Jabura 109
109
Tɔɔrɔbaga la da ladire
1Dauda la beete do le ka, min be donden beeti bɔɔlanu la kuntige bolo.
Ee Ala, n be ile min na ko beete bɔɔla, i kana i mɔdɛ feu,
2bayi anu bata anu da koroŋɛnu laka n ma, anu wo janfante da.
Anu be kumala n ɲɛ foniya la anu da tɔ.
3Anu be n namilinna kɔnnɛnteya kumanu la.
Anu be n kɛlɛla kun bele a la.
4Hali nde to be kanunteya yitala anu la, ande be n tɔɲɛgɛla.
Kɔnɔ nde hakkile be sɔren Ala mataraŋɛ le ma.
5Anu ka n na wali ɲinma sɔŋɛ dii a koroŋɛ la,
ka n na kanunteya sɔŋɛ dii kɔnnɛnteya la.
6Mɔgɔ koroŋɛ ni wuli a kɛlɛ koe la,
a tɔɲɛgɛlá ni sɔ a bolo ɲinma tɔ!
7A tini makiiti, kiite ni tiɲa a la!
A la mamataraŋɛ ni ma a ye junube la!
8A la simaya ni wutuya,
mɔgɔ do ni a sɔdula jigan!
9A la deŋɛnu ni ma aliyatimɛ la,
a la muse ni ma furuɲa muse la!
10A la deŋɛnu ni to miligimalagala,
anu ni ma manjallaji bɔɔlanu la.
Anu ni taga tarile ma dula tɔ, min yanfata anu la bon jɔnjɔndeŋɛnu la!
11Dɔntɔ tige ni a kɛɛ bɛ jigan,
luntaŋɛnu tugun ni tugu a bolofeŋɛnu la, a tɔɔrɔta min sɔtɔ koe la!
12Mɔgɔ yo kana hanige ɲinmaya mandi a ye,
mɔgɔ yo kana kinikini a la aliyatimɛnu ma!
13A juruyanu ni ban dunuya,
anu tɔgɛnu ni ban ɲatɔ bɔnsɛnu ɲaama!
14Alatala ni a benbanu la tantaŋɛnu talɔn,
a nɛɛnɛ tugun na junubenu kana kafari!
15Wo tantaŋɛnu nun junubenu ni to wagate bɛ Alatala ɲakɔtɔ.
A ni anu tɔgɛ la ko mira ban duge kunma.
16Bayi kɛ mɔgɛ hakkile bele a ma a ni hanige ɲinmaya ma,
a be ɲagankata sigila misikinɛnu nun fugarenu ma,
han a ka mɔgɔ limaniya bale faga.
17Dankare di a ye: a ɲan bɛ ni saagi a ma!
Duba koe ma di a ye: barikɛ tugun ni yanfaya a la!
18Danka ni lajigi a ma iko a la doroke,
a ni don a kolenu tɔ iko tule,
a ni don a sɔranu tɔ iko je!
19A ni to a ma, iko doroke min be a bale matagunna.
A ni to a ma iko a be bɛlɛte min kitila a tɛ ma lun go lun!
20Alatala be n tɔɲɛgɛlanu sɔŋɛ diila ɲɔgɔnna le,
minnu be ko koroŋɛ fɔla n kunma!
21Marige Alatala, yandi, i ni a ma n ɲɛ i tɔgɛ la ko la.
Bayi i la fonisireya kolo, i mɛn kaɲin, awa n nafulen!
22Misikinɛ nun fugare le mu n na,
n juse be n dumɛnna n butɔ.
23N be banna le iko wura la niiniŋɛ tini don,
anu be n beela iko tugumɛ.
24N kunbeleŋɛnu be sɛrɛnna n to ma n daɲini,
n bale bɛ bɔɔta n ma, n be bararen.
25Anu be maluya dusula n kunma:
anu tini n yen anu be anu kuŋɛnu le linlanna mamayoe la.
26Alatala, n na Ala, na n dɛman!
I la fonisireya kolo, awa n nakisi!
27Anu ni a lɔn
ile Alatala le be wo maren i sɛnbɛ la.
28Anu si nɔ dankare mala, kɔnɔ ile ni wo ma barikɛ la.
Ka anu wulita, maluya le be naala dusula anu kunma.
Nde i la jondeŋɛ kan, n ɲan be sɛɛwaren tun.
29N tɔɲɛgɛlanu, anu ni to mafuren;
anu la maluya ni lajigi anu ma doroke la!
30N si Alatala tɔgɛ tantu le n kulɛ mayɛlɛreŋɛ la,
n si a matɔgɔ le jama banba tɛma.
31Bayi ale le be sɔren fugare bolo ɲinma tɔ a dɛman koe la,
a ni a bɔɔ mɔgɛnu bolo minnu be diren a lajarabila kiite tɔ.
Currently Selected:
Jabura 109: MOG
Highlight
Share
Compare
Copy
Want to have your highlights saved across all your devices? Sign up or sign in
