Lewi bɔnsɛnu la sariya 25
25
Duge la sulen saŋɛ sariya
1Alatala kumata Musa ye Turisinina kɔnkɛ kunma, a ko: 2«A fɔ Isirayila kaanu ye, wo tini ke duge tɔ n be min diila wo ma, wo ni a to duge ni kɛnɛ a sulenna nde Alatala la biliya kɔtɔ. 3Ka wo keta wo duge tɔ, wo ni wo la sɛnɛ wale fɔlɔ, wo ni mɛnni wo la rɛsɛn lɔgɛnu ma, wo ni a wolenu bɔɔ. Wo ni wo bɛ ma san wɔɔrɔ kɔtɔ, 4kɔnɔ a san wɔrɔwilaɲɔgɛ, wo ni a to duge ni a sulen Alatala la biliya kɔtɔ. Wo kana sɛnɛ wale ma, wo kana fenfen ma wo la rɛsɛn lɔgɛnu la wo saŋɛ la. 5Wo la kifen wolé minnu be fɛtɛnna anu yɛtɛ ma, wo kana anu tɛgɛ. Hali wo la rɛsɛn be wolola, kɔnɔ wo ni a to ɲɔ, bayi duge la sulen saŋɛ le mu wo san dɔndɛ la. 6Duge be min nabɔɔla wo sulen saŋɛ kɔtɔ, wo bɛ si nɔ wo dɔmɔla, wole yo, wo la joŋɛnu yo, wo la walilanu yo, wo la luntan tanbilanu yo, 7wo la kolofeŋɛnu yo, anun burun butɔ feŋɛnu minnu be wo la jamanɛ tɔ. Duge be min bɛ labɔɔla, wolo be mala ande tugun na balue la.»
Hɔrɔya Saŋɛ la ko sariya
8«Wo ni sulen saŋɛ wɔrɔwila kɔnti, san wɔrɔwila sigidula wɔrɔwila, wo tabɛnden san bi naani nun kɔnɔntɔ. 9Wo san bi looluɲɔgɛ kari wɔrɔwilaɲɔgɛ tele tan luŋɛ, wo ni binanu fe jama ye duge butɔ. Kunsara luŋɛ le mu, wo ni bina fe wo la jamanɛ bɛ tɔ. 10Wo ni wo san bi looluɲɔgɛ kɛrɛkɛrɛ a ni ma Hɔrɔya Saŋɛ la jamanɛ mɔgɛ bɛ ye. A bɛ ni hɔrɔya; a bɛ ni tasaagi sabatila a bata, a bɛ ni saagi a bareŋɛnu ma. 11San bi loolu yo san bi loolu, wo be mala wo ye Hɔrɔya Saŋɛ le la. Wo kana suge ki, wo kana kifeŋɛ wolenu nun rɛsɛn wolenu tɛgɛ minnu be bulala anu yɛtɛ ma. 12Hɔrɔya Saŋɛ le mu wo la, wagati saniyandeŋɛ le mu a la wo ye. Duge tɔnɛ ni ma wo la dɔmɛ la.
13Wo Hɔrɔya Saŋɛ butɔ, bɛ ni saagi sabatila a la duge tɔ. 14Ka wo be fondo mayitala wo nɛɛnɛdɔndɛ ma, ka wo ma wo bata fondo san wo nɛɛnɛdɔndɛ bole tɔ, wo butɔ, wo kana geenɛ ɲini ɲɔgɔn kunma. 15-16Wo ni wo fondo san sɔn telendeŋɛ la. A sɔŋɛ sa ɲa le ka: ka san siyama be toren, a sɔŋɛ si koloya, kɔnɔ ka a banba bele toren Hɔrɔya Saŋɛ ni ke, wo fondo sɔŋɛ te koloya. Wo nɛɛnɛdɔndɛ ni wo mayita wo ma a sariya nɛŋɛ la. A ni sɛnɛ tɛgɛ saŋɛ kɔnti minnu be toren yannun Hɔrɔya Saŋɛ be kela. A sɔŋɛ be sala wo saŋɛ kɔnte le la, sɛnɛ be tɛgɛla kunɲama jelu la yannun Hɔrɔya Saŋɛ be kela. 17Wo butɔ, wo kana geenɛ ɲini ɲɔgɔn kunma. Wo ni kilan wo Marige Ala la. Nde le mu Alatala la, wo Marige Ala. 18Wo ni n na yamɔrenu jokki wo ni n na sariyanu bita, alako wo ni to jususa tɔ wo duge tɔ. 19Duge si a tɔnɛ labɔɔ le wo ni a dɔmɔ a ni wo wasa, wo mɛn ni sabati ɲɔ jususa butɔ.
20Ka min tagata wo maɲininka: ‹Ka wo mɔ te fenfen ki san wɔrɔwilaɲɔgɛ butɔ, ka wo mɔ te kifeŋɛ bɔɔ wo tɛmuɛ, wo mɔ si balu kama le ba?›, 21awa, wo ni a lɔn nde le be barikɛ lajigila wo ma wo san wɔɔrɔɲɔgɛ butɔ, min si ma wo ye san saba balue la. 22A san saginɲɔgɛ butɔ, wo ni kifen kole ki, kɔnɔ wo be dɔmɔ mandireŋɛ le dɔmɔla han a san kɔnɔntɔɲɔgɛ. Wo be dɔmɛ min mandiren bɔɔla bima, wo si wo hajue jara le han dɔmɔ namanu be kela tɛmuɛ min tɔ.
23Wo kana duge mayita dɔndɛ la kudai, bayi nde Alatala le tan mu duge la. Wo be toren de iko luntaŋɛnu minnu be yigiyaren n bata. 24N be duge min diila wo ma sabati dula la, sariya le mu wo ni a to sagoe be bɛ ye ɲɔ a ni a la duge kunsara. 25Ka wo nɛɛnɛdɔndɛ bata a la duge mayita a la fondobɔnɔya la, a bɛnta a sɔtɔɲɔgɛ do le ni na, a ni wo dugu mayitareŋɛ kunsara. 26Ka a sɔtɔɲɔgɔ bele min si nɔ wo duge kunsarala, kɔnɔ ka ale yɛtɛ tagata wo kunsara fɛrɛ sɔtɔ, 27a ni duge sɔŋɛ kɔnti ɲɔgɔnna. Saŋɛ kɔnte min tanbita bɔɔla duge santa wagate min tɔ, dugu tige ni wo faliŋɛ bɔɔ dugu sɔŋɛ la, a be naala min diila dugu sanná ma, alako a ni saagi a bata. 28Kɔnɔ ka a ma wo kunsara fɛrɛ sɔtɔ, wo duge ni to a sanná bolo han Hɔrɔya Saŋɛ. Wo tɛmuɛ a si a boloka, dugu tige mɛn ni saagi a bata.
29Ka mɔgɔ do ka a la duge mayita min be saa butɔ tatta be lamilinden min na, a si nɔ wo boŋɛ kunsarala san dɔndɔ kɔtɔ. 30Ka wo boŋɛ bele kunsarala wo san dɔndɛ kɔtɔ, a be tola le a sanná nun a bɔnsɛ bolo kudai, hali Hɔrɔya Saŋɛ a te a boloka. 31Kɔnɔ boŋɛ minnu be sɔren saa lanmanu tɔ tatta bele minnu lamilinden, wonu be tola le iko duge. Anu si nɔ kunsarala. Min be wo boŋɛ sanna, a bɛnta a ni wo boŋɛ boloka Hɔrɔya Saŋɛ tɛmuɛ.
32Lewi bɔnsɛ kan si nɔ le anu la boŋɛnu kunsarala anu la saanu tɔ tɛmuɛ bɛ tɔ. 33Hali ka Lewi kaa do ka boŋɛ san Lewi kaa do ma, fɔ a ni bɔɔ a butɔ Hɔrɔya Saŋɛ tɛmuɛ, bayi boŋɛnu min be Lewi kaanu la saanu tɔ, wonu pɛti le be maren Lewi kaanu tɛŋɛ la Isirayila jama tɛma. 34Sɛnɛnu min be Lewi kaanu la saanu lamiliŋɛ tɔ, wonu te nɔ mayitala, bayi Lewi kaanu le tan mu anu la kudai.»
Joŋɛ la ko sariya
35«Ka wo nɛɛnɛdɔndɛ bata ma fondobɔnɛ la, fɛrɛ bele a bolo a si balu min na, a bɛnta wo ni mɛnni a ma iko luntaŋɛ, a ni to wo kɛnna. 36Wo kana riba sa a la dɔntɛ kunma. Wo ni kilan wo Marige Ala la, wo ni wo nɛɛnɛdɔndɛ to wo kɛnna. 37Wo kana riba sa a la nafulu dɔntɛ kunma, wo kana riba sa a la dɔmɔ sɔŋɛ kunma. 38Nde le mu Alatala la, wo Marige Ala, min ka wo labɔɔ Misira duge tɔ, n ni Kanana duge dii wo ma, n ni ma wo Marige Ala la.
39Ka wo nɛɛnɛdɔndɛ ka a yɛtɛ mayita wo ma a la fondobɔnɔya butɔ, wo kana joŋɛ la wale sigi a kunma. 40A ni ma wo bata iko wo la walilá, ka wo ma wo la luntaŋɛ han Hɔrɔya Saŋɛ wagate. 41Wo butɔ, ale nun a la deŋɛnu ni hɔrɔya, anu ni saagi tasabatila anu bareŋɛnu dula, anu benbanu la duge tɔ, 42bayi n na walilanu le mu Isirayila kaanu la, n ka minnu labɔɔ Misira duge tɔ. A ma bɛn anu ni mayita joŋɛ la. 43Wo kana anu yamɔri a bɛlɛma la, wo ni kilan wo Marige Ala la. 44Ka wo be diren jon kaye ye, ka wo ma jon muse, wo ni anu san sii gbɛtɛnu le ma, minnu be wo lamilinden. Anu ni ma wo la joŋɛnu la. 45Wo mɛn si nɔ joŋɛnu sanna le sii gbɛtɛnu la mɔgɛnu ɲaama minnu be sigiren wo tɛma, anun anu gabila mɔgɛ minnu sɔtɔta wo la duge tɔ. Anu si nɔ mala wo la joŋɛnu la. 46Wo si nɔ anu tola wo la deŋɛnu bolo kɛɛ la wole tanbi kɔma. Anu si nɔ tola jonya tɔ kudai, kɔnɔ wo nɛɛnɛdɔndɛ Isirayila kaanu te nɔ tola wo la yamɔri bɛlɛŋɛ tɔ.
47Ka wo nɛɛnɛdɔndɛ fondobɔnɛ do ka a yɛtɛ mayita luntaŋɛ fondo tige ma wo la duge tɔ, ka wo ma wo luntaŋɛ bɔnsɛ do ma, 48wo fondobɔnɛ sɔtɔɲɔgɛ si nɔ a kunsarala le. 49A baaba dɔgɛ ka wo ma a kɔtɔ, ka wo ma a sɔtɔɲɔgɛ do si nɔ a kunsarala le. Ka a tagata fɛrɛ sɔtɔ, a si nɔ a yɛtɛ kunsarala le. 50Bɔɔla a santa saŋɛ min na, han Hɔrɔya Saŋɛ ni ke, anu ni wo kɔnte bɔɔ, ka wo sɔŋɛ lasaagi a tige ma. Anu be sɔŋɛ min sala a kunsara koe la, fɔ wo ni tabɛn wo saŋɛ bere wale ma, anun walilá be sɔŋɛ min sɔtɔla wo butɔ. 51Ka san siyama mɛn be toren, a kunsara sɔŋɛ ni siya ɲɔgɔnna a tige mafanna. 52Ka san siyama bele toren yannun Hɔrɔya Saŋɛ ni ke, a kunsara sɔŋɛ ni bɛn wo saŋɛ kɔnte ma. 53A si nɔ tola a tige bata iko walilá, kɔnɔ a ma bɛn a tige ni a yamɔri a bɛlɛma la. 54Ka a te nɔ kunsarala wo mɔɔle la, Hɔrɔya Saŋɛ tini ke, ale nun a la deŋɛnu ni hɔrɔya. 55Bayi nde le la walilanu mu Isirayila kaanu la, n ka minnu labɔɔ Misira duge tɔ. Nde le mu Alatala la, wo Marige Ala.»
Currently Selected:
Lewi bɔnsɛnu la sariya 25: MOG
Highlight
Share
Compare
Copy
Want to have your highlights saved across all your devices? Sign up or sign in
