Jabura 104
104
Dunuya bɛ da Marige tantu beete
1N ni Alatala matɔgɔ!
Alatala n na Ala, i la koloya dan bele!
Nɔɔra nun miriŋɛ le be lajigiren i ma.
2Iyon, malaŋɛ be lajigiren Alatala ma iko donfeŋɛ.
A be saŋɛ lafontiren de iko kuta min be lafontiren leele kanna.
3A be a la todula mayɛlɛreŋɛ sɔren je le kunma,
a ni luuture ma a la tagaman feŋɛ la ɲɔ,
a be tagamanna fɔɲɛ le kunma.
4A be fɔɲɛnu le sɔren anu ni a la kiilaya ma,
a be ta sɛnbɛma lasanbala a la wale ma koe la.#104:4 Kɛ haaya si nɔ mayɛlɛmanna ka le tugun: A be a maren a la malekanu ni to iko fɔɲɛ; a la walilanu ni to iko ta sɛnbɛma.
5A ka duge lafonti le ka a mabanban,
a te lamaga muku.
6Alatala, dunuya da wagate, i ka dunuya mabutin ji banba le fɔlɔ la.
Je be yɛlɛren de nun han kɔnkɛnu kun tɛma,
7kɔnɔ i to fatiyata anu ma, anu borita.
I to ka i balamantan kulɛ labɔɔ, anu woyita teriya la,
8tagala dula tɔ i be min saren anu ye nun.
Anu yɛlɛta le nun kɔnkɛnu kunma,
anu mɛn tajigita gulunbanu tɔ.
9I ka naaniŋɛ sa le, a ma bɛn je ni tantun ka min kunma,
alako a kana tasaagi duge mabutinna.
10Alatala le be je labulala tengenu tɔ tagala kɔɛɛnu ma
minnu be susula kɔnkɛnu tɛma,
11anu ni ji sɔgɛ bɔɔ burun butɔ subenu bɛ ma.
Wula butɔ sofalenu be ji sɔgɛ bɔɔla ɲɔnu le.
12Kondeŋɛnu be anu la boŋɛnu sala kɔɛɛnu dala le,
anu ni to anu kulɛ labɔɔla lɔgɔ boliŋɛnu kanna.
13Alatala be a la dula mayɛlɛreŋɛ tɔ, a be kɔnkɛnu lakimala je la;
a ni duge lafa lɔgɔ wolenu la a la walenu sabu la.
14A be ɲagama lafɛtɛnna kolofeŋɛnu ye,
a ni kifeŋɛnu tugun nawolo mɔgɛnu ye,
anu ni duge la munanfaŋɛ lawali, ka naa balue sɔtɔ,
15iko beere min be mɔgɛ juse ladiyala a ye,
tule min be mɔgɛ ɲakɔtɔ lamalanna,
anun dɛgɛ min be mɔgɛ lasɛnbɛnteyala.
16Alatala la lɔgɛnu be maren a la a ɲinma la;
Liban lɔgɔ kutu banbanu, a be minnu kiren.
17Konden lanmanu be anu la boŋɛnu sala ɲɔ le.
Lɔgɛ min tɔgɔ sipirɛ, simpoe tugun be wolo mala a to dula la.
18Fata tɔ baanu todula be maren kɔnkɔ mayɛlɛreŋɛnu le la.
Dalifeŋɛ min tɔgɔ daman#104:18 daman mu wo dalifeŋɛ tɔgɛ le la Faransɛ kuma tɔ, a kɛɲa be toren de iko tɛgɛfeŋɛ kɔnɔ a todula mu kuru dinkanu le la., wo dogon dula be kuru dinkanu le tɔ.
19Alatala ka kare da, sali luŋɛnu lɔn koe le la.
Tele be a dula wagate lɔnden.
20Alatala, i tini dibe lajigi, sue ni don kisanna.
Burun butɔ subenu bɛ be tagamaŋɛ fɔlɔla wo wagate le.
21Jata deŋɛnu be ŋurɛla dɔmɔ koe la wo wagate le,
anu be Ala maɲininkala anu balue la ko la.
22Tele tini a da bula,
anu ni saagi anu la fanmɛnu tɔ ka sa.
23Mɔgɛnu tugun ni bɔɔ anu ni taga anu la wali dulanu tɔ,
anu ni telen ɲɔ han wura la.
24Ee Alatala, i la walenu siyata.
I be anu bɛ maren hakkilimaya le la,
dunuya be lafaren i la daalenu le la.
25Ba banba fɛlɛ: a yiriwaren sɔngɛ bɛ la.
Dalifeŋɛ siyama le be a tɔ:
nilama lanma nun a banba, anu kɔnte te lɔn.
26Kulun banbanu be tagamanna wo je le kunma.
Lefiyatan, je tɔ dalifen banba, a ni tolon ɲɔ.
27Kɛ dalifeŋɛnu bɛ be anu hakkile sɔren ile le ma,
i ni balue dii anu ma a wagate.
28I tini dɔmɛ dii anu ma, anu ni a madɛn.
I tini i bole laka, anu be wasala le a ɲinma la.
29I tini i kɔ sɔ anu la, anu si kilan yigitɛgɛ la.
I tini anu foofe dese, anu be fagala le,
anu ni saagi bangue tɔ.
30I tini nɛ ladon anu bale tɔ, anu ni ma daale la,
i be duge talasaagila a la ɲɔgɔnna le.
31Alatala la nɔɔra ni to abada!
Alatala ni sɛɛwa a la daalenu la!
32A be duge fɛlɛla, duge be sɛrɛnna.
A tini maga kɔnkɛnu la, siise ni yɛlɛ anu tɔ.
33N si Alatala matɔgɔ le fanni n be baluren,
n si beete bɔɔ le n na Ala biliya koe la fanni n be dunuya.
34N na mira ni diya a ye!
Nde si to sɛɛwala le Alatala la.
35Junubutɔɛnu ni muttɛ dunuya!
Ko koron malanu kana to bitugun!
N ni Alatala matɔgɔ n nɛ bɛ la.
Wo Alatala tantu!
Currently Selected:
Jabura 104: MOG
Highlight
Share
Compare
Copy
Want to have your highlights saved across all your devices? Sign up or sign in
