Lewi bɔnsɛnu la sariya 21
21
Sarika lakelá la saniyaŋɛ la ko
1Alatala kumata Musa ye, a ko: «A fɔ Harona la deŋɛ sarika lakelanu ye, sarika lakelá kana a fan ma saniyanbale la a la mɔgɔ do la fure la ko la de. 2-3Kɔnɔ sarika lakelá si nɔ mala saniyanbale la ka maga a balima mɔgɛ do fure kan na, iko a nɛɛnɛ, a baaba, a la den kayireŋɛ nun a la den musereŋɛ, a dɔgɔ kayima nun a kɔtɔ kayima, anun a barenmusu den musereŋɛ, min ma sigi kayi dugu a be a bata betunna. A si nɔ magala wonu fure kan na. 4Sarika lakelá ma bɛn a ni ma saniyanbale la a la muse fure maga koe la, ka wo ma a la muse la mɔgɛnu fure maga koe la.
5Sarika lakelanu ma bɛn anu ni anu kuŋɛ kan donu masi a yita koe la anu be suunɛ le tɔ, anu kana anu bɔɔra fɛfɛ masi, anu kana anu bale mafara. 6Anu ni saniyan nde anu Marige Ala ye. Nde Alatala anu Marige, anu kana n tɔgɛ tiɲa, bayi ande le be sarika bintannɛŋɛnu bɔɔla nde Alatala ye, minnu be toren iko dɔmɛ n be min dɔmɔla. Wolo mu anu bɛnta saniyanna. 7Sarika lakelá ma bɛn langbe muse sigila, anun den musereŋɛ min fute bata tiɲa, anun kaye bata muse min aɲɛ. Bayi sarika lakelá saniyanta nde a Marige Ala ye. 8Bani Isirayila kaanu ni a bita saniyan mɔgɛ la, bayi ale le be sarikanu diila nde Ala ma minnu be toren iko dɔmɛ n be min dɔmɔla. Wo ni a lɔn a saniyanta. Bayi nde Alatala min be wo lasaniyanna, n saniyanta. 9Ka sarika lakelá la den musereŋɛ do ka a yɛtɛ lamalu langbeya ma koe la, a bata a baaba lamalu. Fɔ ale den musereŋɛ ni bintan ta la.
10Sarika lakelá kuntige min be masubɛren a nɛɛnɛdɔndɛnu tɛma, anu be tulu saniyandeŋɛ saren min kuŋɛ ma a kɛrɛkɛrɛ koe la, anu be kuta saniyandeŋɛ donden a ye, ka wo tigi be suunɛ tɔ, a kana a kunsige laboloka, a kana a la kutanu fara. 11A kana a yɛtɛ ma saniyanbale la don koe la fure yo kunma, hali a mata a baaba la, ka wo ma a nɛɛnɛ. 12A kana nde a Marige Ala la hɔrɔma dingira manɔgɔ, ka bɔɔ wo dula saniyandeŋɛ tɔ, bayi nde Ala le be a masubɛren, tulu saniyandeŋɛ be saren a kuŋɛ ma. Nde le mu Alatala la.
13A ni den musereŋɛ sigi min ma kayi ko fɔlɔ ma. 14A kana furuɲa muse sigi, a kana den musereŋɛ sigi min fute bata tiɲa, a kana langbe muse sigi, a kana muse sigi min ma ma den musereŋɛ la. A ni den musereŋɛ jigan muse la ale yɛtɛ la mɔgɛnu tɛma, 15alako a kana a bɔnsɛ lamalu a la jama tɛma. Bayi nde le mu Alatala la, min be a kɛrɛkɛrɛren.»
16Alatala kumata Musa ye, a ko: 17«A fɔ Harona ye, a bɔnsɛnu tɛma lanjurutɔɛ yo kana sarika lake wale ma a ni sarika sa sarika bintandula tɔ Ala ye. 18Lanjurutɔɛ yo ma bɛn a ni a madon sarika bintandula la. Iko ɲabɔnɛ, anun min be jigila a ma, anun min suŋɛ be ɲɛngɛnden, anun min boliŋɛ be tiɲaren, 19a kɛŋɛ be katiren ka wo ma a bole, 20min be kunkurunden, anun min na kayanya ma kamali, anun bande be min ɲanu tɔ, anun bali bole bandiya be min na, anun kayi nuunureŋɛ. 21Lanjurutɔɛ yo be fatanden Harona sarika lakelá bɔnsɛ la, a kana a madon nde Alatala la sarika bintandula la alako a ni sarika bɔɔ nde a Marige Ala ye. 22A si nɔ nde a Marige Ala la dɔmɔ saniyandeŋɛ mɔɔle bɛ dɔmɔla minnu be sɔtɔla wo sarikanu bɔɔ koe tɔ, 23kɔnɔ a ma bɛn a ni a madon parawan na, min be dula saniyandeŋɛ tɔ, ka wo ma sarika bintandula la, bayi lanjurutɔɛ le mu a la. Wolo mu a kana n na dula saniyandeŋɛ tɔgɛ tiɲa, bayi nde le mu Alatala la, min be sarika lakelanu kɛrɛkɛrɛla.»
24Awa, Musa ka wo kuma bɛ matanbi Harona nun a la deŋɛnu ma, anun Isirayila kaanu bɛ ma.
Currently Selected:
Lewi bɔnsɛnu la sariya 21: MOG
Highlight
Share
Compare
Copy
Want to have your highlights saved across all your devices? Sign up or sign in
