Ko fɔlɔfɔlɛ 44

Yusufu la a kɔtɔnu mafɛlɛ koe

1Yusufu ka a la bon kuŋɛ yamɔri, a ko: «Kɛ mɔgɛnu la bɛkkenu lafa dɔmɛ la anu si nɔ min donila. I mɛn ni bɛ tɛn nafule sa a la bɛkke butɔ. 2I ni n na ji min pɔɔte jigan, kaalisinɛŋɛ. I ni a sa anu bɛ dɔgɔ tɔɛ la bɛkke butɔ, anun a la dɔmɔ sɔŋɛ.» Yusufu ka min bɛ fɔ a la bon kuŋɛ ye, a ka a ma.

3Ɲɔ to kɛnɛta, saguma anu ka kɛ mɔgɛnu boloka, anun anu la sofalenu. 4Anu bɔɔta saa butɔ. Kɔnɔ anu ma yanfaya koola, Yusufu ka a fɔ a la bon kuŋɛ ye: «Ile wuli, i ni kɛ mɔgɛnu jokki han i ni anu take. I ni a fɔ anu ye: ‹Wo be ko ɲinma falinden ko koroŋɛ la fenna?› 5Wo ka ji min pɔɔte kanka fenna n na mansa be min maren a la ji minfeŋɛ la anun fɛrili ma feŋɛ? Wo bata ko koron ma, wo koe ma koe la.» 6Bon kuŋɛ to keta anu ma, a ka kɛ kuma lasaagi anu ma. 7Anu ka a jaabi anu ko: «Marige, fen de be a maren i be kumala kɛ mɔɔle la ka? I la joŋɛnu te suusɛ wo koe mɔɔle mala feu! 8I ka a lɔn mɔ ka nafule min yen mɔ la bɛkkenu butɔ Kanana duge tɔ, mɔ ka a nati le i ye mɔ fɛ. Mɔ be kaalise kankala fenna i la mansa la boŋɛ butɔ, ka wo ma sanuɛ? 9Awa, mɔ nun mɔ la kotenu fɛlɛ, ka i ka i la fondo hali dɔndɔ le taran i la jon dɔndɔ bolo, a ni faga. Mɔle tɔmanu tugun ni ma i la joŋɛnu la.» 10Bon kuŋɛ ka a fɔ: «Awa, wo be min fɔren ka, n bata sɔn wo la. Kɔnɔ ka n ka fondo dɔndɔ taran mɔgɔ min bolo, wo kan bata ma n na joŋɛ la, wo tɛmuɛ, tɔmanu kan bata kisi.» 11A bɛ ka a la bɛkke lajigi duge tɔ teriya la, anu ka a lafulen. 12Bon kuŋɛ ka ɲinire fɔlɔ kayiba ma, a ka a laban dendeŋɛ ma. Kɛ kaalise ji min pɔɔte yenta Bunyamin la bɛkke le butɔ. 13Anu ka anu la kutanu mafara anu ma. Anu bɛ ka anu la kotenu bakki sofalenu kɔɛɛ tɔ, anu tasaagita saa tɔ.

Juda la mamajɛjɛ

14Anu la kereŋɛ saa tɔ, Juda nun a baaba dɔndɛnu tagata Yusufu bata boŋɛ tɔ, anu ka a taran ɲɔ. Anu boeta a ye duge tɔ. 15Yusufu ka a fɔ anu ye: «Wo be fen de maren ka? Wo ma a lɔn kaye, iko nde, n si nɔ fɛrile mala koe bɛ la?» 16Juda ka a jaabi, a ko: «Mɔ si nɔ fen fɔla n marige ye? Mɔ si kuma a ye kama le? Mɔ si nɔ beeyaala kɛ koe tɔ kama le? Ala bata i la joŋɛnu la ko koroŋɛ makɛnɛn. Mɔle, anun kɛ kaalise ji min pɔɔte be yenden mɔgɛ min bolo, mɔ bɛ le bata ma n marige la joŋɛ la.» 17Yusufu ko anu ma: «N te suusɛ wo mɔɔle mala feu! Kɛ kaalise ji min pɔɔte be yenden mɔgɛ min bolo, wolo mu n na joŋɛ la. Kɔnɔ wole tɔmanu ká saagi wo baaba dula jususa butɔ.»

18Juda ka a madon Yusufu la, a ka a fɔ a ye: «N marige, yandi, n bata i taran, a to i la joŋɛ ni kuma n marige ye. I juse kana yɛlɛ i la joŋɛ ma, bayi i be toren de iko Misira mansa. 19N marige ka a la joŋɛnu maɲininka le a fɔlɛ la, a fɔla, aa ka mɔ baaba be ɲɔ ba, ka wo ma mɔ dɔgɛ? 20Mɔ ka i jaabi: ‹Mɔ baaba kayiba be ɲɔ, anun mɔ dɔgɛ Bunyamin, a ka min sɔtɔ a la kayibaya butɔ. Ale le di a baaba ye. A nɛɛnɛ la deŋɛnu tɔ, a dɔrɔn de be toren, bayi a kɔtɔ bata faga.› 21I ka a fɔ le mɔ ye, aa mɔ ni a nati i ye alako i ni a yen i ɲa la. 22Mɔ ka i jaabi: ‹Kɛ dendeŋɛ te nɔ bɔɔla a baaba kɛnna, ka wo ma a baaba si faga le.› 23Kɔnɔ i ka a fɔ le mɔ ye, ka mɔ nun mɔ dɔgɛ bɛ ma na, hali mɔ ma ke i ma. 24Mɔ to saagita mɔ baaba dula, i la joŋɛ, mɔ ka n marige la kumanu lake a ma. 25Mɔ baaba to ka a fɔ, aa mɔ ni taga dɔmɛ do san mɔ ye, 26mɔ ka a jaabi: ‹Mɔ te nɔ tagala Misira, ka mɔ bɛ nun mɔ dɔgɛ ma. Ka mɔ bɛ le, mɔ si taga, bayi wo kunma fɔla ka a fɔ le aa ka mɔ nun mɔ dɔgɛ le bɛ ma taga, aa hali mɔ ma ke a ma.› 27I la joŋɛ, mɔ baaba ka a fɔ le mɔ ye, a ko: ‹Wo ka a lɔn n na musu Rakeli ka den kayiren fila le sɔtɔ n ɲɛ. 28Dɔndɛ bɔɔta n kunma, n hakkili be a ma burun butɔ sube bata a mafara, bayi han bi n ma a yen. 29N bata kɔtɔya. Ka wo ka kɛ tugun jigan n bolo, ka ko do tagata a masɔtɔ, n be fagala le n be suunuuren wo la tiɲare la.› 30Kɔnɔ, ka n saagita kɔtɛ n baaba dula, i la joŋɛ, mɔ nun kɛ dendeŋɛ bɛ ma, 31n baaba tini a yen kɛ dendeŋɛ bele naren, a si faga le, bayi a ni jule le mu Bunyamin la. Wo tɛmuɛ i la joŋɛnu bata anu baaba kɔtɔyareŋɛ faga a be suunuuren. 32Wo tanbi kɔma, i la joŋɛ ka a yɛtɛ sigi le sɛɛkɛ la, kɛ dendeŋɛ la ko tɔ. N bata a fɔ nun n baaba ye: ‹Ka mɔ nun Bunyamin ma saagi a baaba dula, wo bata ma n na kote la kudai.› 33Awa kɔtɛ, n bata i táran yandi, i la joŋɛ ni to kɛ dendeŋɛ faliŋɛ la, n ni ma n marige la joŋɛ la, alako kɛ dendeŋɛ nun a kɔtɔnu ni saagi mɔ bata. 34N si nɔ saagila n baaba ma kama le, ka mɔ nun kɛ dendeŋɛ bɛ ma? N te nɔ a tola n baaba ni tɔɔrɔ n ɲala.»

Currently Selected:

Ko fɔlɔfɔlɛ 44: MOG

Highlight

Copy