Jabura 59
59
Ala mataran beete a ni telenbalenu laboe
1Dauda la beeti sɛbɛreŋɛ do le ka, min be donden beeti bɔɔlanu la kuntige bolo. Beete le mu min be bɔɔla iko beete min tɔgɔ «I kana halage ma». Dauda ka kɛ beete sɛbɛ wagate min tɔ, wo ka a taran Sayulu bata mɔgɛnu lasanba Dauda bata kantadula alako anu ni a faga.
2N na Ala, i ni n bɔɔ n jaguenu bolo;
minnu be wuliren n digii ma, i ni n natanga wonu ma.
3I ni n bɔɔ ko koron malanu bolo;
i ni n nakisi wo mɔgɔ fagalanu ma,
4bayi anu be n mamɛlɛnna n faga koe la.
Ee Alatala, mɔgɔ sɛnbɛmanu be anu madɛnna n na ko la,
hali n bele ko koron maren,
hali n bele junubu ko maren.
5N ma tiɲare yo ma,
kɔnɔ anu be anu tabɛnna ka bori n kɔma.
Wuli, i ni na n dɛman! Yandi, n na ko fɛlɛ.
6Marige Alatala, dunuya bɛ da Mansa,
ile min be maren Isirayila la Ala la,
yandi i ni wuli
ka kɛ sii koroŋɛnu bɛ latɔn.
I kana diɲa kɛ janfante koroŋɛnu ma.
Beeti bɔɔlá la suleŋɛ donden.
7Wura yo wura, anu si na le kɛnɛ ka wonwon,
ka linlan saa butɔ iko wulu labolokareŋɛnu.
8I tolomasɔ anu la ba: kuma koroŋɛ le tun be bɔɔla anu da tɔ.
Anu nɛŋɛnu be toren de iko faŋɛnu.
Anu be a fɔla: «Dodo te a hakkile to mɔ la kuma ma.»
9Kɔnɔ, ile Alatala, i be anu majelela;
i be yoren kɛ sii koroŋɛnu bɛ ma.
10N sɛnbɛ mu ile le la.
Ile Ala, n be n hakkile toren ile le ma;
i mu n makantalá le la.
11N Marige Ala hinnɛnte, a si na le n ma.
A ni a to n ni n ɲa lajigi n jaguenu ma.
12Ee Ala, i kana anu faga; alako n na jama kana ɲina i la nɔɛ la.
Ee Marige, mɔ latangalá,
i sɛnbɛ ni anu lamiligimalaga, ka naa anu laboe.
13Kuma minnu be bɔɔla anu da tɔ, a bɛ junubu kuma.
Ala mu anu bitala anu la fan nakoloya ma,
bayi anu be dankare nun foniya le tun fɔla.
14I ni anu tiɲa i la dumɛŋɛ la; i ni anu tiɲa feu ka anu lamuttɛ.
Ka wo mata, mɔgɛ bɛ si a lɔn de Ala le mu mansa la Yaguba bɔnsɛ kunma,
a la mansaya be han dunuya daŋɛ tɔ.
Beeti bɔɔlá la suleŋɛ donden.
15Wura yo wura, anu si na le kɛnɛ ka wonwon,
ka linlan saa butɔ iko wulu labolokareŋɛnu.
16Anu be jonjonna anu balu ɲini koe la,
anu ni ŋuurɛ ka anu ma balu siyama sɔtɔ.
17Kɔnɔ, nde si beete bɔɔ le i sɛnbɛ la ko la.
Saguma yo saguma n ni n kulɛ mayɛlɛ ɲagaliŋɛ la
ka i la fonisireya la ko fɔ.
I bata ma tatta la nde ye,
n si malatanga sɔtɔ ile le dula tɔɔrɛ wagate tɔ.
18Ee Ala, n sɛnbɛ, n si beete bɔɔ i ye,
bayi ile le mu n makantalá la,
ile le mu Ala la min be a la fonisireya yitala n na.
Currently Selected:
Jabura 59: MOG
Highlight
Share
Compare
Copy
Want to have your highlights saved across all your devices? Sign up or sign in
