Lewi bɔnsɛnu la sariya 26
26
Barikɛ nun halage
1Alatala mɛn ko Musa ma: «Wo kana kuye yo ɲiɲa, wo kana kuru batunɛŋɛ sigi, wo kana kuru malasɛreŋɛ batu wo la duge tɔ wo ni sujudu a ye, bayi nde le mu Alatala la, wo Marige Ala.
2Wo ni wo hakkile to n na sulen lɔ́gɛ́ sariya ma, wo ni n na dula saniyandeŋɛ biliya. Nde le mu Alatala la.
3Ka wo ka n na sariya bita wo tota n na yamɔrenu labatula, 4n si sange nati le wo ye a wagate ma, duge si a tɔnɛ labɔɔ le, sugenu si wolo le sɛnɛ tɔ. 5Suge botege tɛmuɛ si mɛ le han rɛsɛn deŋɛ bɔɔ tɛmuɛ. Rɛsɛn deŋɛ bɔɔ tɛmuɛ tugun si mɛ le han suge ki tɛmuɛ. Wo si balue sɔtɔ han a ni wo wasa, wo ni sabati wo la duge tɔ jususa butɔ. 6N si hɛra to kɛ jamanɛ bɛ ye, wo ni kinnɔgɔ jususa butɔ. N si burun butɔ subu fatimanu bee le ɲɔ duge tɔ, kɛlɛ malanu tugun kana wo tɔɔrɔ wo bata. 7Wo si wo jaguenu bee le han anu ni boe wo la faŋɛ sabu la. 8Wo la mɔgɔ loolu si wo jaguenu bee le han mɔgɔ kɛmɛ. Wo la mɔgɔ kɛmɛ si nɔ wo jaguenu beela han mɔgɔ wulu tan. Wo jaguenu si boe le wo la faŋɛ sabu la. 9N si hinnɛ wo la. N si wo lajiidi le, n ni wo lasiya. N si n na lahire lakamali le wo ye. 10Wo si dɔmɔ kɔtɛnu dɔmɔ le han dɔmɔ namanu ni ke, wo ni naa a kɔtɔma bɔɔ a sa dula tɔ wo ni a nama sa ɲɔ. 11N si to le wo tɛma, n te naa wo kɔn. 12N si tagaman de wo tɛma. Wo butɔ, n si ma wo Marige Ala la, wo ni ma n na jama la. 13Nde le mu Alatala la, wo Marige Ala, min ka wo labɔɔ Misira duge tɔ, alako wo kana ma anu la joŋɛnu la bitugun. N bata jonya kote bɔɔ wo kunma, alako wo ni tagaman kunnawule butɔ.
14Kɔnɔ ka wo ma n kulɛ lamɔɛ, ka n na yamɔrenu bɛ labatu, 15ka wo ka n na yamɔrenu lafili, ka wo ma sɔ n diyanankoe kɔma, ka wo ka n na lahire tiɲa, 16awa, n be kɛ-lɛ mala wo la. N si bande lasanba wo ma min si wo bale bɛ bɔɔ wo ma; bali bande ni wo bita, wo bale ni bandi pen; a ni wo ɲanu tiɲa, a ni wo juse tɔɔrɔ. Wo be suge kiila fu, bayi wo jaguenu si a bɛ dɔmɔ le. 17N si n ɲamatelen wo ma wo jihadi koe la. Wo jaguenu si nɔ sɔtɔ le wo ma, wo kɔnnɛlanu si wo yamɔri le. Wo si to borila hali mɔgɔ bele wo kɔma.
18Kɔnɔ wo bɛ butɔ, ka wo ma sɔn n kulɛ lamɔɛla, n si wo ɲagankata le han kunɲama wɔrɔwila iko a fɔlɛ la wo la junubenu la ko la. 19N si wo la fan nakoloya sɛnbɛ tiɲa le. N si saŋɛ to le sangi taaɲa tɔ wo ye han wo la duge ni bɛlɛya iko kure. 20Wo sɛnbɛ be banna le fu. Wo la duge be balanna le a tɔnɛ labɔɔla, wo la kifeŋɛnu te wolo bitugun.
21Ka wo mɛn tota n sɔsɔla, wo ma sɔn n kulɛ lamɔɛla, n mɛn si wo ɲagankata lasiya han kunɲama wɔrɔwila wo la junubenu la ko la. 22N si burun butɔ subenu nati wo digii ma. Anu si wo la deŋɛnu faga, anu si wo la kolofeŋɛnu fara le, anu si wo sɔntɔ le han mɔgɛ ni ban kila kunma.
23Wo bɛ tanbi kɔma, ka wo ma wo tolomasɔ n na sariya la, ka wo tota wo kan bɛlɛyala, 24nde yɛtɛ si ko bɛlɛŋɛ nati le wo ma, n mɛn ni wo ɲagankata han kunɲama wɔrɔwila wo la junubenu la ko la. 25N si kɛlɛ lawuli le wo ma n na lahiri tiɲareŋɛ la ko la. Wo tini dogon wo la saanu butɔ, n si wo labandi le bandiya makilandeŋɛ la min teri tanbila mɔgɔ gbɛtɛ ma, wo ni naa to wo jaguenu bolo butɔ. 26Ka n be kɔnkɛ lajigila wo ma tɛmuɛ min tɔ, musu tan si nɔ dɛgɛ bintanna, dɛgɛ bintandula dɔndɔ pɛti tɔ. Anu ni a mafatan a mɛsɛma la. Wo si a dɔmɔ, kɔnɔ a te wo wasa feu.
27Wo bɛ tanbi kɔma, ka wo ma sɔn n kulɛ lamɔɛla, ka wo ma sɔn n diyanankoe bitala, 28n si ko bɛlɛŋɛ nati le wo ma. N ni wo ɲagankata han kunɲama wɔrɔwila wo la junubenu la ko la, 29han wo ni naa wo la den kayireŋɛnu nun den musereŋɛnu sube dɔmɔ le. 30N si wo la kuye batu dulanu tiɲa le minnu be kɔnkɛnu kunma. N si wo la kurenu laboe le, wo be minnu batula. N si wo la furenu madɛn de wo la kuye foofi balenu kunma. N si wo kɔn de. 31N ni wo la saanu ma janfue la, n ni wo la batu dulanu tiɲa, n te sɔn wo la sarika kuɲɛ diyamanu jiganna bitugun. 32Nde yɛtɛ tini ban wo la jamanɛ jɔnjɔnna, wo jaguenu si kaabɛ le ɲɔ la ko la. 33N si wo mafatan de jamanɛ donu ma, n si wo bee le faŋɛ la. Wo la jamanɛ si jɔnjɔn de, mɔgɔ yo te to wo la saanu tɔ.
34Wo la duge si naa a sulen de wo wagate. Wo be wo jaguenu dula tɛmuɛ min tɔ, wo la duge si kaɲinya le suleŋɛ sabu la. 35Wo la duge ma suleŋɛ min sɔtɔ wo be ɲɔ tɛmuɛ min tɔ, a si naa wolo sɔtɔ wo tɛmuɛ. 36Minnu ma faga wo kɛlɛnu tɔ, n si kilaŋɛ lasanba le anu ma anu juse ni makasa anu be anu la jaguenu la dugenu tɔ ka min na. Hali anu ka yanba boere kulɛ mɔɛ, anu si bori le. Anu si bori anu ni boe hali fan tigi yo bele anu jokkiren. 37Anu si bori, anu ni boe ɲɔgɔn kunma iko fan tige le be anu jokkiren, a taranta mɔgɔ yo bele anu jokkiren. Wo te nɔ sɔla wo jaguenu ɲatɔ. 38Wo la ko si muttɛ le sii donu tɛma, wo la ko si sama wo jaguenu la duge butɔ. 39Minnu ma faga wo bɛ butɔ, wonu si naa faga le anu jaguenu la duge tɔ anu la junubenu anun anu benbanu la junubenu la ko la.
40Wo kɔma, anu si naa anu la junubenu anun anu benbanu la junubenu la ko talɔn de, anun anu be min maren anu la kan bɛlɛya butɔ. 41Wo si a taran, wo junube la ko le ka a ma nun, nde tugun ka ko bɛlɛŋɛ nati anu ye han n ka anu doni anu jaguenu la duge tɔ. Awa wo tɛmuɛ, anu ni tuubɛ anu la kantabɛlɛya la, anu ni anu majigi, anu ni anu la junubenu sɔŋɛ dii. 42Wo tɛmuɛ n si n hakkile to le n na lahire la ko ma min be nde nun Yaguba nun Isiyaka anun Iburahima tɛma. N te ɲina wo duge la ko la. 43Wo si a taran, Isirayila kaanu bata taga anu la junube sɔn dii dula wagate min tɔ, wo la duge bata to ɲɔ, a be labolokaren, a ni a sulen. Bayi, anu bata n na sariya boloka, anu yota n na yamɔrenu ma.
44Kɔnɔ wo bɛ butɔ, anu tini be anu jaguenu bata tɛmuɛ min tɔ, n te anu aɲɛ, n te anu boloka han anu ni sɔntɔ. N te n na lahire tiɲa nde nun ande tɛma, bayi nde le mu Alatala la, anu Marige Ala. 45N si n hakkili to le n na lahiri fɔlɛ la ko ma, n ka min jigan anu benbanu ye, n ka anu labɔɔ lun min na Misira duge tɔ seenu ɲala, alako n ni ma anu Marige Ala la. Nde le mu Alatala la.»
46Alatala la sariya, a la yamɔrenu, nun a lahire le mu ka, Alatala ka min nakoti a nun Isirayila kaanu tɛma Turisinina kɔnkɛ kunma Musa sabu la.
Currently Selected:
Lewi bɔnsɛnu la sariya 26: MOG
Highlight
Share
Compare
Copy
Want to have your highlights saved across all your devices? Sign up or sign in
