Ko fɔlɔfɔlɛ 42

Yusufu kɔtɔnu la taga fɔlɛ Misira

1Yaguba to ka a mɔɛ dɔmɛ be Misira, a ka a fɔ a la deŋɛnu ye, a ko: «Fen de be a maren wo be sigiren yan wo be ɲɔgɔn fɛlɛla tun? 2N bata a mɔɛ dɔmɔ sannɛŋɛ be Misira. Wo jigi ɲɔ la wo ni taga dɔmɛ san mɔ ye, alako wo mɔ ni balu, wo mɔ kana faga.» 3Wo butɔ, Yusufu kɔtɔ mɔgɔ tan jigita Misira dɔmɔ sandula. 4Yaguba ma Yusufu dɔgɔ Bunyamin boloka, a ni a baaba dɔndɔ kɔtɛnu jokki, bayi a ka a fɔ a ko: «N be kilanden de, ko koroŋɛ kana a masɔtɔ.» 5Yaguba la deŋɛnu tagata dɔmɔ sandula, anun mɔgɛnu donu tugun, minnu be tagaren dɔmɔ sandula, bayi kɔnkɛ bata tugu Kanana jamanɛ la.

6Wo wagate Yusufu le mu jamanɛ kunma fɔlá la. Ale le be dɔmɛ sanna jamanɛ mɔgɛ bɛ ma. Yusufu kɔtɔnu nata anu majigi a ye, anu kimisirinta a ye han anu ka anu tindɛ sɔ duge tɔ. 7Yusufu to ka a kɔtɔnu yen, a ka anu talɔn. Kɔnɔ a ka a yɛtɛ mafu anu ma, a tota iko a ma anu lɔn. A kumata anu ye a bɛlɛma la. A ka a fɔ anu ye: «Wo be bɔɔren mina le?» Anu ka a jaabi, anu ko: «Mɔ be bɔɔren Kanana duge tɔ le, mɔ be naren dɔmɔ sandula.» 8Yusufu ka a kɔtɔnu talɔn, kɔnɔ wonu ma ale talɔn. 9Yusufu ka a la kiboenu talɔn, a ka minnu sa nun a kɔtɔnu la ko tɔ. A ka a fɔ anu ye, a ko: «Wo mu nafige le la. Wo be naren de alako duge ka min bele makantaren wo ni ɲɔ don ɲa lɔn.» 10Anu ka a jaabi, anu ko: «Ade n marige, i la joŋɛnu be naren dɔmɔ sandula le. 11Mɔle bɛ mu kayi dɔndɔ le la deŋɛ la. Mɔ mu mɔgɔ telendeŋɛ le la. I la joŋɛnu bele naren nafigiya le la de!» 12A ka a fɔ anu ye, a ko: «Foniya le. Wo be naren de alako duge ka min bele makantaren wo ni ɲɔ don ɲa lɔn.» 13Anu ka a jaabi anu ko: «Mɔle, i la joŋɛnu, mɔ mɔgɔ tan nun fila le nun, mɔ bɛ mu kayi dɔndɔ le la deŋɛ la Kanana duge tɔ. Mɔ dɔgɛ be mɔ baaba kɛnna boŋɛ tɔ. Kɔnɔ dɔndɔ kan bata bɔɔ mɔ la.» 14Yusufu ka a fɔ anu ye, a ko: «N ka kɛlɛ fɔ wo ye nun, wo mu nafige le la. 15N be wo mafɛlɛla kɛlɛ la ka wo tɔɲa le. N bata n kali Misira mansa tɔgɛ la, wo te bɔɔ yan fanni wo dɔgɔ dɔgɔmaŋɛ ma na yan. 16Wo mɔgɔ dɔndɔ kii wo tɛma, a ni taga a nati. Wole tɔmanu kan be sala geele tɔ le. N si naa wo la kuma fɛlɛ alako n ni a lɔn ka wo be tɔɲa le fɔren n ɲɛ. Ka wo ma, n bata n kali Misira mansa tɔgɛ la wo mu nafige le la.» 17A ka anu sa geele tɔ han tele saba.

18A tele saba luŋɛ, Yusufu ka a fɔ anu ye, a ko: «N be min fɔla wo ye, fɔ wo ni wolo ma, alako wo ni kisi, bayi n be kilanden Ala la. 19Ka wo mu mɔgɔ telendeŋɛ le la, wo mɔgɔ dɔndɔ to geeli boŋɛ tɔ. Tɔmanu ni dɔmɛ doni wo la denbayanu ye kɔma, bayi kɔnkɛ be anu la. 20Wo ni wo dɔgɛ dɔgɔmaŋɛ nati n bata, alako n ni a lɔn ka wo ka tɔɲa le fɔ. Wolo si a ma wo si naa kisi.» Anu ka wolo ma. 21Anu tota a fɔla ɲɔgɔn tɛma: «Ee, mɔle le yati gbaa be mɔ dɔgɔ Yusufu ma, bayi mɔ ka a la tɔɔrɛ yen de. A ka mɔ madiya, kɔnɔ mɔ ɲan ma mɔ tolomasɔ a la. Wo koe le be a maren wo mɔ be kɛ tɔɔrɛ sɔtɔren.» 22Rubɛn ka a fɔ anu ye, a ko: «N ma a fɔ le nun wo ye wo mɔ kana ko koron ma Yusufu la? Kɔnɔ wo ma sɔn wo tolomasɔla n na. Awa, a hakkɛ le be wo mɔ takeren ka.» 23Kɔnɔ anu be kɛ kuma fɔla tɛmuɛ min tɔ, anu bele a lɔnden nun ka a fɔla Yusufu bata anu kumari kulɛ mɔɛ, bayi kuma matanbila be anu tɛma. 24Yusufu ka a matuntun anu la, a dita. Wo kɔma a nata kuma anu ye. A ka Simeyɔn jigan anu tɛma a ka a kiti anu bɛ ɲala.

Yusufu kɔtɔnu saagi koe Kanana duge tɔ

25Yusufu ka yamɔre dii a kɔtɔnu la bɛkkenu lafa koe la dɔmɛ la. Anu ni bɛ tɛn nafule lasaagi a la bɛkke tɔ, anun anu la kila fandanu la. Wolo mata anu ye. 26Anu ka anu la dɔmɔ kotenu sa anu la sofalenu kɔɛɛ tɔ, anu tagata.

27Anu to keta anu ki dula tɔ, dɔndɔ ka a la bɛkke da laka alako a ni dɔmɛ dii a la sofale ma. A ka a la nafule yen saren bɛkke butɔ. 28A ka a fɔ doenu ye, a ko: «Anu bata n na nafule lasaagi n ma. Ale le be n na bɛkke butɔ ka.» Wo koe ka anu juse labɔɔ, a ka anu kilan. Anu tota ɲɔgɔn maɲininkala: «Ala be fen de maren mɔ la ka?»

29Anu la kereŋɛ anu baaba Yaguba ma Kanana duge tɔ, koe min bɛ ka anu masɔtɔ, anu ka a bɛ ɲamakaran anu baaba ye, 30anu ko: «Kaye min mu ɲɔ jamanɛ kunma fɔla la, a ka kuma bɛlɛŋɛnu sɔ le mɔ ma. A mɛn ka mɔ ma a la duge manafigiya mɔgɛnu la. 31Mɔ ka a fɔ a ye: ‹Mɔgɔ telendeŋɛ le mu mɔ la, nafigi ma mɔ la. 32Mɔ mɔgɔ tan nun fila le mu nun, a bɛ kayi dɔndɔ la deŋɛnu. Dɔndɔ bata bɔɔ mɔ la, bi mɔ dɔgɛ be mɔ baaba kɛnna Kanana duge tɔ.› 33Kɛ kaye min mu ɲɔ jamanɛ kunma fɔla la, a ka a fɔ le mɔ ye, a ko aa si a lɔn min na ka mɔ mu mɔgɔ telendeŋɛ le la: aa mɔ ni mɔgɔ dɔndɔ to a bolo, mɔ ni dɔmɛ nati mɔ la denbayanu ye min si bɛn anu ye, bayi kɔnkɛ be anu la. 34Aa mɔ ni na mɔ dɔgɔ dɔgɔmaŋɛ doni a ye, wolo mu a si a lɔn ka a fɔla nafigi ma mɔ la, mɔ mu mɔgɔ telendeŋɛ le la. Aa wo tɛmuɛ a si mɔ baabadɔndɛ don mɔ bolo, mɔ mɛn si nɔ mɔ la koenu latagamanna jamanɛ butɔ.»

35Anu to ka anu la bɛkkenu yɛlɛman, bɛ ka a la dɔmɔ sɔŋɛ yen nafulu sa bɔɔtɛ butɔ a la bɛkke tɔ. Anu bɛ nun anu baaba ka kɛ nafule yen, anu bɛ kilanta. 36Anu baaba Yaguba ka a fɔ anu ye a ko: «Wo bata n nafo n na deŋɛnu la: Yusufu bata bɔɔ n bolo, Simeyɔn tugun bata bɔɔ n bolo. Wo mɛn be diren Bunyamin le tugun jiganna ka. Kɛ kote bɛ be sigila nde le kunma.» 37Rubɛn ka a fɔ a baaba ye, a ko: «Bunyamin don n bolo n mɛn si a nati le i ye. Ka n ma a nati i ye, i tini wuli i si nɔ n na den fila fagala.» 38Yaguba ka a jaabi, a ko: «Ade, n na deŋɛ nun wole te taga, bayi a kɔtɔ bata faga, a dɔrɔn de be toren. N bata kɔtɔya. Ka ko do tagata a masɔtɔ wo la biyase tɔ, n be fagala le n be suunuuren wo la tiɲare la.»

Currently Selected:

Ko fɔlɔfɔlɛ 42: MOG

Highlight

Copy