Jabura 107
107
Ala tantu beete a la jama lakisi koe tɔɔrɛ ma
1Wo Alatala tantu, bayi a kaɲin!
Dan bele a la fonisireya la.
2Alatala ka minnu kunka, anu ni a fɔ ɲɔgɔnna;
a ka minnu kunka a ka anu bɔɔ anu jaguenu bolo,
3anun a be minnu natiren kabɔɔ jamanɛnu butɔ,
tele yɛlɛ nun tele jigi, bolo mara nun bolo ɲinma tɔ.
4Anu be yilɛla janfue tɔ, anu be tagamanna dula mabalareŋɛ tɔ,
anu ma saa yo yen anu si nɔ sabatila ka min na.
5Kɔnkɛ nun ji sɔgɛ be anu halagila;
anu yigitɛgɛta.
6Anu la wo tɔɔrɛ butɔ, anu ka anu da ladi Alatala ma,
a ka anu lafulen anu la ɲagankata tɔ.
7A ka anu doni kila telendeŋɛ tɔ,
anu ni ke saa tɔ anu si nɔ sabatila ka min na.
8Anu ni Alatala tantu a la fonisireya la,
anun a bata kabanakoe minnu ma adamadeŋɛnu ye!
9Bayi ji sɔgɛ be minnu la, a bata wonu lawasa;
a bata kɔnkɔbaganu nɛɛ lafa ko ɲinma la.
10Donu be sabatiren nun dibe le tɔ anun faga niiniŋɛ kɔtɔ
geele bɛlɛma tɔ, jɔlɔnkɔŋɛ be anu la,
11bayi anu bata murutɛ nun Ala la sariya ma;
Ala min mayɛlɛta, anu bata a la malase bɔtɛ boe.
12Bɛlɛya sabu la, a ka anu lamalu.
Anu be jingijangala, mɔgɔ bele min si anu dɛman.
13Anu la wo tɔɔrɛ butɔ, anu ka anu kulɛ labɔɔ Alatala ma,
a ka anu lakisi anu la ɲagankata ma.
14A ka anu labɔɔ dibe nun faga niiniŋɛ tɔ,
A ka anu kiti jule kuntu.
15Anu ni Alatala tantu a la fonisireya la,
anun a bata kabanakoe minnu ma adamadeŋɛnu ye!
16Bayi a bata taasa bonda tiɲa,
ka bonda balanfeŋɛ nɛgɛnɛŋɛnu kuntu.
17Donu mata hakkilibɔnɛ la anu la junubenu nun anu la wali koroŋɛnu sabu la
han anu tota kɔntɔfile tɔ.
18Dɔmɛ bɛ be sɛɛyaren anu jɔkɔlɛ ye,
anu ɲan be keren faga le da tɔ.
19Anu la wo tɔɔrɛ butɔ, anu ka anu kulɛ labɔɔ Alatala ma,
a ka anu lakisi anu la ɲagankata ma.
20A ka a la kuma lasanba anu ma anu lakendeya koe la,
ka anu latanga gaburu tɔ sa ma.
21Anu ni Alatala tantu a la fonisireya la,
anun a bata kabanakoe minnu ma adamadeŋɛnu ye!
22Anu ni sarikanu bɔɔ Alatala la walisa koe la,
anu mɛn ni a la wali ɲinmanu tafɔ sɛɛwa sɔnkɔ layɛlɛ butɔ!
23Donu be biyasila ba tɔ kuluŋɛ butɔ,
anu be julaya mala ji banbanu kunma.
24Wonu ka Alatala la walenu yen de,
anun a la kabanakoenu ji luggɛreŋɛnu tɔ.
25A to kumata, fɔɲɔ banba wulita,
wo ka mɔrɔŋɛnu lamaga.
26Anu la kuluŋɛ be tajiganna le kantɔ mafanna,
a mɛn ni jigi han ji fole tɔ.
Anu be gbaloe le tɔ nun han anu yigitɛgɛta.
27Anu jingijangata anu tota iko siisilanu.
Anu la kata bɛ tota anu ma fu.
28Anu la wo tɔɔrɛ butɔ, anu ka anu da ladi Alatala ma,
a ka anu bɔɔ anu la ɲagankata tɔ.
29A ka fɔɲɔ banba masara fɔɲɔ lakarareŋɛ la,
mɔrɔŋɛnu lakarata.
30Anu sɛɛwata ba la wo malakara la,
Alatala ka anu doni bakkidala anu be diren ka min ye.
31Anu ni Alatala tantu a la fonisireya la,
anun a bata kabanakoe minnu ma adamadeŋɛnu ye!
32A la koloya la ko ni fɔ jama madɛndeŋɛ tɔ.
Kayibanu ka mabɛŋɛ ma kan do kan, anu ni biliya dii Ala ma!
33A si nɔ kɔɛɛnu masarala janfue la,
a ni kɔɔ kuŋɛnu ma dugu balanu la.
34A si nɔ dugu ɲinma mala dugu kɔɔkɔ nɛŋɛ la,
ɲɔ dugu tɔ kaanu la koronya la ko la.
35A si nɔ janfue masarala dalanu la,
a ni kan balanu ma kɔɛɛ kuŋɛnu la,
36a ni kɔnkɔbaganu lasabati ɲɔ,
anu ni saa sɔ ɲɔ anu ni sabati a tɔ.
37Anu si sɛnɛ sa ɲɔ, anu si rɛsɛn lɔgɛ tugun ki,
minnu si wolé barikɛreŋɛ labɔɔ.
38A si barikɛ sa anu la ko tɔ, anu ni siya koola.
A te fenfen bɔɔ anu la kolofeŋɛnu la.
39Ka jaguenu be anu tɔɔrɔla, gbaloe nun suunɛ ka anu mabutin,
han anu ni dɔgɔya, anu ni to ɲa gbaaren,
40wo wagate Alatala be kunnaɲakue dusula sɔdula tigenu kunma,
a ni anu ma yilɛ mɔgɛnu la dula labolokareŋɛ tɔ kila bele ka min na.
41Kɔnɔ a be fugarenu bɔɔla le tɔɔrɛ tɔ,
a ni anu la denbayanu lasiya iko kolofeŋɛnu.
42Telenbaganu tini wo yen anu be ɲagalinna le,
kɔnɔ telenbalenu bɛ da be balanna le.
43Mɔgɛ min yo mu hakkilima la, a ni a hakkili to wo koenu ma,
a mɛn ni a mira a ɲinma la Alatala la fonisireya la.
Currently Selected:
Jabura 107: MOG
Highlight
Share
Compare
Copy
Want to have your highlights saved across all your devices? Sign up or sign in
