Jabura 57
57
Tɔɔrɔbaga la Ala mataraŋɛ a jagu fatimanu bolo
1Dauda la beeti sɛbɛreŋɛ do le ka, min be donden beeti bɔɔlanu la kuntige bolo. Beete le mu min be bɔɔla iko beete min tɔgɔ «I kana halage ma». Dauda ka kɛ beete sɛbɛ wagate min tɔ, wo ka a taran a be borila Sayulu la ka taga don fanmɛ tɔ.
2I ni hinnɛ n na; ee Ala i ni hinnɛ n na.
Bayi n be tangare ɲinila ile le dula,
iko susu deŋɛ be a ɲinila a nɛɛnɛ gabataŋɛ kɔtɔ ki min na
han bɛlɛya wagate ni tanbi.
3N be n kulɛ labɔɔla Ala ma, Ala min mayɛlɛta,
min be n na koe bɛ ɲatabɔla.
4A si kisi koe lana le n ma kabɔɔ saŋɛ tɔ.
Minnu be n beela, a ni anu lajarabi.
Beeti bɔɔlá la suleŋɛ donden.
Ala mu a la kanunteya banbale nun a la kuma dɔndɔ tigiya yitala n na.
5N be bitaren mɔgɛnu bolo
minnu si mɔgɛ mafara iko jatanu.
Anu ɲiŋɛnu mu tanbanu nun ndakanu le la;
anu nɛŋɛ mu fan dadiyama le la.
6Ee Ala, i ni i la kunnawule yita saŋɛ tɔ,
i la nɔɔra ni yiriwa dunuya bɛ tɔ.
7N jaguenu ka jala lafonti n kɛn kɔtɔ,
han n bata lakɛtɛn.
Anu ka dinka soe n na tanbi kila tɔ,
kɔnɔ anu yɛtɛ bata boe a tɔ.
Beeti bɔɔlá la suleŋɛ donden.
8Ee Ala, n hakkile bata lakara, n hakkile bata lakara yati;
n si beete bɔɔ le, n ni i tantu.
9N juse, i ni kunɛn;
n na kɔndiŋɛ nun n na kɔra, wo ni wuli.
N be diren wulila yannun ɲɔ lakɛnɛ.
10Ee Marige, n si i matɔgɔ le seenu tɛma,
n si i tantu beetenu bɔɔ le bɔnsɛnu tɛma.
11I la fonisireya kolo, ale le be han saŋɛ tɔ,
i la lannanteya tugun be han luuture ma.
12Ee Ala, i ni i la kunnawule yita saŋɛ tɔ,
i la biliya ni yiriwa dunuya bɛ tɔ.
Currently Selected:
Jabura 57: MOG
Highlight
Share
Compare
Copy
Want to have your highlights saved across all your devices? Sign up or sign in
