Jabura 19
19
Ala be a la nɔɔra yitala a la daale tɔ anun a la sariya tɔ
1Dauda la beete do le ka, min be donden beeti bɔɔlanu la kuntige bolo.
2Sankole be Ala la nɔɔra ɲamakaranna;
saŋɛ be a bole la wale yitala.
3Tele be wo nɔɔra la ko fɔla lun go lun,
su yo su tugun be a yitala ɲɔgɔnna.
4Kuma bele, kumari kulɛ tugun bele;
tole te anu kulɛ mɔɛ.
5Anu la kibare nɔn be keren dunuya bɛ,
anu la kumari kulɛ be tagaren han dunuya daŋɛ tɔ.
Ala ka tanta sɔ tele ye saŋɛ tɔ.
6Ale tele be bɔɔla le iko jonba tige min be bɔɔren muse jiganna,
a ni naa bɔɔ a la konke tɔ;
a ni sɛɛwa iko sɛnbɛ tige tini be borila kila tɔ.
7A bɔɔ dula be fɔlɔla tele yɛlɛ tɔ;
a ni taga a la tagamaŋɛ laban tele jige tɔ.
Fenfen te nɔ dogonna a wuyeŋɛ la.
8Alatala la sariya be kamaliren de, a si mɔgɛ lalimaniya.
Alatala la seedeɲɔgɔya mu lannanteya kuma yati le la; min si hakkilimaya dii lɔnnibalenu ma.
9Alatala la malasi kuma telenta, a si mɔgɛ juse lasɛɛwa.
Alatala la yamɔre beta, a si mɔgɛ ɲanu latense le.
10Alatala la ɲalakilaŋɛ, ko saniyandeŋɛ le mu wo la, a si mɛ kudai;
Alatala la kiiti sa kumanu mu tɔɲa le la, anu bɛ be telenden gbelen.
11Anu munanfaŋɛ kolo tanbi sanuɛ la, hali sanu ɲinma banba.
Anu di kumɛ ko, hali kumu je min be bɔɔren burundula kumu lenbe tɔ.
12Nde i la walilá yɛtɛ tugun bata lasii wonu la,
baraji banba si sɔtɔ wonu bita koe la.
13Kɔnɔ ɲɔmɔ le si a la tantaŋɛnu lɔn?
Wo butɔ, i ni n na junubenu kafari, nde bele minnu talɔnden.
14I ni nde i la walilá latanga teunteya junube tugun ma,
wonu kana nɔ sɔtɔ n ma.
Wo butɔ, n si ma mɔgɔ telendeŋɛ la,
junube banba te to n ma.
15N be i mataranna: kuma min be bɔɔla n da tɔ,
anun kuma min be n juse tɔ,
i ni wo jigan n ɲɛ ɲagaliŋɛ la.
Alatala, ile le mu n na fata la, anun n kunkalá!
Currently Selected:
Jabura 19: MOG
Highlight
Copy
Compare
Share
Want to have your highlights saved across all your devices? Sign up or sign in
