Jabura 141
141
Wura la Ala mataraŋɛ
1Dauda la beete do le ka.
Alatala, n bata i taran, na teriya la n kɛnna!
N to be n kulɛ labɔɔla i ma, i ni i tolomasɔ a la.
2N na mamataraŋɛ ni yɛlɛ i ɲakɔtɔ iko sorayi bintan siise,
n na bolo mayɛlɛ tugun ni to iko wura la sarika.
3Alatala, n da makanta,
i ni mɛnni n dabole ma, n kana tana fɔ.
4I kana sɔn n juse ni a kun sɔ kuma koron yo la,
ka wo ma n ni don wali koroŋɛnu ma koe tɔ, mɔ nun mɔgɛnu minnu si telenbaliya ma.
N kana basan anu fɛ dɔmɔre ma dula anun anu la sale ɲagaɲaga tɔ.
5Hali mɔgɔ telendeŋɛ ka n botege, kun nadiya le mu n ɲɛ wo la.
Ka a ka ko koroŋɛ fɔ n kunma, labundɛ le mu wo la n bale ma.
N bale te balan wo koe la.
Hali mɔgɛnu be ko koroŋɛ mala n na,
n na Ala mataraŋɛ kan te dan.
6Anu la kiiti salanu bata sɔnsɔn fatanu tɔ.
Mɔgɛnu si n na kumanu kan mɔɛ le, bayi anu di.
7Mɔ kolenu be malansanden gabure da la le
iko duge min be magurubaren, anu ka a lafara.
8Marige Alatala, n be n ɲamatelenden ile le ma,
n be tangare ɲinila ile le dula.
I kana n nɛ boloka.
9I ni n natanga anu la julenu ma, anu be minnu yɛlɛren n ɲatɔ.
N nakisi ko koron malanu ma minnu be n masakkɛla.
10Ala mu a mala, mɔgɔ koroŋɛnu ni bita anu la julu yɛlɛreŋɛnu tɔ,
wo wagate nde ni kisi.
Currently Selected:
Jabura 141: MOG
Highlight
Share
Compare
Copy
Want to have your highlights saved across all your devices? Sign up or sign in
