Lewi bɔnsɛnu la sariya 22
22
Sarikanu nun malasaniyaŋɛ
1Alatala kumata Musa ye, a ko: 2«A fɔ Harona nun a la deŋɛnu ye, i ko Isirayila kaanu be sarika saniyandeŋɛnu bɔɔla nde le ye. Wolo mu, sarika lakelanu ni anu bɔɔ a bɔɔ ɲa ma, alako anu kana n tɔgɔ saniyandeŋɛ tɔgɔtiɲa. Nde le mu Alatala la.
3A fɔ anu ye, wo bɔnsɛ tɔ, mɔgɔ yo ka a madon Isirayila kaanu la sarika la anu be minnu diila nde Alatala ma, ka a taranta mɔgɔ saniyanbale le mu a la, wo tigi si bee le n ɲala. Kɛ sariya te tiɲa abada wo nun wo bɔnsɛ bɛ ye. Nde le mu Alatala la.
4A mata mɔgɔ yo la, Harona bɔnsɛ tɔ, bali bolo bandiya be min na, ka wo ma kusa, a ma bɛn a ni sarika saniyandeŋɛ dɔmɔ fɔ a tini ban saniyanna. Mɔgɛ min magata mɔgɔ do la min bata maga fure la, wo tugun ma bɛn a dɔmɔla. Mɔgɛ min manije sutu a la, wo tigi tugun ma bɛn sarika saniyandeŋɛ dɔmɔla. 5Min tini maga nilama mɛsɛn haramureŋɛnu la, ka wo ma mɔgɔ saniyanbale la, a ma bɛn sarika saniyandeŋɛ dɔmɔla. 6Ka min yo tagata maga wo koenu mɔɔle do la, a tigi be mala saniyanbale le la han wura la. A kana wo sarika saniyandeŋɛ dɔmɔ, fɔ a tini ban a bale kola je la. 7Tele tini dula, a ni saniyan, a si nɔ le sarika saniyandeŋɛ dɔmɔla mɛn tugun, bayi a balue le mu a la.
8Sarika lakelá kana sube dɔmɔ min be fagaren a yɛtɛ ma. A mɛn kana sube dɔmɔ sube do gbɛtɛ be min fagaren, alako a kana ma saniyanbale la. Nde le mu Alatala la.
9Sarika lakelá ni n na yamɔrenu labatu anu la dɔmɛ la ko la, alako anu kana junube sɔtɔ, anu ni faga. Nde le mu Alatala la, min be anu kɛrɛkɛrɛla. 10Ka sarika lakelá ma mɔgɔ yo min na, a ma bɛn a ni sarika saniyandeŋɛ dɔmɔ. Hali sarika lakelá la luntaŋɛ ka wo ma a la walilá, a ma bɛn a ni a dɔmɔ. 11Kɔnɔ sarika lakelá la joŋɛ, a ka min san nafule la, anun wo joŋɛ la denbaya kan si nɔ le sarika lakelá la dɔmɛ dɔmɔla. 12Sarika lakelá la den musereŋɛ min be sigiren kaye ye, wo kaye ma ma sarika lakelá la, wo muse ma bɛn a ni sarika saniyandeŋɛ dɔmɔ. 13Fɔ sarika lakelá la den musereŋɛ min be mala furuɲa muse la, ka wo ma kaye be min aɲɛren anu ma den sɔtɔ, a ni saagi a baaba bata iko a den museren tɛmuɛ. Wo muse si nɔ le a baaba la dɔmɛ dɔmɔla. Min yo ma ma Isirayila kaa la, a ma bɛn wo siila dɔmɔla. 14Ka a taranta mɔgɔ do ka sarika dɔmɔ a lɔnbaliya la, fɔ a ni a faliŋɛ dii sarika lakela ma nafule la. A ni dɔmɛ sɔŋɛ jigan, a mɛn ni wo sɔŋɛ ɲɔgɔn tafatan sigi loolu la, a ni sigi dɔndɔ jigan, a ni a sa wo dɔmɛ sɔŋɛ kunma, a be wo bɛ labɛndeŋɛ diila. 15Isirayila kaanu ka sarika saniyandeŋɛnu min bɔɔ nde Alatala ye, sarika lakelanu kana wonu masogin, 16alako anu kana junube sɔtɔ wo sarikanu la ko la anu ka minnu dɔmɔ. Nde le mu Alatala la, min be anu kɛrɛkɛrɛla.»
17Alatala kumata Musa ye, a ko: 18«Kuma Harona nun a la deŋɛnu ye anun Isirayila kaanu; i ni kɛ sariya fɔ anu ye, i ko: ‹Isirayila sɔtɔdeŋɛ bɛ, anun luntaŋɛnu minnu be sabatiren ɲɔ duge tɔ, mɔgɔ min be sarika bintannɛŋɛ bɔɔla Alatala ye lahire lakamali koe la, ka wo ma a yɛtɛ hanige ma sarika la ko la, 19a bɛnta Alatala ni sɔn a la. Wo butɔ, a ni tuura jigan a ni a bɔɔ, ka wo ma saaka kontoŋɛ, ka wo ma sikule min bele lanjururen. 20Wo kana kolofen lanjururen yo bɔɔ, bayi Ala bele wo mɔɔle fɛ. 21Ka mɔgɔ do be diren saaka, baa, ka wo ma ninge bɔɔla kanunteya sarika la Alatala ye, lahire lakamali koe la, ka wo ma a yɛtɛ hanige la sarika la ko la, wo kolofeŋɛ bale ni bɛn, lanjuru yo kana to a ma, ka wo ma Ala bele wo fɛ. 22Wo kana kolofen yo bɔɔ min mu ɲabɔnɛ la, min be jigila a ma, min be mabɛnden, bandiya be min bali bole ma. Wo kana wo siila sa Alatala la sarika bintandula kunma, a ni ma sarika bintannɛŋɛ la. 23Ninge ka wo ma saaka min dula do kayan, ka wo ma a wutu, i si nɔ wo bɔɔla i la hanige ma sarika la, kɔnɔ i te nɔ wo bɔɔla lahiri lakamali sarika kan na. 24Wo kana kolofeŋɛ bɔɔ sarika la Alatala ye min be tɔntɔnden, a kayiya be tiɲaren, ka wo ma a be kunturen. Wo kana wonu siila bɔɔ sarika la wo la jamanɛ tɔ. 25Wo kana wo kolofeŋɛ mɔɔle yo labita luntaŋɛnu bolo, wo ni naa anu bɔɔ sarika la wo Marige Ala ye, bayi anu bale bele bɛnden, anu bele kamaliren. Ala te wo jigan.›»
26Alatala kumata Musa ye a ko: 27«Ningi deŋɛ, saaka deŋɛ, anun baa deŋɛ tini sɔtɔ, anu ni to anu nɛɛnɛ kɛn kɔtɔ tele wɔrɔwila. Min na sɔtɛ bata tele sagin bɔɔ, wo si nɔ bɔɔla sarika bintannɛŋɛ la nde Alatala ye. 28Wo kana ninge, ka wo ma saaka nun a la deŋɛ kannatɛgɛ lun dɔndɔ.
29Ka wo be sarika bɔɔla nde Alatala tantu koe la, wo a bɔɔ a bɔɔ ɲa ma alako a ni a jigan. 30Wo butɔ, wo sarika sube ni dɔmɔ wo lun yati, wo kana fenfen to han saguma. Nde le mu Alatala la.
31Wo ni n na yamɔrenu labatu wo ni anu bita. Nde le mu Alatala la. 32Wo kana n tɔgɔ saniyandeŋɛ tɔgɔtiɲa. Isirayila kaanu bɛnta anu ni a lɔn n saniyanta. Nde le mu Alatala la, min be wo kɛrɛkɛrɛla. 33Nde le ka wo labɔɔ Misira duge tɔ, n ni ma wo Marige Ala la. Nde le mu Alatala la.»
Currently Selected:
Lewi bɔnsɛnu la sariya 22: MOG
Highlight
Share
Compare
Copy
Want to have your highlights saved across all your devices? Sign up or sign in
