Jabura 102
102
Tɔɔrɔbaga la kɔntɔfilenu anun a la Ala mataraŋɛ
1Tɔɔrɔbaga min sɛnbɛ bata ban la Ala mataraŋɛ, a ni a da ladi Alatala ma.
2Ee Alatala, n na mamataraŋɛ lamɔɛ,
n na belebele ni yɛlɛ, han a ni taga ke i ma!
3I kana i ɲakɔtɔ dogon n na n to be tɔɔrɛ tɔ!
N to be belebelela, i tolomasɔ n kulɛ la.
Yandi, n jaabi teriya la!
4N na simaya be tagala banna le iko ta siise,
n sɛnbɛ tugun be banna iko lɔgɔ bala be banna ta tɔ ki min na.
5N juse be balaren, iko bin tɛgɛreŋɛ;
n te dɔmɛ dɔmɔ bitugun.
6N nuunu kulɛ sɛnbɛ kolo han,
fɔ n bole le tun be n kolenu kunma.
7N bata to iko konden dɔndɔ tini to janfue butɔ.
N bata to iko siyankole min be toren buruŋɛ butɔ,
8iko konden dɔndɔ pɛti le be sigiren boŋɛ kanna.
N te nɔ kinnɔgɔla.
9Lun go lun n jaguenu be n mayola,
anu be n tɔgɛ fɔla anu la dankarenu tɔ.
10N te dɔmɔrifeŋɛ dɔmɔ, fɔ buguta.
N ɲa jenu be sulenna n na minfeŋɛ tɔ.
11I la jusu yɛlɛ anun i la dumɛŋɛ sabu la,
i bata n tajigan ka n nafili pon.
12N na simaya be toren de iko wura la niiniŋɛ tini don.
N mɛn si bala iko ɲagama.
13Kɔnɔ ile Alatala, i be majigiren de i la mansa tintiŋɛ tɔ abada.
I tɔgɛ te sama, a be tola le kabɔɔ bɔnsɔ han bɔnsɔ.
14I be wulila le i ni kinikini Siyɔn saa ma;#102:14 Darisalamu tɔgɔ do le mu Siyɔn na.
bayi, i be naala hinnɛla a la,
hinnɛ lɔ́gɛ́ masubɛreŋɛ bata ke.
15Mɔle i la jondeŋɛnu, wo saa kurenu bɛ labɛndeŋɛ be mɔ hɛnɛren,
hali a to bata malansan, a buguta di mɔ ye.
16Lun do, jamanɛ bɛ si kilan de Alatala la.
Mansa bɛ si naa kimisirin i la nɔɔra ɲatɔ.
17Iyon, Alatala mɛn si Siyɔn sɔ le,
a ni a yɛtɛ yita a la nɔɔra tɔ.
18A si a ɲamatelen misikinɛnu la mamataraŋɛ ma,
a te to a ma anu la mamataraŋɛ jigan.
19Kɛ kuma ni sɛbɛ bɔnsɛnu ye minnu be naala nala,
jama min be naala sɔtɔla sinan, wonu si Alatala matɔgɔ le.
20Iyon, a be a ɲa lajigila le mɔ ma kabɔɔ a la dula saniyandeŋɛ tɔ;
a ni dunuya fɛlɛ bɔɔla saŋɛ tɔ,
21a ni gelemanɛnu nuunu kulɛ mɔɛ,
a ni mɔgɛnu lakisi minnu be faga da tɔ.
22Wolo si a ma, anu ni Alatala tɔgɛ fɔ Siyɔn saa butɔ,
anu ni a matɔgɔ beete bɔɔ Darisalamu butɔ ɲɔ.
23Wo lun, jamanɛnu si madɛn,
saa mansanu si kunbɛn, nala Alatala batudula.
24N ma yanfaya n na dunuya takunte tɔ, Ala nata n sɛnbɛ bɔɔ n bolo,
a bata n na simaya lawutuya.
25Wolo mu n be n kulɛ latagala a ma, n ko:
«N Marige Alatala, yandi, i kana n faga n na simaya tɛma,
ile min be ɲɔ abada.
26I ka dunuya duge lafonti bima,
saŋɛ tugun be daren i bole la.
27Wonu bɛ si ban de, kɔnɔ ile be ɲɔ abada.
Anu bɛ si ban de iko donfeŋɛ,
i si anu masara iko doroke.
Do tini na, a kɔtɔma ni sama.
28Kɔnɔ ile yɛtɛ kan te masara,
i la ko te ban abada.
29Mɔle i la joŋɛnu, mɔ la deŋɛnu si naa sabati le duge tɔ,
i si wonu tugun juruya latenkun.»
Currently Selected:
Jabura 102: MOG
Highlight
Share
Compare
Copy
Want to have your highlights saved across all your devices? Sign up or sign in
