Jabura 34
34
Alatala bata n bɔɔ n kilan koe bɛ tɔ
1Dauda to ka a yɛtɛ ma dakue la mansa Abimelɛki ɲala, alako a ni a boloka,#34:1 Samiyɛli, kitabu fɔlɛ fɛlɛ, sora 21 haaya 10-14. wo boloka tanbi kɔma, Dauda ka kɛ beete bɔɔ.
2N si Alatala batu wagate bɛ;
a tantu koe si to n da tɔ wagate bɛ.
3N si Alatala matɔgɔ n juse tɔ,
tɔɔrɔbaganu si na wo mɔɛ, anu ni sɛɛwa.
4Ee, wole nun nde ni Alatala biliya.
Wo mɔ ni a tɔgɛ lakoloya.
5N ka Alatala mataran a nata n jaabi,
a ka n na kilaŋɛ bɛ bɔɔ n ma.
6Minnu ka anu ɲa sɔ Alatala la, anu nɔɔrɔta;
anu te malu abada.
7Ka nde tɔɔrɔbaga ka n kulɛ labɔɔ, Alatala ka wo mɔɛ;
a si n nakisi le, a ni n bɔɔ wo tɔɔrɛ bɛ tɔ.
8Alatala la maleka be Ala ɲalakilannanu lamilinden,
a be anu kantala alabalawɛ ma.
9Ee, wo a fɛlɛ ba Alatala kaɲin!
Hɛra be mɔgɛ ye, min be tangare ɲinila a la.
10Wo kilan Alatala la, wole a la saniyanbaganu,
bayi ka minnu kilanta a la, anu te fo fenfen na.
11Jata deŋɛ si nɔ fola feŋɛ la a ni tɔɔrɔ kɔnkɛ la,
kɔnɔ Alatala ɲinilá kan te fo fenfen ɲinma la.
12N na deŋɛnu, wo na, wo ni wo tolomasɔ n kulɛ la.
N ni wo lakaran Alatala ɲalakilaŋɛ la.
13Simaya yanfama sɔgɔ be ɲɔmɔ le la?
Ɲɔmɔ le be diren tola sɛɛwa tɔ wagate bɛ?
14Awa, fɔ i ni mɛnni i da le ma, i kana kuma koron fɔ,
ka wo ma janfa kuma.
15Wo ni bɔɔ ko koroŋɛ kɔma, wo ni ko ɲinma le ma.
Wo ni jususa ɲini, wo ni sɔ wolo kɔma.
16Alatala ɲa be telenbaganu la,
a tole be anu diri kulɛ la.
17Alatala be a kɔ sɔren ko koron malanu la,
alako a ni anu tɔgɛ lamuttɛ duge kunma.
18Telenbaganu minnu ka anu kulɛ labɔɔ a ma, Alatala ka wonu kulɛ mɔɛ.
A ka anu lakisi, a ka anu bɔɔ anu la tɔɔrɛ bɛ tɔ.
19Alatala be mɔgɛnu kɛnna, minnu juse bata tɔɔrɔ,
a be mɔgɛnu lakisila, minnu juse bata makasa.
20Telenbaganu la tɔɔrɛ siyata,
kɔnɔ Alatala si anu lakisi le, ka anu bɔɔ anu la tɔɔrɛ bɛ tɔ.
21A ni anu kole bɛ mɛnni,
hali dɔndɔ te kati.
22Ko koroŋɛ le be ko koron malá fagala.
Minnu be telenbaganu kɔnna wonu si naa anu la junube sɔŋɛ sɔtɔ.
23Alatala la jondeŋɛnu, minnu be tangare ɲinila a la,
a si wonu kunka le, hali dɔndɔ te kiiti koroŋɛ sɔtɔ.
Currently Selected:
Jabura 34: MOG
Highlight
Copy
Compare
Share
Want to have your highlights saved across all your devices? Sign up or sign in
