Hɔrɔya 2

Annabi Musa la sɔtɛ

1Wo wagate, kaye do be ɲɔ, Lewi bɔnsɛ le mu a la, a ka Lewi bɔnsɛ la den musereŋɛ do jigan fute la. 2Ale muse nata bue jigan, a ka den kayireŋɛ sɔtɔ. A to ka a yen deŋɛ majabuta, a ka a dogon kari saba. 3Kɔnɔ a to te nɔ a dogonna bitugun, a ka kalin kankira jigan a ye, a ka dole nun kolitarɛ madon wo kankira ma, a ka bɔɔbɛ sa a butɔ, a nata a sigi je tɔ kaliŋɛnu tɛma Nili kɔɛɛ dala. 4Wo kɔma, bɔɔbɛ barenmuse naata sɔ kan sutuma tɔ, alako a ni a lɔn fen min be naala kela a dɔgɛ ma.

5Wo butɔ, Ala ka a ma, Misira mansa la den musereŋɛ jigita kɔɛɛ tɔ a kodula. A la jon musenu to be anu matagamanna kɔɛɛ dala, a ka kankira yen kaliŋɛnu tɛma kisanna. A ka a la walilá dɔndɔ kii a ni taga a nati. 6A to ka a nati, Misira mansa la den musereŋɛ ka a laka, a ka bɔɔbɛ yen, kaye le mu, a be dila. A kinikinita a ma, a ko: «Hebure kaanu la bɔɔbɛ le mu!» 7Bɔɔbɛ barenmuse ka a madon Misira mansa la den musereŋɛ la, a ka a fɔ a ye, a ko: «N ni taga konbira kele i ye ba Hebure musenu tɛma, alako a ni naa kɛ bɔɔbɛ lasusu i ye?» 8Misira mansa la den musereŋɛ ka a jaabi: «Awa, taga.»

Wo butɔ, bɔɔbɛ barenmuse tagata bɔɔbɛ nɛɛnɛ kele. 9Wo la nareŋɛ, Misira mansa la den musereŋɛ ko a ma: «Kɛ bɔɔbɛ jigan i ni taga a lasusu n ɲɛ, nde si i sɔŋɛ dii i la wale la.» Wo butɔ, muse ka bɔɔbɛ jigan, a tagata a fɛ, a ka a lasusu.

10Bɔɔbɛ la koloyareŋɛ, muse ka a nati Misira mansa la den musereŋɛ ye, wo ka a jigan a ka a ma a la deŋɛ la. A ka a tɔgɔ sa Musa, bayi a ko: «N ka a bɔɔ je tɔ le.»

Musa la bori koe Madiyana jamanɛ tɔ

11Lun do, Musa la kamarenyareŋɛ, a bɔɔta, a tagata a bareŋɛnu fɛlɛdula, a ka a yen wali bɛlɛŋɛ be sigila anu ma. A mɛn ka a yen a bareŋɛnu tɛma Misira kaa do be Hebure kaye botegela. 12Musa naata a lamiliŋɛ fɛlɛ a ma mɔgɔ yen. Wo butɔ, a ka Misira kaa faga, a tagata a fure mandi mɛɲɛŋɛ tɔ. 13Wo tabantaka a mɛn bɔɔta, a ka a taran kɔtɛ, Hebure kayi mɔgɔ fila be ɲɔgɔn botegela. A ka a fɔ kaye ye tɔɲa bele min bolo: «I be i bareŋɛ botegela fenna?» 14Kaye ka a jaabi, a ko: «Ɲɔmɔ le ɲan ka i sɔ mansa la mɔ makiiti koe la? Bɔ i be diren de i ni nde tugun faga iko i ka Misira kaa faga ki min na?» Musa to ka wo mɔɛ, a kilanta, a ko a yɛtɛ ma: «N bata laa a la kɛ koe bata lɔn.» 15Misira mansa la a mɔɛreŋɛ koe min be tanbiren, a ka Musa ɲini alako a ni a faga. Wo butɔ, Musa borita, a ni yanfaya Misira mansa la, a tagata Madiyana jamanɛ tɔ alako a ni to ɲɔ.

Lun do, a keta kɔlɔŋɛ do kɛnna ɲɔ, a sigita. 16Wo ka a taran, Madiyana sarika lakelá be ɲɔ min tɔgɔ Yetoro, den musereŋɛ mɔgɔ wɔrɔwila le be a bolo. Wonu nata ji soridula wo lun, anu ni kolofeŋɛnu la ji minfeŋɛnu lafa, alako ka je dii anu baaba la kolofeŋɛnu ma. 17Kɔnɔ kolofen kantalá donu nata, anu ka anu bee. Wo butɔ, Musa wulita a ka wo den musereŋɛnu dɛman, a naata na je dii anu la kolofeŋɛnu ma. 18Anu to saagita anu baaba Rehuyɛli#2:18 Yetoro tɔgɔ le Rehuyɛli tugun. bata, anu baaba ka anu maɲininka, a ko: «Wo be donden fenna bi jonna?» 19Anu ka a jaabi: «Misira kaa do ka mɔ latanga kolofen kantalanu ma, hali je yati ale len ka a sori mɔ ye, a mɛn ka a dii kolofeŋɛnu ma.» 20Anu baaba ka anu maɲininka, a ko: «Bɔ, ale kaye be mina le? Wo ka a to ɲɔ la fenna? Wo taga a kele, wo ni a nati alako a ni dɔmɛ dɔmɔ mɔ fɛ.»

21Musa la nareŋɛ, a sɔnta tola Yetoro bata. Yetoro naata na a la den musereŋɛ Sefura dii Musa ma, a ni a ma a la muse la. 22Wo ka den kayiren dɔndɔ sɔtɔ Musa ye. Musa ka a fɔ: «N to bata ma boribaga la luntan jamanɛ do tɔ, n be a tɔgɔ sala le ‹Gɛrɛsɔmu›#2:22 A fɔla Gɛrɛsɔmu luntaŋɛ le mu Hebure kuma tɔ..»

Ala la Musa masubɛ koe

23A la mɛreŋɛ kɔma, Misira mansa naata na faga. Wo bɛ bani Isirayila kaanu be kutunna jon wale la, anu mɛn be belebelela. Anu kulɛ yɛlɛta anu dɛman koe la jonya tɔ han a keta Ala ma. 24Ala ka anu kutun kulɛ mɔɛ, a ka a hakkile to a la lahire ma a ka min kiti a nun Iburahima nun Isiyaka nun Yaguba tɛma. 25Ala ka a ɲa sɔ bani Isirayila kaanu la, anu be ki min na. A ka a lɔn anu be lahala min na.

Currently Selected:

Hɔrɔya 2: MOG

Highlight

Compare

Copy