Lewi bɔnsɛnu la sariya 18
18
Saɲɔgɔya min be lakɔnden
1Alatala kumata Musa ye, a ko: 2«A fɔ Isirayila kaanu ye: Nde le mu Alatala la, wo Marige Ala. 3Wo kana Misira kaanu la naamuŋɛnu jokki wo be sabatiren ka min na nun. Wo mɛn kana Kanana kaanu tugun na naamuŋɛnu jigan n be wo donila ka min na. Wo kana anu la sariyanu jokki. 4Wo ni nde le la sariyanu jokki, wo ni n na yamɔrenu labatu, bayi nde le mu Alatala la, wo Marige Ala. 5Awa wo ni sɔ n na sariya nun n na yamɔrenu le kɔma. Mɔgɛ min be wonu labatula, a si simaya sɔtɔ le wonu sabu la. Nde le mu Alatala la.
6Wo kana kafu wo sɔtɔɲɔgɛ ka wo ma wo futuɲɔgɛ fɛ. Nde le mu Alatala la.
7Wo kana kafu wo nɛɛnɛ fɛ, a si ma wo baaba ye maluya la. Wo nɛɛnɛ mu wo nɛɛnɛ le la, wo kana kafu a fɛ.
8Wo kana kafu wo baaba la musu do fɛ, a si ma wo baaba ye maluya la.
9Wo kana kafu wo barenmuse fɛ.
10Wo kana kafu wo la den kayireŋɛ la den musereŋɛ fɛ, wo kana kafu wo la den musereŋɛ la den musereŋɛ fɛ. Anu be fatanden wo yɛtɛ bale le la.
11Wo kana kafu wo baaba la musu do la den musereŋɛ fɛ min sɔtɛ be fatanden wo baaba la. Wo barenmuse le mu a la.
12Wo kana kafu wo baaba barenmuse fɛ, wo baaba sɔtɔɲɔgɛ le mu a la.
13Wo kana kafu wo nɛɛnɛ dɔgɛ fɛ, ka wo ma a kɔtɔ. Wo nɛɛnɛ sɔtɔɲɔgɛ le mu a la.
14Wo kana kafu wo baaba dɔgɛ la muse fɛ, ka wo ma a kɔtɔ la muse. Wo baaba dɔgɛ, ka wo ma a kɔtɔ le tɛŋɛ mu wo muse la. Wo nɛɛnɛ anun wo nanden de be tabɛnden anu ma.
15Wo kana kafu wo la deŋɛ la muse fɛ, wo la deŋɛ le tan mu a la.
16Wo kana kafu wo dɔgɛ, ka wo ma wo kɔtɔ la muse fɛ, a si ma a ye maluya la.
17A ma bɛn wo ni kafu musu do fɛ, wo ni kafu a la den musereŋɛ tugun fɛ. Wo kana kafu a la den kayireŋɛ tɛn den musereŋɛ fɛ, wo mɛn kana kafu a la den musereŋɛ tɛn den musereŋɛ fɛ. Wonu mu basi dɔndɔ le la. Wo koe masoginta.
18I kana i la muse dɔgɛ ka wo ma a kɔtɔ jigan anu ni ma siinama la, ka wo ma bɛsɛnkɔnnɛya si to le anu la simaya bɛ butɔ.
19Wo nun muse kana kafu a be a la kari wale tɔ, bayi a bele saniyanden.
20Saɲɔgɔya kana to wo nun wo nɛɛnɛdɔndɛ la muse tɛma, wo si ma saniyanbaliya la.
21Wo kana wo Marige Ala tɔgɛ mayo wo la deŋɛ bɔɔ koe sarika la kuye ye min tɔgɔ Mɔlɔku. Nde le mu Alatala la.
22Kaye nun kaye kana kafu. Ko kɔndeŋɛ le mu wo la. Kaye nun muse le bɛnta anu ni kafu.
23Kaye nun kolofeŋɛ kana kafu. Muse tugun nun kolofeŋɛ kana kafu. Wo koe mɔɔle maɲin feu.
24Wo kana wo manɔgɔ kɛ koe mɔɔlenu la. N be seenu minnu beela wo ɲatɔ, wonu kan ka anu yɛtɛ manɔgɔ kɛ koe mɔɔlenu le la. 25Anu la ko koroŋɛnu bata duge yati manɔgɔ. N bata anu ɲagankata wolo la, han duge yati be anu aɲɛla. 26Wole Isirayila kaanu kan, anun luntaŋɛ minnu be wo tɛma, wo ni n na sariya nun n na yamɔrenu labatu. Wo kana kɛ ko kɔndeŋɛnu yo ma! 27Wo be tagala sabatila duge min tɔ, ɲɔ kaanu bata wo koe mɔɔle bɛ ma nun. Kɛ duge mata dula saniyanbale la wolo la. 28Ka wole tugun tagata wo koe mɔɔle ma ɲɔ, duge si wole tugun aɲɛ le, iko a ka see doenu aɲɛ ki min na. 29Mɔgɔ yo min be wo mɔɔle mala, a si bɔɔ le Isirayila jama ɲaama. 30Wo ni n na yamɔrenu labatu, wo kana wo ko kɔndeŋɛnu ma iko mɔgɛ minnu be ɲɔ nun yannun wole ni ke ɲɔ. Wo kana ma mɔgɔ saniyanbalenu la. Nde le mu Alatala la, wo Marige Ala.»
Currently Selected:
Lewi bɔnsɛnu la sariya 18: MOG
Highlight
Share
Compare
Copy
Want to have your highlights saved across all your devices? Sign up or sign in
