Jabura 106
106
Bani Isirayila la telenbaliya anun Alatala la hinnɛnteya
1Wo Alatala tantu!
Wo Alatala la wali sa, bayi a kaɲin!
Iyon, a la hinnɛnteya te ban abada!
2Ɲɔmɔ si nɔ Alatala la wali sɛnbɛmanu bɛ ɲa bɔɔla?
Ɲɔmɔ si nɔ a la tantue bɛ fɔla?
3Hɛra be mɔgɛnu ye minnu be sariya labatula,
minnu be ko telendeŋɛnu mala lun go lun!
4Alatala, i la hɛra ɲamatelen wagate i la jama ma,
i ni n na ko talɔn.
I tini be a lakisila,
i ni hinnɛ n na.
5I tini wo ma, n si kunnadiya sɔtɔ le
iko i la mɔgɔ masubɛreŋɛnu;
n si n maɲaga le i la jama la ɲagaliŋɛ butɔ;
jama min be maren i tɛŋɛ la kudai, n si sɛɛwa le anu ɲaama!
6Mɔ bata junubu koe ma iko mɔ benbanu,
mɔ bata ko koroŋɛnu ma, mɔ bata ma junubutɔɛnu la.
7Mɔ benbanu to be nun Misira duge tɔ,
anu ma i la kabanakoenu talɔn.
I ka min bɛ ma i la hinnɛnteya butɔ,
anu ma anu hakkile to a ma.
Anu murutɛta le Kulunyuma ba dala.
8Kɔnɔ a ka anu lakisi le a tɔgɛ la ko la,
alako a ni a sɛnbɛ yita.
9A fatiyata Kulunyuma ba ma, han a balata.
A ka anu latɛgɛ a bɔtinɛ tɔ iko janfue butɔ.
10A ka anu lakisi ka anu bɔɔ mɔgɛ bolo min be anu kɔnden.
A ka anu kunka, a ka anu bɔɔ anu jaguenu bolo.
11Je dusuta anu jaguenu bɛ kunma
hali mɔgɔ dɔndɔ ma to wonu tɛma.
12Wo butɔ, anu laata Ala la kuma la,
anu ka a tantu beetenu bɔɔ.
13Kɔnɔ koe min be bɔɔren mala, anu ɲinata wo la teriya la.
Alatala be min nagiriren anu ye, anu ma a to anu ni wo kɔnɔn.
14Anu to be janfue tɔ, anu miilata koenu ma minnu bele anu bolo,
anu ka Ala laɲini janfue tɔ.
15Anu ka min bɛ maɲininka, a ka a bɛ don anu bolo;
wo kɔma a ka bandiya lasanba anu ma min ka anu bale bɔɔ anu ma.
16Anu ka Musa tɔɔnɛ daaka tɔ,
anun Alatala be Harona min kɛrɛkɛrɛren.
17Duge lakata, a ka Datan kunun,
wo butɔ a ka Abiramu gale bɛ mabutin.
18Ta tuguta anu la mɔgɛnu bɛ la,
ta yore ka wo mɔgɔ koroŋɛnu bɛ bintan gbikki.
19Anu ka tuuradeŋɛ misale ɲiɲa Hɔrɛbi kɔnkɛ tɔ,
anu sujuduta wo nɛgɛ lakunɛndeŋɛ ye.
20Alatala min be maren anu la kunnawule la,
anu ka wo masara ningi tuura misale la, ningi ɲagama dɔmɔlá!
21Anu ɲinata anu lakisilá Ala ma,
min ka ko banbanu ma Misira,
22Ala min ka kabanakoenu ma Hima la duge tɔ,
a ka dabala ma Kulunyuma ba tɔ.
23A kumata, aa a ni anu la ko lamɔdɛ,
kɔnɔ a la mɔgɔ masubɛreŋɛ Musa,
wolo wulita a ka jɛjɛre sa anu ye Ala ɲakɔtɔ
alako a la dumɛ ni yɔntɔn,
a kana anu halagi.
24Anu balanta Alatala la dugu ɲinma labitala,
anu ma laa a la lahire la.
25Anu tota kuma mɛsɛŋɛnu mafɔla anu la tantanu kɔtɔ,
anu ɲan bele anu tolomasɔren Alatala kulɛ la.
26Wo butɔ, a ka a kali
a ni anu faga janfue tɔ,
27a ni anu juruya tugun na ko lamɔdɛ jamanɛnu tɛma,
a mɛn ni anu malansan jamanɛnu tɛma.
28Anu kitita Baali Peyori kuye batu koe la,
anu ka sarika sube dɔmɔ min be bɔɔren furenu ye.
29Anu waliɲa ma, anu ka Alatala ladumɛn,
masibɔɛ do boeta anu tɛma.
30Finehasi wulita a ka wo koe tabɛn,
wo kɔma masibɔɛ danta.
31Ala bata wo jigan a ye wali telendeŋɛ la
bɔɔla bɔnsɔ han bɔnsɔ, kudai.
32Anu ka Alatala ladumɛn de Meriba ji bula dula.
Wo mata ko koroŋɛ la Musa ye anu la ko la,
33bayi anu to murutɛta a ma ɲɔ,
wolo ka a ma, Musa dumɛndeŋɛ kumata, a ma a mira.
34Anu ma Kanana kaanu la ko lamɔdɛ
iko Alatala ka anu tindinɛ ki min na nun.
35Anu basanta wo jamanɛ mɔgɛnu fɛ,
anu ka wonu la koenu maɲanu madegen.
36Anu ka wonu la kuyenu batu,
wo kuyenu mata anu ye julu yɛlɛreŋɛ la.
37Anu ka anu la den kayireŋɛnu dii wonu ma sarika la,
ka anu la den musereŋɛnu dii wo foniya alanu ma.
38Minnu bele koko koron maren, anu ka wonu base bɔn duge tɔ:
anu ka anu la deŋɛnu base dii le sarika la Kanana kaanu la kuyenu ma,
duge manɔgɔta nɛɛ bɔɔ koe la.
39Anu la saniyaŋɛ kun natiɲata anu wali ɲanu la.
Anu to ka ko koroŋɛ ma, anu bata lannanteya tiɲa anu nun Ala tɛma.
40Alatala la dumɛ koloyata a la jama ma,
a ka jama min ma a tɛŋɛ la nun, wo la ko sɛɛyata a ye.
41A ka anu to sii gbɛtɛnu sagoe tɔ,
minnu be anu kɔnden wonu ka nɔ sɔtɔ anu ma.
42Anu jaguenu ka anu jihadi,
anu maluta wonu bole tɔ.
43Kunɲama siyama Ala be anu lafulenna;
kɔnɔ anu be anu la murutɛ le tun yitala Ala la wagate bɛ.
Anu be do le tun sala anu la ko koroŋɛ kunma.
44Alatala ka anu la ɲagankata yen min be sigiren anu kunma.
A to ka anu la mamade mɔɛ,
45a ka a mira a la lahire la, a ka min jigan anu ye nun.
A la hinnɛnteya to kolo, a diɲata anu ma.
46Minnu bɛ be anu bitaren jonya la,
a ka anu la ko kinikinɛ sa wonu juse tɔ.
47Ee, Alatala, mɔ la Ala, i ni mɔ lakisi!
I mɛn ni mɔ bɔɔ jamanɛnu tɛma ka mɔ madɛn,
alako mɔ ni i tɔgɔ saniyandeŋɛ tantu,
mɔ mɛn ni mɔ wasu i tantu koe la.
48 Mamatɔgɛ be Alatala ye, bani Isirayila Marige Ala
ka bɔɔ hau han kudai!
Jama bɛ ni a fɔ: «Amina!
Wo Alatala tantu!»
Currently Selected:
Jabura 106: MOG
Highlight
Share
Compare
Copy
Want to have your highlights saved across all your devices? Sign up or sign in
