Lewi bɔnsɛnu la sariya 19
19
Isirayila jama la saniyaŋɛ
1Alatala kumata Musa ye, a ko: 2«A fɔ Isirayila jama bɛ ye, i ko: Wo ni saniyan, bayi wo Marige nde Alatala, n be saniyanden. 3Bɛ ni a nɛɛnɛ nun a baaba biliya. I ni i hakkile to sulen lɔ́gɛ́ sariya ma. Nde le mu Alatala la, wo Marige Ala.
4Wo kana taga kuyenu batudula, wo kana nɛgɛ lakunɛn ka a ɲiɲa kuye la. Nde le mu Alatala la, wo Marige Ala.
5Ka wo be kanunteya sarika bɔɔla nde Alatala ye, wo a bɔɔ a bɔɔ ɲa ma, alako n ni a jigan wo ye. 6Wo sarika sube ni dɔmɔ a faga luŋɛ, ka wo ma wo tabantaka. Sube min tota han tele saba, wo ni bintan gbikki. 7Min tagata to han tele saba, a si ma fondo manɛfireŋɛ la, n te wo sarika jigan bitugun. 8Ka min tagata wo sube dɔmɔ, wo tigi si a sɔŋɛ sɔtɔ le, bayi a bata nde Alatala la saniyaŋɛ fɛɛya. Wo tigi si bɔɔ Isirayila jama ɲaama.
9Wo tini sɛnɛ tɔ dɔmɛ tɛgɛ wo bata, wo kana a fɛfɛnu tɛgɛ. Tɔnsɛ minnu be boela duge tɔ, wo kana saagi wonu matɔnbɔnna. 10Wo tini rɛsɛn deŋɛ bɔɔ wo la kifeŋɛnu tɔ, wo kana saagi a matɔnbɔnna. Min be boela duge tɔ, wo be wo tugun tola ɲɔ fondobɔnɛnu le ye, anun luntaŋɛnu. Nde le mu Alatala la, wo Marige Ala.
11Wo kana kankaya ma. Wo kana mamadakue ma. Wo kana wo filaɲɔgɛ janfa. 12Wo kana wo kali n tɔgɛ la foniya kunma, ka wo ka wo ma, wo be wo Marige Ala le tɔgɛ tiɲala. Nde le mu Alatala la.
13Wo kana wo nɛɛnɛdɔndɛ tɔɔrɔ ka fondo bosi a bolo. Wo kana wo la walilá la wali sɔŋɛ to han sinan.
14Wo kana tolobɔnɛ nani, wo kana fenfen sa ɲabɔnɛ ɲatɔ min si a ma a ni boe. Wo ni kilan nde Ala la. Nde le mu Alatala la.
15Wo kana kiite sa fisamanteya la. Wo kana fisamanteya yita mɔgɔ yo la, a mata fondobɔnɛ la ba, a mata banná la ba. Wo ni kiiti telendeŋɛ sa wo nɛɛnɛdɔndɛnu tɛma. 16Wo kana tagaman wo kafuɲɔgɛ tɔgɔtiɲa koe la. Wo kana wo filaɲɔgɛ tɔɲɛgɛ ka foniya sa a kunma, alako a ni faga. Nde le mu Alatala la. 17Wo kana wo nɛɛnɛdɔndɛ kɔn wo juse tɔ, kɔnɔ wo ni a lasii, alako wo kana junube sɔtɔ a la. 18Wo kana wo tɛŋɛ yɔgɔ. Wo kana dumɛŋɛ mandi wo la jamanɛ deŋɛnu ye. Wo ni wo mɔgɔɲɔgɛ kanu iko wo yɛtɛ. Nde le mu Alatala la.
19Wo ni n na yamɔrenu labatu. Wo kana kolofeŋɛ mɔɔli fila to wo la wɔɔrɛ tɔ anu ni yɛlɛ ɲɔgɔn ma. Wo la sɛnɛ tɔ tugun, suge mɔɔli fila kana ki sɛnɛ dɔndɔ tɔ. Wo kana kuta dɔndɔ kara kolofen te gese anun gese hɔɔrɛ la.
20Misali la, kayi do bata kafu jon muse do fɛ. Wo jon muse, kayi do be a futula, kɔnɔ muse ma kunsara, a ma hɔrɔya sɔtɔ betunna. Kaye nun a kafuta jon muse min fɛ, kɛ sariya be sigila anu fila kunma. Anu kana faga, bayi muse be jonya le tɔ betunna. 21Kɔnɔ wo kaye ni saaka kontoŋɛ bɔɔ fan nasaagi sarika la Alatala ye hɔrɔma dingira tanta dondula ɲakɔtɔ. 22Sarika lakelá ni wo saaka kontoŋɛ ma kunsara la a ye Alatala ɲala. A ni ma fan nasaagi sarika la alako a be junube min maren, a ni kafari.
23Ka wo donta Kanana duge tɔ, wo tini kifeŋɛ mɔɔle bɛ ki ɲɔ, anu wole be haramuren de wo ma han san saba; wo kana anu wole dɔmɔ. 24Min bɛ be wolola a san naaniɲɔgɛ la, wo be wo wole bɔɔla le, wo ni anu kɛrɛkɛrɛ nde Alatala le ye tantue butɔ. 25Min be naala wolola a san looluɲɔgɛ la, wo si nɔ wo wolenu bɔɔla wo ni anu dɔmɔ. Wo butɔ, wo si naa wole siyama sɔtɔ. Nde le mu Alatala la, wo Marige Ala.
26Wo kana subu yo dɔmɔ wo ma min base labɔɔ. Wo kana fɛrili ma walenu ma, wo kana dureya ma.
27Wo kana wo kunsige tɛgɛ min be wo kuŋɛ fɛfɛ tɔ, wo kana wo da te fɛfɛ si. 28Faga la ko suunɛ kana a ma, wo ni wo bale matɛgɛ. Wo kana pirinte ma wo bale ma. Nde le mu Alatala la.
29Wo kana wo la den musereŋɛnu mayita langbeya la, alako wo la duge kana ma langbe duge la, a ni fa ko masogindeŋɛ la.
30Wo ni wo hakkile to n na sulen lɔgɛnu sariya ma, anun n na dula saniyandeŋɛ. Nde le mu Alatala la.
31Wo kana mɔgɔ ɲini min si ɲananu lakuma fɔ wo ye. Wo kana fɛrili malanu jokki, ka wo ma wo si ma saniyanbalenu la. Nde le mu Alatala la, wo Marige Ala.
32I ni wuli kayiba ye fuga bata bɔɔ min kuŋɛ tɔ, i ni anu biliya. Wo butɔ, i ni kilan nde Ala la, i Marige. Nde le mu Alatala la.
33Ka luntaŋɛ nata sabati wo bata wo la duge tɔ, wo kana koronya a la. 34Wo ni wo luntaŋɛ siila bita iko wo nɛɛnɛdɔndɛ. Wo ni a kanu iko wo yɛtɛ yati, bayi wole tugun mata le nun luntaŋɛ la Misira duge tɔ. Nde le mu Alatala la, wo Marige Ala.
35Wo kana telenbaliya yo ma, kiiti sa dula, fondo la kayanya suman dula, fondo la biliya suman dula, fondo fareŋɛ suman dula. 36Wo la sikele ni kamali. Wo ni sumarifeŋɛ kamalireŋɛnu lawali. Nde le mu Alatala la, wo Marige Ala, min ka wo labɔɔ Misira duge tɔ. 37Wo ni n na yamɔrenu labatu, wo ni anu makanta. Nde le mu Alatala la.»
Currently Selected:
Lewi bɔnsɛnu la sariya 19: MOG
Highlight
Share
Compare
Copy
Want to have your highlights saved across all your devices? Sign up or sign in
