Jabura 18
18
Ala sɛnbɛ matɔgɔ beete
1Alatala la jondeŋɛ Dauda la beete do le ka, min be donden beeti bɔɔlanu la kuntige bolo. Dauda ka kɛ beete le bɔɔ Alatala ye, a to ka a lakisi Sayulu nun a jaguenu bɛ ma.
2Ee Alatala n sɛnbɛ mu ile le la, n bata i kanu.
3Alatala le mu n na fata la,
Alatala mu n na tatta la,
anun n nakisilá la.
A mu n na Ala la, a be toren iko fanmɛ, n be dogonna min butɔ alako n ni makanta.
A be toren n ɲɛ iko nɛgɛ lefa min be n makantala kɛlɛ tɔ.
A mu n sɛnbɛ la min be n nakisila,
n na sabati dula ɲinma min be n makantaren.
4Tantue be Alatala ye! Ka n be n kulɛ labɔɔla a ma,
a si n nakisi le n jaguenu ma.
5Saya jule bata n namilin nun;
a bata n makilan iko mɔrɔŋɛnu minnu be dusula n kunma.
6Faga jule bata n nakiti nun,
faga jala bata lafonti n ɲatɔ nun.
7N na tɔɔrɛ butɔ, n bata Alatala kele,
n bata n kulɛ labɔɔ n Marige Ala ma.
A nata n kulɛ mɔɛ a la hɔrɔma boŋɛ tɔ;
n be diri kulɛ min nayɛlɛla a ma, a ka wo mɔɛ.
8Duge naata lamaga, ka sɛrɛn.
Kɔnkɛnu kɔtɔ tugun namagata ka sɛrɛn,
Ala la dumɛ sabu la.
9Wo dumɛŋɛ butɔ, a be siise labɔɔla a suŋɛ tɔ;
ta be bɔɔla a da tɔ, anun ta kenbue la, ka tiɲare ma.
10A ka san walaka laɲɛngɛn,
a jigita kisanna, luuture bilima be a kɛn kɔtɔ.
11Wo jige butɔ, a be a majigiren maleka kunma,
wo ka a doni a gabataŋɛnu la; anu be tagamanna fɔɲɛ la.
12Dibe min be a la miliŋɛ tɔ, a ka a yɛtɛ to wo butɔ.
Sangi ji fiŋɛ nun luuture finma be a lamilinden.
13Sangi malaŋɛ tota a ɲatɔ luuture tɔ,
sangi kure nun ta kenbue jigita.
14Alatala ka balamantaŋɛ kulɛ labɔɔ saŋɛ tɔ;
Ala min mayɛlɛta, a ka a kulɛ labɔɔ.
Sangi kure nun ta kenbue tugun jigita.
15A ka a la ndakanu fili, a ka a jaguenu malansan;
a ka anu bee le sangi malaŋɛ siyama la.
16Ee Alatala, ba kɔtɔ bɔɔta kɛnɛ tɔ,
duge kɔtɔ bata makɛnɛn,
i la foofe sɛnbɛ la ko la
anun i la dumɛ kuma la ko la.
17Wo butɔ, a ka a bole lafonti bɔɔla saŋɛ tɔ, a ka n jigan.
A ka n bɔɔ ji banbanu tɔ.
18A ka n nakisi n jague sɛnbɛ ma,
anun minnu be n kɔnden, bayi wonu sɛnbɛ kolo nde ko.
19N be yigitɛgɛ tɔ lun min na, anu nata n digii ma,
kɔnɔ Alatala mata n dɛmanná la.
20A to be n kanuren, a ka n nakisi;
a ka n to dula yiriwareŋɛ tɔ.
21Alatala bata n baraji n na teleŋɛ la ko sabu la;
a bata n sɔŋɛ dii n na ko saniyandeŋɛ la ko sabu la.
22Iyon, n ka Alatala la kila le biliya nun,
wolo mu n ma junubu ko ma n ni bɔɔ n na Ala kɔma.
23A la sariya bɛ be n ɲakɔtɔ,
n bele bɔɔla a la yamɔrenu kɔma.
24N telenta a ye,
n ka n yɛtɛ mɛnni junubu koe bɛ le ma.
25Wolo mu Alatala ka n sɔŋɛ dii n na teleŋɛ la ko sabu la.
N na wale to saniyanta a ɲakɔtɔ, wolo mu a ka n sɔŋɛ dii a ɲinma la.
26Mɔgɛ min tini to i la ko tɔ,
ile tugun be i la lannanteya yitala wo tigi le la.
Mɔgɛ min ma ma filankafue la i mafanna,
ile tugun te i la lahire tiɲa wo tigi ye.
27Mɔgɛ min saniyanta i ɲala,
ile tugun be i la saniyaŋɛ yitala wo tigi le la.
Mɔgɛ min be i makalabanteyala,
ile tugun si a yita le a la ka a fɔla i keu a ko.
28Iyon, i si mɔgɔ majigireŋɛ lakisi le,
kɔnɔ i si fan nakoloyalanu kan majigi le.
29Ile Alatala le be n na lanpue labitala.
N Marige Alatala le be dibe lakɛnɛla n ɲɛ.
30Ka i be n kɔma, n te kilan sɔɔri kuruŋɛ yo la.
Ka n Marige Ala be n kɔma, n si suusɛ le tunna tatta kunma.
31Ala la kila kamalita.
Alatala la kuma saniyanta.
A mu kantare le la mɔgɛ ye min be a yɛtɛ taakula a la.
32Ɲɔmɔ le mu Ala la, bɔɔ Alatala la?
Ɲɔmɔ le mu ibunadama la fata la, bɔɔ mɔ Marige Ala la?
33Ala, min be n tɛ takitila sɛnbɛ dii koe la n ma,
min be n na kila lakamalila n ɲɛ.
34A ni n kɛŋɛnu ma iko minaŋɛ kɛŋɛnu be ki min na,
a ni n sɔ dula toireŋɛ kunma.
35A be n degenna kɛlɛ maɲa la,
alako n bole ni kala silanɛŋɛ bannɛ.
36I bata i la kise min dii n ma, wo be n makantaren;
i ka i bolo ɲinma lasori n kɔtɔ.
I to jigita n dɛman koe la, i bata n sɛnbɛ lakoloya.
37I ka n natagaman kila yiriwareŋɛ tɔ,
n kɛŋɛnu bele surunna kila tɔ.
38N be n jaguenu jokkila le han n ni anu take.
N te bɔɔ anu kɔma fɔ anu ni ban halagila feu.
39Anu ni boe n kɛn kɔtɔ;
n ni anu botege han anu ni to anu te nɔ wulila.
40I bata n tɛ takiti sɛnbɛ la kɛlɛ ma koe la;
minnu wulita n digii ma, i bata wonu majigi n kɛn kɔtɔ.
41I be n jaguenu beela le n ɲatɔ,
n ni n kɔnnɛlanu lasama.
42Anu ni di, kɔnɔ mɔgɔ yo te sɔtɔ min si anu lakisi;
anu ni anu kulɛ labɔɔ Alatala ma, kɔnɔ a bele anu jaabila.
43N ka anu botege ka anu muɲunkun,
han anu tota iko banbaŋɛ, fɔɲɛ si min doni.
N ka anu matɛn iko bɔra min be kila tɔ.
44I bata n nakisi mɔgɛnu la sɔsɔre ma;
i naata n ma jamanɛnu la mansa la.
N ɲan ma seenu minnu lɔn nun, wonu bata to n sagoe tɔ.
45Anu ka n na ko mɔɛ wagate min tɔ, anu ka n kulɛ bita kisanna.
Luntaŋɛnu nata kuma diyama fɔdula n ɲɛ.
46Sii gbɛtɛnu ma suusɛ n na,
anu sɛrɛndeŋɛ bɔɔta anu la tattanu butɔ kilaŋɛ la.
47Kise be Alatala ye, tantue be n na fata ye,
a tɔgɛ ni matɔgɔ, ale Ala min be n nakisila.
48Tantue be Ala ye min be n tɛŋɛ yɔgɔla,
min be seenu tola n sagoe tɔ,
49min ka n natanga n jaguenu ma.
Iyon, ile le ka n mayɛlɛ wonu kunma,
i ka n nakisi kɛ nanbaratɔɛnu ma, minnu be wulila nun n digii ma.
50Wolo mu n be ile Alatala matɔgɔla seenu tɛma!
N be beete bɔɔla i tɔgɛ la.
51Alatala bata malakisi banba ma a la mansa masubɛreŋɛ ye,
a ka kanunteya yita a la mɔgɔ masubɛreŋɛ Dauda nun a bɔnsɛ la abada.
Currently Selected:
Jabura 18: MOG
Highlight
Copy
Compare
Share
Want to have your highlights saved across all your devices? Sign up or sign in
