Jabura 56
56
Boribaga la a yɛtɛ taaku koe Ala la
1Dauda la beeti sɛbɛreŋɛ do le ka, min be donden beeti bɔɔlanu la kuntige bolo. Beete le mu min be bɔɔla iko beete min tɔgɔ: «Gabu mɔdɛreŋɛ dula yanfama tɔ». Dauda ka kɛ beete sɛbɛ le, wo ka a taran Filisiti kaanu bata a bita Gati saa tɔ.
2Ee Ala, hinnɛ n na,
bayi mɔgɛnu be katala n bita koe la,
Tele muru anu be boela n ma, anu be n kɛlɛla.
3N jaguenu be n beela tele muru.
Iyon, anu siyata minnu be n kɛlɛla, anu be anu wasula.
4N tini kilan wagate min tɔ,
n be n na lannanteya donila ile le ma.
5N bata taaku Ala la; n te kilan fenfen na,
n be a tantula a la kuma fɔreŋɛ la ko la.
Adamadeŋɛ si nɔ fen de mala n na?
6Wagate bɛ n jaguenu be n na kumanu mayɛlɛmanna.
N ɲagankata koe mira le tun be anu ye.
7Anu be madɛnna, ka n masakkɛ,
ka n na tagamaŋɛnu lakɔrɔsi.
Anu be diren n faga koe le ye.
8Ee Ala, wo ko koroŋɛ bɛ sabu la, i si anu to kisiren ba?
I ni kɛ mɔgɛnu laboe i la dumɛŋɛ la!
9I ka a lɔn n be jindɛren ki min na.
I ni n ɲaje madɛn i la luule tɔ.
Ká, anu ɲan bɛ sɛbɛreŋɛ kɔnte bele i bolo ba?
10N tini n kulɛ labɔɔ i ma lun min na,
n jaguenu si saagi le n kɔma wo lun.
N ka a lɔn yati: Ala be n fɛ.
11Ala to kumata n ɲɛ, n be a tantula.
Iyon, wo kuma sabu la n be Alatala tantula.
12N bata taaku Ala la; wo butɔ n te kilan bitugun.
Adamadeŋɛnu si nɔ fen de mala n na?
13Ee Ala, n ka lahire minnu jigan i ye, anu be n kunma.
N si anu lakamali le n ni sarikanu bɔɔ i ye i tantu koe la,
14bayi i ka n nakisi saya ma,
i ka n natanga n kana surun n ni boe.
Wo butɔ, n Marige Ala n be tagamanna le i ɲakɔtɔ kɛnɛ tɔ,
kɛnɛ min be mɔgɔ balureŋɛnu ye.
Currently Selected:
Jabura 56: MOG
Highlight
Share
Compare
Copy
Want to have your highlights saved across all your devices? Sign up or sign in
