Hɔrɔya 39

Sarika lakelanu la donfeŋɛnu

1Anu ka donfeŋɛ masubɛreŋɛnu kara tasɔgɔ kuta la, a bululama, a dubalamanɛŋɛ nun a wulenma, anu ni ma dula saniyandeŋɛ walifeŋɛnu la. Anu ka donfen saniyandeŋɛnu kara Harona tugun ye, iko Alatala ka Musa yamɔri ki min na nun. 2Anu ka doroki kunmanɛŋɛ bolobɔnɛ ɲiɲa le sanu gese la, anun gese bululama, a dubalamanɛŋɛ nun a wulenma la, anun tasɔgɔ kuta la. 3Anu ka sanu wunde tɔntɔn han a nɛnpɛtɛnta, anu naata a kuntu waaya la, anu ka wo masɔgɔ gese bululama, a dubalamanɛŋɛ nun a wulenma, anun tasɔgɔ kuta la. A mata bolo laɲɛɲilá la wali ɲinma le la. 4Anu ka kuta julu fila ɲiɲa doroke ye minnu kitita kɔma anun ɲatɔ a gabakunkuŋɛnu tɔ. 5Tɛtakitiraŋɛ yo, a kitita doroke min na yo, a bɛ ɲiɲata ɲɔgɔn fɛ fondo dɔndɔ le la, anu ɲiɲata sanu gese la, anun gese bululama, a dubalamanɛŋɛ nun a wulenma la, anun tasɔgɔ kuta la, iko Alatala ka Musa yamɔri ki min na. 6Anu ka kuru sɔn bɛlɛŋɛnu lawali, anu ka anu sa safeŋɛ sanunɛŋɛnu tɔ. Anu ka Yaguba la deŋɛnu tɔgɛnu sɛbɛ kurenu ma, iko manditɛ be sala kurunda ma ki min na. 7Anu ka anu kiti doroki kunmanɛŋɛ la kuta julenu la, anu ni ma mira latagafeŋɛ la Alatala ye bani Isirayila deŋɛnu la ko ma, iko Alatala ka Musa yamɔri ki min na.

Jusukun mabutinfeŋɛ ɲiɲa koe

8Anu ka jusukun mabutinfeŋɛ tugun ɲiɲa le, a mata bolo laɲɛɲilá ɲinma la wale le la. A ɲiɲata iko doroki kunmanɛŋɛ bolobɔnɛ: a sɔgɔta sanu gese la, anun gese bululama, a dubalamanɛŋɛ nun a wulenma la, anun tasɔgɛ kuta la. 9A lafontireŋɛ takatireŋɛ la yajɛ mata tunku naani le la, a sɔngɔ yo sɔngɔ nɔngɔn tɛma. 10Kuru sɔn bɛlɛŋɛ safa naani le be saren a ma. Kurenu minnu tota safa fɔlɛ tɔ, wonu tɔgɔ saradowani, topasi nun emerodu. 11Safa filaɲɔgɛ kurenu tɔgɛ esikaribukulu, safiru anun diyamɔn. 12Safa sabaɲɔgɛ kurenu tɔgɛ opale, agati nun ametisiti. 13Safa naaniɲɔgɛ kurenu tɔgɛ kirisoliti, oniki anun jasipe. Wo kurenu bɛ sata safen sanunɛŋɛ le tɔ dɔndɔ dɔndɔ. 14Yaguba la deŋɛnu tɔgɛnu le sata wo kurenu ma, anu kɔnte mata kuru tan nun fila le la, iko anu tɔgɛ kɔnte. Wo tɔgɛnu sɛbɛta le anu ma, iko manditɛ be ɲiɲala kurunda ma ki min na. Kuru dɔndɔ yo kuru dɔndɔ, bɔnsɔ dɔndɔ tɔgɛ.

15Anu ka sanuɛ yati jɔlɔnkɔn lanma fila le ɲiɲa wo jusukun mabutinfeŋɛ ye, anu ka minnu dɛbɛ. 16Anu ka safen fila anun kurunda fila ɲiɲa sanuɛ la; anu ka wo kurunda fila bakku jusukun mabutinfeŋɛ tunku fila kunmanɛŋɛ la. 17Anu ka wo sanu jɔlɔnkɔŋɛnu fila kiti wo kurunda filanu la. 18Anu ka wo jɔlɔnkɔn fila kiti safeŋɛnu tugun na minnu be doroki kunmanɛŋɛ gabakunkuŋɛnu tɔ, a ɲatɔ mafanna. 19Anu mɛn ka kurunda fila ɲiɲa le sanuɛ la, anu ka minnu sa jusukun mabutinfeŋɛ tunku fila kɔtɔnɛŋɛ la, minnu be magaren doroki kunmanɛŋɛ bolobɔnɛ la. 20Anu mɛn ka kurunda fila do tugun ɲiɲa sanuɛ la, anu ka anu kiti kuta julenu kɔtɔ la minnu be bɔɔla doroki kunmanɛŋɛ gabakunkuŋɛnu tɔ, tɛtakitiraŋɛ nun kuta julenu be labɛnna ka min na, a ɲatɔ mafanna. 21Jusukun mabutinfeŋɛ la kurundanu kitita wo kurundanu la, julu bululama la, alako jusukun mabutinfeŋɛ ni to tɛtakitiraŋɛ kunma, anu tɛma kana fatan, iko Alatala ka Musa yamɔri ki min na.

Sarika lakelanu la donfeŋɛ donu

22Anu mɛn ka doroki banba bolo wutuma ɲiɲa, anu ka a sɔgɔ gese bululama tun de la. 23A kun nadondula tota a tɛma le, a kaŋɛ be masɔgɔren iko bolo doroke dɛbɛreŋɛ kun nadondula, alako doroke kana naala farala. 24Anu ka gerenadi lɔgɔ wole misalenu ɲiɲa doroke dabole kɔtɔ la, a bululama, a dubalama nun a wulenma, anun tasɔgɔ kuta la. 25Anu ka taliŋɛnu ɲiɲa sanu yati la, anu ka anu bakku gerenadi wolenu tɛma, doroke dabole kɔtɔ lamiliŋɛ bɛ la: 26gerenadi wolo dɔndɔ yo dɔndɔ, sanu taliŋɛ dɔndɔ le bakkuta a kɛnna. Wo bɛ alako Harona ni nɔ a la sarika lake wale mala, iko Alatala ka Musa yamɔri ki min na.

27Anu ka tasɔgɛ kuta ɲiɲa doroki banba kɔtɔnɛŋɛnu la Harona nun a la den kayireŋɛnu ye, anu ka a sɔgɔ a ɲinma la. 28Harona la kuntarɛ nun a la den kayireŋɛnu la kufunɛnu ɲiɲata tasɔgɔ kuta la; anu ka kurute kɔtɔnɛŋɛnu tugun kara tasɔgɔ kuta la. 29Anu ka tɛtakitiraŋɛ ɲiɲa tasɔgɔ kuta la, min be masɔgɔren a bululama la, a dubalamanɛŋɛ anun a wulenma la, iko Alatala ka Musa yamɔri ki min na.

30Anu ka sanu yati le ɲiɲa wala saniyandeŋɛ lanma la, anu ka a sɛbɛ a ma, iko anu be sɛbɛre ɲiɲala kurunda ma ki min na: «A be saniyanden Alatala ye.» 31Anu ka jule bululama kiti a la, a ni kiti kufunɛ kunma a tindɛ tɔ, iko Alatala ka Musa yamɔri ki min na.

Hɔrɔma dingira dantɛgɛ koe Musa ye

32Hɔrɔma dingira wale labanta ɲɔgɔnna le, min mu bɛndula boŋɛ la. Alatala ka Musa yamɔri min bɛ la, bani Isirayila kaanu ka a bɛ ma le. 33Anu ka hɔrɔma dingira doni Musa dula:

a kunma mabutinfeŋɛnu nun a miraŋɛnu, a bakkuranu, a kebeŋɛnu, a la lɔgɔ kayanmanu, a la tuganu nun wonu sɔfeŋɛnu.

34Saaka kontoŋɛ bole ɲɛgɛndeŋɛ a wulenma la, foyi yɛgɛ bole, anun parawan banba.

35Seedeɲɔgɔya kankira nun a la lɔgɔ kayanmanu, sala a dataguraŋɛ kunma.

36Teebile, a la miraŋɛnu bɛ, anun dɛgɛnu minnu be Ala tabɛŋɛ tɔ.

37Sanuɛ yati lanpu sigifeŋɛ anun a lanpuenu, anun anu miraŋɛnu bɛ, anun tule min be sala anu butɔ.

38Sorayi saniyandeŋɛ bintandula sanunɛŋɛ, tulu saniyandeŋɛ min si mɔgɛ yita Ala la, anun fondo kuɲɛ diyama min be basanden sorayi fɛ min si bintan, parawan min be bakkula hɔrɔma dingira dondula la.

39Sarika bintandula nun a la tangalaŋɛ taasanɛŋɛ, a la lɔgɔ kayanmanu nun a la miraŋɛnu bɛ, ji madɛnfeŋɛ nun a sigifeŋɛ.

40Tatta la kutanu, a la tuganu nun a sɔfeŋɛnu, anun parawan min be bakkula tatta dondula tɔ, anun a la julenu, a la bakkurandeŋɛnu, anun a la miraŋɛnu bɛ minnu be lawalila hɔrɔma dingira, min mu bɛndula boŋɛ la.

41Donfen masubɛreŋɛnu dula saniyandeŋɛ wale ma koe la hɔrɔma dingira butɔ: Harona sarika lakelá la donfen saniyandeŋɛnu, anun a la den kayireŋɛnu tɛŋɛnu, alako anu ni nɔ sarika lake wale mala.

42Awa, bani Isirayila kaanu ka wo wale bɛ ma, iko Alatala ka Musa yamɔri ki min na. 43Musa ka wale bɛ fɛlɛ, a ka a yen a be maren de iko Alatala ka a yamɔri ki min na nun. Wo butɔ, Musa dubata bani Isirayila kaanu ye.

Currently Selected:

Hɔrɔya 39: MOG

Highlight

Compare

Copy