Jabura 140
140
Ala mataran beete malatanga la nanbaratɔɛnu ma
1Dauda la beete do le ka, min be donden beeti bɔɔlanu la kuntige bolo.
2Alatala, n bɔɔ mɔgɔ koroŋɛnu bolo!
I ni n makanta nanbaratɔɛnu ma,
3minnu be ko koroŋɛnu ma koe mirala anu juse tɔ.
Anu be kɛlɛ lawulila lun go lun.
4Anu be anu nɛŋɛ ladiyala iko kaa.
Kuma minnu be bɔɔla anu da tɔ, anu dumɛnta iko bida la mara.
Beeti bɔɔlá la suleŋɛ donden.
5Alatala, n natanga mɔgɔ koroŋɛnu kana nɔ sɔtɔ n ma.
I ni n makanta nanbaratɔɛnu ma
minnu be anu mirala n naboe koe la.
6Fan nakoloyalanu be jule yɛlɛla n ɲatɔ gundo tɔ,
anu be jalanu lafontiren n na kilanu tɔ,
anu be n masakkɛla kila fɛfɛnu tɔ.
Beeti bɔɔlá la suleŋɛ donden.
7N ko Alatala ma: «N na Ala le mu i la!
Alatala, i tolomasɔ n na mamadenu la.
8N Marige Alatala, n nakisilá sɛnbɛma,
kɛlɛmafeŋɛnu be jiganna lun min na, ile le be n kunmakɛlɛ mala.
9Alatala, i kana a to mɔgɔ koroŋɛnu diyanankoe ni ma anu ye,
i kana a to anu la natá ni lakamali anu ye,
alako anu kana wasu!»
Beeti bɔɔlá la suleŋɛ donden.
10Minnu be n kɛlɛla n na miliŋɛ tɔ,
anu be gbaloe min na ko fɔren anu da tɔ, wo ni dusu ande le yati kunma!
11Ta kenbue ni bɔn anu ma.
I ni a ma ka anu latuntun ta tɔ,
anu ni boe dinka luggɛreŋɛnu butɔ,
anu te yɛlɛ ka min na bitugun.
12Nafige te sabati dunuya.
Tɔɔrɛ si nanbaratɔɛ bee le han a ni halagi feu.
13N ka a lɔn Alatala si misikinɛ la kiite sa le,
a ni fugare la tɔɲa don a bolo.
14Iyon, telenbaganu si i tɔgɛ tantu le.
Mɔgɔ telendeŋɛnu si to le i ɲakɔtɔ.
Currently Selected:
Jabura 140: MOG
Highlight
Share
Compare
Copy
Want to have your highlights saved across all your devices? Sign up or sign in
