Lewi bɔnsɛnu la sariya 20
20
Ko kɔndeŋɛ Ala mafanna
1Alatala kumata Musa ye, a ko: 2«A fɔ Isirayila kaanu ye, ka a taranta Isirayila kaa do, ka wo ma luntaŋɛ do min be sabatiren Isirayila duge tɔ, ka a ka a la deŋɛ do bɔɔ sarika la kuye ye min tɔgɔ Mɔlɔku, fɔ jama ni wo tigi mabun kurenu la tekku, han a ni faga. 3Nde tugun si n ɲamatelen wo tigi ma, n ni a labɔɔ jama ɲaama, bayi a bata n na dula saniyandeŋɛ manɔgɔ, a bata n tɔgɔtiɲa a la deŋɛ bɔɔ koe la sarika la kuye ye min tɔgɔ Mɔlɔku. 4Kɔnɔ ka a taranta, mɔgɛ min be a la deŋɛ bɔɔren sarika la Mɔlɔku ye, ka mɔgɛnu bata anu ɲamaki wo koe la, anu balanta wo tigi fagala, 5nde yɛtɛ si n ɲamatelen wo mɔgɛ nun a bɔnsɛ ma, n ni wonu labɔɔ anu la jama ɲaama, anun minnu bɛ ka n janfa wo kuye batu koe la.
6Ka mɔgɔ do ka n janfa a sɔta fɛrili malanu kɔma, anun mɔgɛ min be ɲana lakumala, n ni n ɲamatelen wo tigi ma, n ni a bee a la jama tɛma. 7Wo ni tagaman saniyaŋɛ butɔ, alako wo ni saniyan n ɲɛ, bayi nde le mu Alatala la, wo Marige Ala. 8Wo ni n na yamɔrenu labatu, wo ni anu makanta. Nde le mu Alatala la, min be wo lasaniyanna.
9Min yo ka a baaba danka, ka wo ma a nɛɛnɛ, fɔ wo tigi ni faga. A la faga sabue be fatanden a la wale le la, bayi a bata a baaba ka wo ma a nɛɛnɛ danka.
10Ka kaye do ka jeena ma anun a nɛɛnɛdɔndɛ la muse, wo kaye nun wo muse, fɔ anu ni faga tekku anu la langbeya sabu la.
11Ka kaye do nun a baaba la muse ka jeena ma, a bata ko koroŋɛ ma a baaba la. Kaye nun muse, wo ni anu fila bɛ faga. Anu la faga sabue be fatanden anu la wale le la.
12Ka kaye do nun a la deŋɛ la muse ka jeena ma, wo ni anu fila bɛ faga wo junube la ko la, bayi wo koe siila maɲin feu. Anu la faga sabue be fatanden anu la wale le la.
13Ka kaye nun kaye kafuta iko kaye be dariren a mala muse la ki min na, anu bata ko kɔndeŋɛ ma. Wo butɔ, fɔ anu fila bɛ ni faga. Anu la faga sabue be fatanden anu la wale le la.
14Ka kaye ka den musereŋɛ sigi a la muse la, a nata wo den musereŋɛ nɛɛnɛ tugun jigan muse la, wo butɔ anu bata ko masogindeŋɛ ma. Kaye ba, musenu ba, fɔ anu bɛ ni bintan ta la, alako wo ko masogindeŋɛ kana to wo tɛma.
15Ka kaye do ka kolofeŋɛ musuko, fɔ wo ni wo kaye nun wo kolofeŋɛ bɛ faga. 16Ka musu do ka a madon kolofeŋɛ la a ni kafu a fɛ, fɔ wo ni wo muse nun wo kolofeŋɛ faga tekku, wo ko koroŋɛ la ko la. Minnu ka kɛ koe mɔɔlenu ma, wonu faga sabue be fatanden anu la wale le la.
17Ka kaye ka a barenmuse jigan, a baaba dɔndɛ, ka wo ma a nɛɛnɛ dɔndɛ, a ni taga kafu a fɛ, wo koe mamaluta. Wo ni anu bee ka anu labɔɔ anu la jama ɲaama. A to bata kafu a barenmuse fɛ, fɔ wo junube kote ni sigi kaye kunma.
18Ka kayi do kafuta muse fɛ min be a la kari wale tɔ, a base bɔɔta kɛnɛ tɔ, anu fila bɛ ni bee, ka anu labɔɔ anu la jama ɲaama wo koe la.
19Wo kana kafu wo nɛɛnɛ dɔgɛ fɛ, ka wo ma wo nɛɛnɛ kɔtɔ, ka wo ma, wo baaba barenmuse. Bayi i biliya mɔgɛ le mu wonu la. Min be wo siila mala, a bɛnta wo kote ni sigi anu kunma.
20Ka kayi do kafuta a yaye fɛ, anu be wo junube kote donila le. Anu fila be naala fagala den sɔtɔbaliya le butɔ.
21Ka kayi do ka a dɔgɛ la muse jigan, ka wo ma a kɔtɔ la muse, a ni taga kafu a fɛ, wo mu saniyanbaliya le la, anu fila be naala fagala den sɔtɔbaliya le butɔ.
22Wo ni n na sariya nun n na yamɔre bɛ labatu, wo ni a bɛ makanta, alako wo duge kana taga wo aɲɛ, n be wo donila duge min tɔ, wo ni taga sabati ɲɔ. 23N be see minnu beela wo ɲatɔ wo duge tɔ, wo kana anu la naamuŋɛnu jokki de, bayi anu be wali koroŋɛ min mala, wo bata sɛɛya n ɲɛ. 24N bata a fɔ wo ye: ‹Anu la duge be nala mala wo tɛŋɛ le la, nde yɛtɛ le be a diila wo ma, nɔnɛ nun kumɛ te ban ka min na.› Nde le mu Alatala la, wo Marige Ala, min ka wo masubɛ seenu tɛma.
25Wo ni subu ladagɛreŋɛ nun subu latɔndeŋɛ tɛtɛgɛbɔɛ sa, a nun konden latɔndeŋɛnu anun a ladagɛreŋɛnu, alako wo kana wo yɛtɛ ma manɛfi anu la ko la. N bata tɔŋɛ sigi wo subenu la, konden natɔndeŋɛnu anun nilama mɛsɛŋɛnu minnu be buubula duge tɔ. Anu ma saniyan. 26Wo ni ma n na jama saniyandeŋɛ la, bayi nde Alatala saniyanta. N bata wo masubɛ seenu tɛma, alako wo ni ma n tɛŋɛ la.
27Kaye ka wo ma muse min be ɲana lakumala, ka wo ma a ni ma fɛrili malá la, wo ni a mabun tekku kure la han a ni faga. Wo butɔ, a la faga sabue be fatanden ale yɛtɛ le la.»
Currently Selected:
Lewi bɔnsɛnu la sariya 20: MOG
Highlight
Share
Compare
Copy
Want to have your highlights saved across all your devices? Sign up or sign in
