Lewi bɔnsɛnu la sariya 27
27
Lahiri jigan koe fondo kɛrɛkɛrɛ koe la Alatala ye
1Alatala kumata Musa ye, a ko: 2«A fɔ Isirayila kaanu ye, ka mɔgɔ do bata lahire jigan, a ni mɔgɔ do kɛrɛkɛrɛ nde Alatala ye, a si nɔ anu kunsarala kɛ nafule kɔnte le la. 3Ka kaye le mu min na simaya be san mugan han san bi wɔɔrɔ, a be kunsarala kaalisi kolo bi loolu le la. Wo kaalisi kole, a la biliya nun kaalise kole nɛŋɛ min be lawalila hɔrɔma dingira tɔ, fɔ anu ni kan. 4Ka muse le mu, a be kunsarala kaalisi kolo bi saba le la. 5Ka kamareŋɛ le mu, min na simaya be san loolu han san mugan, a be kunsarala kaalisi kolo mugan de la. Ka den musereŋɛ le mu, a be kunsarala kaalisi kolo tan de la. 6Ka den kayireŋɛ le mu, min be kari dɔndɔ han san loolu, a be kunsarala kaalisi kolo loolu le la. Ka den musereŋɛ le mu a be kunsarala kaalisi kolo saba le la. 7Ka kayiba le mu, min na simaya fisa san bi wɔɔrɔ ko, a be kunsarala kaalisi kolo tan nun loolu le la. Ka musuba le mu, a be kunsarala kaalisi kolo tan de la. 8Ka fondobɔnɛ bata wo lahire jigan, min te nɔ wo kunsara sɔtɔla, a bɛnta a ni a fan yita sarika lakelá la, wolo be nala kunsara kɔnte fɔla a ye a si nɔ min na.
9Ka mɔgɔ do bata lahire jigan kolofeŋɛ le dii koe la, min si nɔ bɔɔla sarika la nde Alatala ye, kolofeŋɛ bɛ min be diila Alatala ma, wo kolofeŋɛ bata kɛrɛkɛrɛ n ɲɛ yati. 10Kolofen do te dii kɛ kolofeŋɛ faliŋɛ la: kolofeŋɛ min kaɲin te dii min maɲin faliŋɛ la, min maɲin tugun te falin min kaɲin na. Ka wo ka wo ma, fɔ anu fila bɛ ni kɛrɛkɛrɛ n ɲɛ. 11Ka subu haramureŋɛ le mu, min te bɔɔ sarika la nde Alatala ye, a ni doni sarika lakelá dula. 12Sarika lakelá ni wo kunsara fɔ sube sɔŋɛ kɛɲa le ma. Wo ni ma a sɔŋɛ la. 13Ka a tige be diren wo sube kunsarala, ka a be a sɔŋɛ diila, a mɛn ni wo sɔŋɛ ɲɔgɔn tafatan sigi loolu la, a ni sigi dɔndɔ jigan, a ni a sa sɔŋɛ kunma, wo bɛ labɛndeŋɛ bata ma kunsara la.
14Ka mɔgɔ do ka a la boŋɛ kɛrɛkɛrɛ nde Alatala ye, a kaɲin ba a ma kaɲin ba, sarika lakelá ni a sɔŋɛ fɔ a si san min na. Wo ni ma a sɔŋɛ la. 15Ka wo tigi be diren a la boŋɛ kunsarala, ka a be a sɔŋɛ diila, a mɛn ni wo sɔŋɛ ɲɔgɔn tafatan sigi loolu la, a ni sigi dɔndɔ jigan, a ni a sa sɔŋɛ kunma, wo bɛ labɛndeŋɛ bata ma kunsara la. Jɔ boŋɛ ni lasaagi a tige ma.
16Ka mɔgɔ do bata a la sɛnɛ do kɛrɛkɛrɛ nde Alatala ye, a sɔŋɛ be fatanna suge kɔnte le la min si nɔ foyila ɲɔ. Kaalisi kolo bi loolu ni dii tɔwa kilo kɛmɛ saba kɔnte la. 17Ka a bata a la sɛnɛ kɛrɛkɛrɛ Hɔrɔya Saŋɛ butɔ, a sɔŋɛ yati le be diila, a te masara. 18Ka a bata a la sɛnɛ kɛrɛkɛrɛ Hɔrɔya Saŋɛ tanbi kɔma, sarika lakelá ni saŋɛnu kɔnti minnu be toren yannun Hɔrɔya Saŋɛ doe ni ke. A ni do bɔɔ sɛnɛ sɔŋɛ la. 19Ka sɛnɛ tige be diren a la sɛnɛ kunsarala, ka a be a sɔŋɛ diila, a mɛn ni wo sɔŋɛ ɲɔgɔn tafatan sigi loolu la, a ni sigi dɔndɔ jigan, a ni a sa sɔŋɛ kunma, wo bɛ labɛndeŋɛ ni ma kunsara la. Jɔ sɛnɛ ni lasaagi a tige ma. 20Ka a ma sɛnɛ kunsara, a ka a mayita mɔgɔ do ma, a te nɔ a kunsarala bitugun. 21Hɔrɔya saŋɛ tini ke, wo sɛnɛ tige nama ni bɔɔ wo duge tɔ. Duge bata saniyan iko duge min be latɔnden. A bata ma nde Alatala tɛŋɛ la. Mɔgɔ yo te nɔ a lawalila, fɔ sarika lakelanu. 22Ka mɔgɛ bata sɛnɛ sandeŋɛ kɛrɛkɛrɛ nde Alatala ma, min bele a bareŋɛ kɛɛ ɲaama, 23sarika lakelá ni a sɔŋɛ fɔ a kɛɲa ma. A be wo lɔnna saŋɛ kɔnte le ma minnu be toren yannun Hɔrɔya Saŋɛ ni ke. Wo lun yati wo tigi ni a sɔŋɛ dii, bayi a be kɛrɛkɛrɛren nde Alatala ye. 24Hɔrɔya saŋɛ tini ke, wo sɛnɛ be lasaagila sɛnɛ tige fɔlɔnɛŋɛ le ma, doe ka a san min ma.
25Wo sɔŋɛ bɛ, a kaalisi kole la biliya nun dula saniyandeŋɛ nɛŋɛ, fɔ anu ni kan. A kaalisi kolo dɔndɔ be tabɛnna giramu tan de ma.
26Kolofeŋɛ den fɔlɛ kan, mɔgɔ yo te nɔ a diila nde Alatala ma, bayi ninge yo, saaka yo, baa yo, anu la den fɔlɛ ɲan bɛ be maren nde Alatala tɛŋɛ le la. 27Mɔgɛ si nɔ subu haramureŋɛ la den fɔlɛ kunsarala. Ka a be a sɔŋɛ diila, a mɛn ni wo sɔŋɛ ɲɔgɔn tafatan sigi loolu la, a ni sigi dɔndɔ jigan, a ni a sa sɔŋɛ kunma, wo bɛ labɛndeŋɛ be diila kunsara la. Ka a tige ma a kunsara, a ni a mayita a sɔŋɛ la.
28Fondonu be ɲɔ mɔgɛ si minnu dii nde Alatala ma, minnu be mala a tɛŋɛ la kudai, mɔgɛ te nɔ anu kunsarala bitugun. A bata kɛrɛkɛrɛ n ɲɛ abada, a bata ma nde Alatala dɔrɔn tɛŋɛ la. Wo si nɔ mala mɔgɛ la, ka wo ma kolofeŋɛ, ka wo ma sɛnɛ min be a bareŋɛ kɛɛ ɲaama, ka wo ma fondo do. 29Hali mɔgɛ min be kɛrɛkɛrɛla nde Alatala ye ɲɔgɔnna, a te nɔ kunsarala: fɔ a ni faga.
30Duge farila bɛ be mala nde Alatala le tɛŋɛ la, sugu kole be min nabɔɔla anun lɔgɛ min be wolola. Wo farila bɛ bata kɛrɛkɛrɛ nde Alatala ye. 31Ka mɔgɔ do be diren a la farila kunsarala, a ni a faliŋɛ dii. Ka a be a sɔŋɛ diila, a mɛn ni wo sɔŋɛ ɲɔgɔn tafatan sigi loolu la, a ni sigi dɔndɔ jigan, a ni a sa sɔŋɛ kunma, a ni wo bɛ labɛndeŋɛ dii a kunsara la. 32Kolofeŋɛ farila bɛ be mala nde Alatala le tɛŋɛ la, baa yo, saaka yo, ninge yo, kolofen nabɛnbɛnná be min bɛ kɔntila, a farila bɛ bata kɛrɛkɛrɛ nde Alatala ye. 33Kolofen do te dii doe faliŋɛ la: kolofeŋɛ min kaɲin te dii min maɲin faliŋɛ la, min ma kaɲin tugun te falin min kaɲin na. Ka wo ka wo ma, fɔ anu fila bɛ ni kɛrɛkɛrɛ, anu hali dɔndɔ te nɔ kunsarala bitugun.»
34Alatala la yamɔrenu le mu wo la, a ka minnu don Musa bolo Turisinina kɔnkɛ kunma bani Isirayila kaanu ye.
Currently Selected:
Lewi bɔnsɛnu la sariya 27: MOG
Highlight
Share
Compare
Copy
Want to have your highlights saved across all your devices? Sign up or sign in
