Hɔrɔya 38

Sarika bintandula nun saniyan je madɛnfeŋɛ la ko

1A ka sarika bintandula ɲiɲa kasiya lɔgɛ le la, a la yanya nɔngɔn loolu, a la yajɛ nɔngɔn loolu, tunku naani le mu a la. A la towe mu nɔngɔn saba le la. 2A ka binanu ɲiɲa a tunku naanɛ bɛ ye. Wo binanu nun sarika bintandula bɛ ɲiɲata ɲɔgɔn fɛ le. A naata taasa madon a ma. 3A ka sarika bɔɔ dula miraŋɛnu bɛ ɲiɲa minnu be tabɛnden panɛnu ma anun peelenu anun basi lasɔfeŋɛnu anun sube sɔgɔfeŋɛnu anun buguta safeŋɛnu. Wo miraŋɛ bɛ ɲiɲata taasa le la. 4A ka tangalaŋɛ ɲiɲa le sarika bintandula ye taasa la, a ni sigi a butɔ, a ni majigi han a tɛma. 5A mɛn ka kurunda naani ɲiɲa, anu ni patu tangalaŋɛ tunku naanɛ ma, lɔgɔ kayanmanu be donna minnu tɔ. 6A ka lɔgɔ kayanmanu malasɛ kasiya la, a ka taasa madon anu ma. 7A ka wo lɔgɔ kayanmanu ladon kurundanu tɔ, wo lɔgɛnu tota sarika bintandula sɔngɔ fila tɔ, a jiganfeŋɛ la. A ka sarika bintandula ɲiɲa kebeŋɛnu le la, fondo bele a butɔ.

8A ka ji madɛnfeŋɛ ɲiɲa taasa la, anun a sigifeŋɛ la. A ka wo taasa sɔtɔ musenu la ninimatoenu la minnu be wale mala bɛndula boŋɛ dondula tɔ.

Tatta ɲiɲa koe

9A ka tatta ɲiɲa. Tatta ɲiɲata tasɔgɔ kuta le la. Bolo ɲinma mafanna, a la yanya be tabɛnden nɔngɔn kɛmɛ ma. 10Wo kuta bakkuta tuga mugan de la, anun anu la sɔfeŋɛ mugaŋɛ, minnu be ɲiɲaren taasa la. Bakkurandeŋɛnu anun nɛgɛ kayanmanu ɲiɲata kaalise le la. 11Tasɔgɛ kuta be bolo mara mafanna tugun, a la yanya tugun be tabɛnden nɔngɔn kɛmɛ ma. Anu be bakkula tuga mugan minnu la, nun anu la sɔfeŋɛ mugaŋɛ wonu ɲiɲata taasa le la; bakkurandeŋɛnu anun nɛgɛ kayanmanu kan ɲiɲata kaalise le la. 12Tele jige mafanna, tasɔgɛ kuta nɔngɔn bi loolu le bakkuta tuga tan na, nun anu la sɔfeŋɛ taŋɛ; anu la bakkurandeŋɛnu anun nɛgɛ kayanmanu ɲiɲata kaalise le la. 13A tele yɛlɛ mafanna tugun, nɔngɔn bi loolu le mu. 14A dondula sɔngɔ dɔndɛ tɔ, tasɔgɛ kuta nɔngɔn tan nun loolu le bakkuta tuga saba la, anun anu la sɔfeŋɛ saba. 15A sɔngɛ doe tugun, tasɔgɛ kuta nɔngɔn tan nun loolu le bakkuta tuga saba la, anun anu la sɔfeŋɛ saba.

16Kuta min bɛ be maren hɔrɔma dingira tatta la, anu mu tasɔgɛ kuta le la. 17Tuganu la sɔfeŋɛnu ɲiɲata taasa le la, tuganu la bakkurandeŋɛnu nun anu la nɛgɛ kayanmanu ɲiɲata kaalise le la. Kaalise le madonta tuga kuŋɛnu ma. Tatta tuganu bɛ be bakkuren ɲɔgɔn na lɔgɔ kayanmanu le la, kaalise be madonden minnu ma.

18Parawan min be hɔrɔma dingira dondula tɔ, a mata kuta masɔgɔla la wale le la. A be masɔgɔren gese bululama la, a dubalamanɛŋɛ nun a wulenma la, tasɔgɔ kuta le mu a la. A la yanya nɔngɔn mugan, a la towe nɔngɔn loolu iko tatta la kuta mayɛlɛ. 19Tuga naanɛ nun anu sɔfeŋɛnu ɲiɲata taasa le la, anu la bakkurandeŋɛnu anun anu la nɛgɛ kayanmanu mu kaalise le la; kaalise le be madonden tuga kuŋɛnu tugun ma. 20Bakkuranu min bɛ be banbanna duge tɔ hɔrɔma dingira nun a la tatta lamiliŋɛ ma, anu bɛ ɲiɲata taasa le la.

Nɛgɛ min bere lawalita, a dantɛgɛ koe

21Nɛgɛ min bere lawalita hɔrɔma dingira sɔ koe la, a dantɛgɛ le mu ka. Seedeɲɔgɔya walanu be wo hɔrɔma dingira le butɔ. Musa ka yamɔre don Lewi bɔnsɛ bolo, anu ni wo dantɛgɛ sa. Sarika lakela Harona la deŋɛ Itamari le mu anu kuŋɛ la.

22Uri la den Besaleli, Huru mamareŋɛ, Juda bɔnsɛ ka yamɔre bɛ ma, Alatala ka min yita Musa la. 23A dɛmanná mata Ayisamaki la den Oholiyabi le la, Dan bɔnsɛ. Fondo malasɛla le mu a la, fondo ɲiɲala anun kuta masɔgɔla, min be gese lawalila, a bululama, a dubalamanɛŋɛ anun a wulenma nun tasɔgɔ kuta.

24Awa, sanuɛ min bere lawalita hɔrɔma dingira sɔ koe la, sanuɛ min sɔtɔta bolo makafue la, a tabɛnta kilo kɛmɛ sagin kilo bi wɔrɔwila anun wɔrɔwila anun giramu kɛmɛ saba le ma. A sumanta hɔrɔma dingira sumarifeŋɛ kɛɲa le ma.

25Kaalise min bere sɔtɔta jama kɔnti tɛmuɛ, wo tabɛnta kilo wulu saba kilo tan nun wɔrɔwila anun giramu kɛmɛ wɔrɔwila bi loolu le ma, a sumanta hɔrɔma dingira sumarifeŋɛ kɛɲa le ma. 26Wo jama kɔnti tɛmuɛ, kayi mɔgɔ wulu kɛmɛ wɔɔrɔ mɔgɔ wulu saba kɛmɛ loolu anun bi loolu be (603.550) minnu bata san mugan anun do sɔtɔ. Kayi yo kayi ka kaalise giramu loolu le dii, awa kaalise min sɔtɔta wolo tabɛnta kilo wulu saba kilo tan nun wɔrɔwila nun giramu kɛmɛ wɔrɔwila bi loolu ma. 27Wo kɔnte butɔ, anu ka kaalise kilo wulu saba lakunɛn sɔfeŋɛ kɛmɛ ɲiɲa koe la, hɔrɔma dingira sɔfeŋɛnu anun parawan banba la tuganu tɛŋɛ min be ɲɔ butɔ, sɔfen dɔndɔ kaalise kilo bi saba. 28Wo kaalise tɔɛ min tota, wolo do ɲiɲata bakkuranu la tuganu ye, do tugun madonta tuga kuŋɛnu ma, do tugun ɲiɲata nɛgɛ kayanmanu la parawan be bakkula minnu la.

29Taasa kɔnte le mu ka, min sɔtɔta bani Isirayila kaanu la bolo makafue la: kilo wulu fila kilo kɛmɛ kilo mugan nun naani. 30Anu ka a ɲiɲa hɔrɔma dingira dondula tuganu sɔfeŋɛnu la, anun sarika bintandula taasanɛŋɛ nun a la tangalaŋɛ taasanɛŋɛ nun a la miraŋɛ bɛ, 31anun tatta tuganu sɔfeŋɛnu anun tatta dondula tuganu sɔfeŋɛnu, sala hɔrɔma dingira nun tatta la bakkuranu la, minnu be banbanna duge tɔ.

Currently Selected:

Hɔrɔya 38: MOG

Highlight

Compare

Copy