Jabura 103
103
Alatala tantu
1Dauda la beete do le ka.
N ni Alatala tantu n nɛ bɛ la!
N ni a tɔgɔ saniyandeŋɛ tantu n juse bɛ la!
2N ni Alatala tantu n nɛ bɛ la,
n kana ɲina a la wali ɲinma hali dɔndɔ la!
3Ale le si i la junube bɛ kafari,
a ni i la bandiya bɛ lakendeya,
4a ni i latanga i kana gabure sɔtɔ wo tɔ.
A ni daula dii i ma, ka i kanu, ka kinikini i ma,
5a ni i majabu ko ɲinma siyama la,
a ni i lasaagi fonikeya tɔ
han i sɛnbɛ ni to iko sinbin banba.
6Alatala be kiiti telendeŋɛ sala,
a ni tɔɲa dii mɔgɛnu bɛ ma anu be minnu tɔɲɛgɛla.
7A ka Musa lalɔn a la kilanu la,
a ka a la wali makaabɛreŋɛnu yita bani Isirayila kaanu la.
8Alatala kinikinita, a mɛn hinnɛta,
a te dumɛn teriya la, a la kanunteya dan bele.
9A te mɔgɛ bita a la tiɲare la wagate bɛ,
a te to dumɛnden abada!
10A te mɔ bita mɔ la junubu koenu la
iko mɔ bɛnta bitala ki min na;
a te mɔ sɔn dii mɔ la tiɲarenu la
iko mɔ bɛnta a sɔtɔla ki min na.
11A la kanunteya be koloyaren de a ɲalakilannanu ye
iko saŋɛ nun duge tɛma be ki min na.
12A be mɔ la junube mareŋɛnu layanfayala mɔ la,
iko tele yɛlɛ nun tele jige be yanfayaren ɲɔgɔn na ki min na.
13Alatala be kinikinila a ɲalakilannanu ma,
iko baaba si kinikini a la deŋɛnu ma ki min na.
14Ale ka a lɔn yati mɔ be daren min na:
a be a lɔnden mɔ mu bangue tun de la.
15Adamadeŋɛ, a la simaya be toren de iko biŋɛ:
a be feerela janfue tɔ donden,
16kɔnɔ ka fɔɲɛ ka a lagarin, a ni sama,
a baa te lɔn bitugun.
17Kɔnɔ Alatala la kanunteya min be tola a ɲalakilannanu ye,
fɔlɔdula bele a la, a dandula bele.
A la teleŋɛ tugun be tola le anu kɔma kabɔɔ juruya tagala juruya ma.
18A be a tola mɔgɛnu le ye minnu be a la lahire makantala,
anu be anu hakkile tola a la yamɔrenu ma, anu mɛn ni anu labatu.
19Alatala la mansa tintiŋɛ be sabatiren saŋɛ tɔ le,
a la nɔɛ be koe bɛ kunma.
20Wole malekanu, minnu sɛnbɛ kolo,
wo be a la yamɔrenu lakamalila kole butɔ,
wo Alatala tantu!
21Wole saŋɛ tɔ feŋɛnu bɛ,
wole minnu be a la yamɔre tɔ, a be diren min ye, wo mɛn be wo mala,
wo Alatala tantu!
22Wole daalenu bɛ, wo Alatala tantu!
Wo a tantu dula bɛ tɔ, a la nɔɛ be ka min kunma!
N ni Alatala tantu n nɛ bɛ la!
Currently Selected:
Jabura 103: MOG
Highlight
Share
Compare
Copy
Want to have your highlights saved across all your devices? Sign up or sign in
