Hɔrɔya 40
40
Ala la yamɔre hɔrɔma dingira sɔ koe la
1Alatala kumata Musa ye, a ko: 2«Kari fɔlɛ sɔ fɔlɛ, i si hɔrɔma dingira lawuli le, min be tabɛnden bɛndula boŋɛ ma. 3I si seedeɲɔgɔya kankira sigi le ɲɔ, i ni a ɲamadogon parawan banba la. 4I si teebile nati le, i ni a miraŋɛnu sigi a kunma a kɛɲa ma. I ni lanpu sigifeŋɛ nati, i ni a lanpuenu sigi ɲa ɲiɲa. 5I ni sorayi saniyandeŋɛ bintandula sanunɛŋɛ sigi seedeɲɔgɔya kankira ɲakɔtɔ, i ni parawan doe bakku hɔrɔma dingira dondula tɔ. 6Wo kɔma, i be sarika bintandula sigila hɔrɔma dingira dondula le ɲakɔtɔ, min mu bɛndula boŋɛ la. 7I be ji madɛnfeŋɛ sigila bɛndula boŋɛ nun sarika bintandula le tɛma, i ni naa je sa a butɔ. 8I be hɔrɔma dingira bɛ lamilinna tatta le la, i ni naa parawan bakku wo tatta dondula tɔ. 9I si tulu saniyandeŋɛ jigan de min si koe yita Ala la, i ni a sa hɔrɔma dingira anun miraŋɛ min bɛ be ɲɔ butɔ. I be a kɛrɛkɛrɛla Alatala ye ɲɔgɔnna le, anun a la miraŋɛ bɛ, anu bata saniyan. 10I mɛn ni wo tulu saniyandeŋɛ sa sarika bintandula ma, anun a la miraŋɛ bɛ, i be a kɛrɛkɛrɛla ɲɔgɔnna le, a bata saniyaŋɛ fisamante sɔtɔ. 11I ni a sa ji madɛnfeŋɛ nun a sigifeŋɛ tugun ma, i be a kɛrɛkɛrɛla ɲɔgɔnna le.
12I si Harona nun a la den kayireŋɛnu madon de bɛndula boŋɛ dondula tɔ, i ni anu ko wo je la. 13I si donfeŋɛ saniyandeŋɛnu lajigi le Harona ma, i ni tulu saniyandeŋɛ sa a ma min si a yita Ala la, i be a kɛrɛkɛrɛla ɲɔgɔnna le, a ni ma n ɲɛ n na sarika lakela la. 14I si a la den kayireŋɛnu tugun madon de, i ni doroki banba kɔtɔnɛŋɛnu lajigi anu ma. 15I ni naa tulu saniyandeŋɛ sa anu ma min si anu yita Ala la, iko i be a mala anu baaba ye ki min na, alako ande tugun ni ma n na sarika lakelanu la. Wo tulu saniyandeŋɛ sa koe be mala anu bɔnsɛ bɛ le ye abada, hɔrɔma dingira wale ma koe la.»
Hɔrɔma dingira sɔ koe
16Alatala ka Musa yamɔri min bɛ la, a ka a bɛ ma le.
17A san filaɲɔgɛ, kari fɔlɛ dan fɔlɛ, hɔrɔma dingira lawulita. 18Musa ka hɔrɔma dingira lawuli: a ka sɔfeŋɛnu sɔ, a ka kebeŋɛnu sigi anu tɔ, a ka anu takuntu lɔgɔ kayanmanu la, wo kɔma a ka tuganu lawuli. 19A ka mabutinfeŋɛnu lafonti hɔrɔma dingira kunma, han a ka a tɔɛ sa a kunma, iko Alatala ka a yamɔri ki min na.
20A ka seedeɲɔgɔya walanu jigan, a ka anu sa kankira butɔ, a ka lɔgɔ kayanmanu don kankira kurundanu tɔ, a ka junubu kafari dataguraŋɛ sa kankira da la. 21A ka kankira ladon bɛndula boŋɛ butɔ, a ka parawan banba bakku a ɲaama, a ni seedeɲɔgɔya kankira ɲamadogon, iko Alatala ka a yamɔri ki min na.
22A ka teebile sigi bɛndula boŋɛ butɔ, bolo mara mafanna, parawan banba ɲakɔtɔ. 23A ka dɛgɛnu saɲa ɲiɲa ɲɔ kunma, Alatala ɲakɔtɔ, iko Alatala ka a yamɔri ki min na.
24A ka lanpu sigifeŋɛ sigi bɛndula boŋɛ butɔ, bolo ɲinma mafanna, teebile ɲakɔtɔ. 25A ka a lanpuenu sigi ɲa ɲiɲa Alatala ɲakɔtɔ, iko Alatala ka a yamɔri ki min na.
26A ka sorayi saniyandeŋɛ bintandula sanunɛŋɛ sigi bɛndula boŋɛ butɔ, parawan banba ɲakɔtɔ. 27A ka sorayi saniyandeŋɛ kuɲɛ diyama bintan ɲɔ, iko Alatala ka a yamɔri ki min na.
28A ka parawan doe bakku hɔrɔma dingira dondula tɔ. 29A ka sarika bintandula sigi hɔrɔma dingira dondula tɔ, min mu bɛndula boŋɛ la, a ka sarika bintannɛŋɛ bɔɔ ɲɔ anun fangadanma, iko Alatala ka a yamɔri ki min na.
30A ka ji madɛnfeŋɛ sigi hɔrɔma dingira nun sarika bintandula tɛma, a ka je sa a butɔ sarika lakelanu saniyanfeŋɛ la. 31Musa nun Harona nun a la den kayireŋɛnu si to anu bolenu nun anu kɛŋɛnu lakola le wo je la. 32Anu tini be donna ɲɔ butɔ wagate min tɔ, ka wo ma anu be anu madonna sarika bintandula la, anu si anu ko le, iko Alatala ka Musa yamɔri ki min na.
33A ka hɔrɔma dingira nun sarika bintandula bɛ lamilin tatta la, a nata naa parawan bakku tatta dondula tɔ.
Awa, Musa ka wale ban ɲɔgɔnna le.
Alatala la nɔɔra
34Wo butɔ, luuture dusuta bɛndula boŋɛ kunma, Alatala la nɔɔra ka hɔrɔma dingira lafa, 35han Musa ma nɔ donna hɔrɔma dingira butɔ, bayi luuture be sigiren ɲɔ kunma, Alatala la nɔɔra tugun bata ɲɔ lafa.
36Luuture tini be bɔɔla hɔrɔma dingira kunma lun min na, bani Isirayila kaanu si bɔɔ le tagala kila kunma. 37Ka luuture ma bɔɔ hɔrɔma dingira kunma, bani Isirayila kaanu te bɔɔ anu sigi dula tɔ, fɔ luuture tini bɔɔ ɲɔ kunma lun min na. 38Awa, bani Isirayila kaanu la tagamaŋɛ bɛ tɔ, anu si Alatala la luuture yen hɔrɔma dingira kunma tele tɔ; sue tɔ, anu be ta bitareŋɛ le yenna a tɔ.
Currently Selected:
Hɔrɔya 40: MOG
Highlight
Share
Compare
Copy
Want to have your highlights saved across all your devices? Sign up or sign in
