Ko fɔlɔfɔlɛ 43

Yaguba la Bunyamin boloka koe

1Kɔnkɛ bata sɛnbɛ sa Kanana duge tɔ. 2Yaguba nun a la denbaya to ka dɔmɛ bɛ ban dɔmɔla, anu ka min nati kabɔɔ Misira, a ka a fɔ a la deŋɛnu ye: «Wo mɛn ká taga dɔmɛ do san wo mɔ ye.» 3Juda ka a jaabi, a ko: «Wo mansa kɔnkɔnta le mɔ ma a beeyareŋɛ la, aa ka mɔ ma mɔ dɔgɛ doni mɔ fɛ, hali mɔ ma ke a ma. 4Ka i bata sɔn mɔ nun Bunyamin la taga koe la, mɔ si jigi mɔ ni taga dɔmɛ san i ye. 5Kɔnɔ ka i ma sɔn a ma, mɔ te taga, bayi wo kaye ka a fɔ le mɔ ye, aa ka mɔ ma mɔ dɔgɛ doni mɔ fɛ, hali mɔ ma ke a ma.» 6Wo kɔma Yaguba ka a fɔ: «Wo be ko koroŋɛ maren n na fenna? A fɔ koe la wo kaye ye dɔgɛ do be wo bolo wo bata.» 7Anu ka a jaabi, anu ko: «Ale kaye ka mɔ maɲininka le mɔ nun mɔ bɔnsɛ kɛɲa ma a bɛlɛma la. A ka a fɔ, aa ka mɔ baaba mɛn be baluren han bi? Aa ka mɔ dɔgɛ do be ɲɔ? Mɔle tugun ka a la ɲininkarenu bɛ jaabi. Mɔ ma a lɔn nun a si a fɔ mɔ ni mɔ dɔgɛ doni mɔ fɛ.»

8Juda ka a fɔ a baaba Yaguba ye, a ko: «Bunyamin boloka mɔ ni taga. Fɔ mɔ ni wuli mɔ ni taga. Wo tɛmuɛ ile nun mɔle, anun mɔ la deŋɛnu si balue sɔtɔ le, alako wo mɔ kana faga. 9Nde le bata sɔ kɛ deŋɛ la ko tɔ. I be naala a la ko maɲininkala nde le ma. Ka n ma a nati i ye n ni a don i bolo, a la ko bata kiti n na i mafanna kudai. 10Ka kɛ koe le ɲan bele mɔ lamɛren nun, kɔtɛ nun mɔ bata taga nun na kunɲama fila ma.»

11Yaguba ka a fɔ anu ye, a ko: «Bayi a fɛrɛ bele, awa wole tugun be kɛ-lɛ mala. Wo ni dugu lawale tɔnɛ donu sa bɛkke tɔ, alako wo ni a doni ale kaye ye sanba la: iko boore do anun kumɛ do, anun labundɛnu, anun sorayi nun yagalenu, anun poriti tiganu. 12Wo ka nafule min taran wo la bɛkkenu tɔ, wo ni a doni wo fɛ. Tumado wo be maren tantaŋɛ le la. Wo ni nafule do tugun jigan, wo be dɔmɛ sanna min na. 13Wo wuli wo ni wo dɔgɛ jigan wo ni taga ale kaye bata. 14Ala mu wo dɛmanna, Ala sɛnbɛ tige, ale kaye ni kinikini wo ma, a ni wo boloka alako wo nun Simeyɔn nun Bunyamin ni nɔ nala. Ka n fota n na deŋɛnu la, awa.»

15Yaguba la kɛ deŋɛnu ka Yusufu la sanba tabɛn, anun kɛ nafulu kunda fila. Anu ka kila bita anu jigita Misira, anu nun Bunyamin la. Anu tagata anu fan dantɛgɛ Yusufu ye. 16Yusufu to ka anu nun Bunyamin yen, a ka a fɔ a la bon kuŋɛ ye: «Kɛ kayenu ladon boŋɛ tɔ. Sube faga i ni dɔmɛ ɲiɲa, bayi nde nun kɛ kayenu le be dɔmɛ dɔmɔla bi tele tɔ.» 17Yusufu ka min fɔ a la bon kuŋɛ ye, a ka a ma. A ka anu doni Yusufu la boŋɛ tɔ. 18A be anu donila tɛmuɛ min tɔ Yusufu la boŋɛ tɔ, anu kilanta. Anu tota a fɔla: «Kɛ nafule le la ko be mɔ natiren yan, wo mɔ na fɔlɛ la anu ka min nasaagi wo mɔ la bɛkkenu tɔ. Alako anu ni boe mɔ ma anu ni mɔ ɲagankata, anu ni mɔ ma joŋɛnu la, anu ni mɔ la sofalenu bɔɔ mɔ bolo.» 19Anu ka anu madon Yusufu la bon kuŋɛ la, anu kumata a ye bonda tɔ. 20Anu ka a fɔ: «Mɔ marige, yandi diɲa. Mɔ bata na nun yan a fɔlɛ la dɔmɔ sandula. 21Mɔ saagi tɛmuɛ, mɔ to keta mɔ ki dula tɔ, mɔ ka mɔ la bɛkkenu da laka. Mɔ nata nafule min kɔnti fɛ nun dɔmɔ sandula, mɔ ka wo bere le taran bɛkkenu butɔ. Kɔnɔ mɔ mɛn bata a tanati. 22Mɔ ma a lɔn min yo ka mɔ la wo nafule sa mɔ la bɛkkenu butɔ. Mɔ mɛn bata nafule do nati mɔ fɛ alako mɔ mɛn ni dɔmɛ do san.» 23A ka anu jaabi, a ko: «Wo juse ká sa, wo kana kilan fenfen na. Wo nun wo baaba Marigi Ala le be kɛ harige diiren wo ma bɛkkenu butɔ. Wo la nafule kan donta le n bolo.» A ka Simeyɔn nabɔɔ anu ma.

24Ale kaye ka anu ladon Yusufu la boŋɛ tɔ. A ka je dii anu ma anu ka anu kɛŋɛnu lako. A ka dɔmɛ dii anu la sofalenu ma. 25Anu ka a mɔɛ ka a fɔla anu nun Yusufu be dɔmɔre mala ɲɔ le. Yannun Yusufu be donna tele tɔ, anu ka a la sanba tabɛn. 26Yusufu la nareŋɛ boŋɛ tɔ, anu ka a la sanba ladon boŋɛ butɔ, anu ka a dantɛgɛ a ye, anu mɛn ka anu majigi a ye duge tɔ. 27Yusufu ka anu maɲininka ka tana bele anu ma. Wo kɔma a ka a fɔ: «Wo ka wo baaba kikala min na ko fɔ n ɲɛ nun, tana bele a ma? Han bi a be ɲɔ?» 28Anu ka a jaabi, anu ko: «Mɔ baaba, i la joŋɛ, tana yo bele a ma. Han bi a be ɲɔ.» Anu ka anu majigi anu ka anu kunsin duge ma. 29Yusufu ka a ɲa lawuli a ka a nɛɛnɛdɔndɛ yen, Bunyamin, a dɔgɛ. A ka a fɔ, a ko: «Wo dɔgɛ le mu kɛ la, wo ka min na ko fɔ n ɲɛ nun?» A mɛn ka a fɔ: «N na den, Ala mu hinnɛla i la.» 30A dɔgɛ la ko kinikinɛ tota a juse tɔ, diri sɔgɛ ka a bita. A donta a kire tɔ a tota dila ɲɔ. 31Wo kɔma, a ka a ɲa kɔtɔ lako, a bɔɔta. A ka a fan tabita dire ma. A ka a fɔ, a ko: «Wo dɔmɛ fatan.» 32Anu ka a tɛŋɛ sa a katima, a kɔtɔnu tugun sigita anu katima. Misira kaanu minnu tugun be keleren, wonu sigita anu katima, bayi Misira kaanu anun Hebure mɔgɛnu te dɔmɔre ma kan dɔndɔ. Misira kaanu tana le wo la. 33Yusufu baaba dɔndɛnu sigita Yusufu ɲala teebile la anu la kinaya fisa ɲɔgɔn ko ki min na. Wo ka Yusufu baaba dɔndɛnu bɛ makaabɛ, anu bɛ tota ɲɔgɔn fɛlɛla. 34Yusufu ka a bɛ tɛn dɔmɛ don a bolo. Bunyamin la dɔmɛ tanbita a kɔtɔnu tɛŋɛ la sigi loolu. Anu bɛ ka dɔmɔre ma, anu ka beere min han a kunta.

Currently Selected:

Ko fɔlɔfɔlɛ 43: MOG

Highlight

Copy