Jabura 35
35
Mɔgɔ koroŋɛ ni a sɔŋɛ sɔtɔ
1Dauda la beete do le ka.
Ee Alatala, i ni n na tirinnanu latirin.
Minnu be n kɛlɛla, i ni wonu kɛlɛ.
2I ni kɛlɛmafeŋɛ jigan n kanta koe la, a banba nun a lanma,
i ni wuli n dɛman koe la.
3I ni tanba nun ndaka jigan n jaguenu ye,
i ni a fɔ n ɲɛ, ile le mu nakisilá la.
4N jaguenu ni malu, anu ni mafu,
n faga sɔgɛ be minnu la.
Minnu be natá jiganna anu ni ko koroŋɛ ma n na,
wonu ni saagi n kɔma anu ni kɔntɔfili.
5Anu ni to iko dele, fɔɲɛ bata min malansan.
Alatala la maleka ni anu bee.
6Alatala la maleka ni anu labɛnbɛn anu ni taga pon,
anu la kila ni dibi, a mɛn ni namaya.
7Anu bata jala lafonti dinka kunma n ɲatɔ,
anu bata dinka soe n be boela min butɔ alako n ni faga,
adun n bele ko tiɲaren anu ma.
8Awa, halagi banba ni anu latɛrɛnna,
anu ni bita anu la jala sareŋɛ la,
anu ni boe anu la dinka butɔ.
9Wo wagate, n si sɛɛwa le Alatala la,
n ni ɲagalin a la kise la ko la.
10N be kɛ-lɛ fɔla n juse tɔ, n ko:
Alatala, ile nun ɲɔmɔ le si kan?
I nɔta tɔɔrɔbaganu lakisila sɛnbɛ tigenu kunma.
I nɔta tɔɔrɔbaganu nun fondobɔnɛnu lakisila anu la boenmalanu ma.
11N ma koe min lɔn, seede koroŋɛnu bata wuli,
anu be n maɲininkala wolo la.
12Anu be n na ko ɲinma sɔŋɛ lasaagila n ma ko koroŋɛ la.
N bata to n dɔrɔn.
13Kɔnɔ nde kan, anu be bandiren wagate min tɔ,
n ka kinikini kuta sa n ma, n ka n majigi n sunta.
N tota mamataraŋɛ mala anu ye wagate bɛ.
14N bata a ma ɲɔgɔnna iko n kafuɲɔgɛ, iko n nɛɛnɛdɔndɛ le mu.
N na dire bata n kun majigi iko min be suunuren a nɛɛnɛ faga koe la.
15Kɔnɔ nde be boe koe tɔ wagate min tɔ, anu sɛɛwata,
anu nata ɲɔgɔn yen;
minnu be diren n botegela, anu bɛnta n kunma, kɔnɔ n ma a lɔn.
Anu bele diren fenfen ye fɔ n ni halagi le tun.
16Kɛ jama ɲalakilan bale filankafuenu,
anu be wuruntunna n ɲɛ fɔ anu be anu ɲiŋɛ takinna.
17N Marige, i be wo lasagala han muntuma?
I ni n natanga anu la tiɲare ma,
i ni n nɛ lakisi kɛ jatanu bolo.
18Wo butɔ, n si i tantu le mamadɛn banba tɔ,
n ni i matɔgɔ jama siyama tɛma.
19Minnu be n jaguyaren tɔɲɛgɛ butɔ, wonu kana sɛɛwa n kunma.
Minnu bata n kɔn kun bele min na, wonu kana anu ɲamakati n ma.
20Ee, kɔnɔ kɛnu te jususa kuma fɔ!
Anu be tola kɔnkɔnna le tun janfa kuma fɔ koe la kɛ jamanɛ mɔgɔ sabarireŋɛnu ma.
21Anu bata anu da laka n ma sɛnbɛ la.
Anu ko: «Iyɔɔ, mɔ be diren koe min ni a masɔtɔ, mɔ ɲan bata a yen mɔ ɲa la.»
22Ee Alatala ile bata a yen, i kana i mɔdɛ;
n Marige, i kana yanfaya n na.
23N na Ala, n Marige, i yɛtɛ lamaga i ni kunɛn,
i ni tɔɲa dii n ma, i ni n na ko fɔ.
24Ee Alatala, n na Ala, ile min telenta i ni n na kiite sa,
alako kɛ mɔgɛnu kana sɛɛwa n kunma.
25Anu kana a fɔ anu juse tɔ:
«Ee, mɔ be diren min ye, wolo mu kɛ la: mɔ bata a la ko tiɲa feu.»
26Minnu be sɛɛwala n na tɔɔrɛ la,
wonu bɛ ni malu anu ni kɔntɔfili.
Minnu be anu yɛtɛ tajiganna n kunma,
maluya nun fɛɛya ni dusu anu kunma.
27Minnu be sɛɛwala n na tɔɲa sɔtɔ koe la,
wonu ni anu kulɛ labɔɔ anu ni sɛɛwa ka ɲagalin,
anu ni to a fɔla wagate bɛ, ko:
«Ee, Alatala kolo,
min be sɛɛwala a la jondeŋɛ la hɛra sɔtɔ koe la.»
28Awa, n nɛŋɛ si i la teleŋɛ la ko fɔ le tele muru,
n ni i tantu lun go lun.
Currently Selected:
Jabura 35: MOG
Highlight
Copy
Compare
Share
Want to have your highlights saved across all your devices? Sign up or sign in
