11Ee Ala, ɲɔmɔ le si nɔ n nakela saa makantareŋɛ tɔ?
Ɲɔmɔ si nɔ n donila han Edɔmi?
12Fɔ ile Ala, min balanta mɔ ye.
I te mɔ la kɛlɛ malanu masɔ kɔtɛ ba?
13I ni mɔ dɛman mɔ jaguenu kɛlɛ koe la,
bayi adamadeŋɛ la dɛmare be maren fu le la.
14Ka Ala be mɔ fɛ, mɔ si kunnawule sɔtɔ le;
ale le si mɔ jaguenu mutukun.
Currently Selected:
Jabura 60: MOG
Highlight
Share
Compare
Copy
Want to have your highlights saved across all your devices? Sign up or sign in
