Hɔrɔya 3

1Musa tota a bitan kaye Yetoro la kolofeŋɛnu daɲinila min mu sarika lakela la Madiyana. Lun do, Musa ka kolofeŋɛnu doni janfue butɔ kan yanfa, a tagata han a keta Hɔrɛbi#3:1 Hɔrɛbi mɛn tɔgɔ Turisinina., Ala la kɔnkɛ tɔ. 2Alatala la maleka bɔɔta a ma ɲɔ le kisanna ta malaŋɛ tɔ bapɛ do tɛma. Musa ka a fɛlɛ, a ka a yen ta be bapɛ ma, kɔnɔ bapɛ kan bele bintanna. 3Musa ko: «N ni kila bɔɔ a ma yan tagala kɛ kabanako makilandeŋɛ fɛlɛdula. N ma a lɔn fen min be a maren kɛ bapɛ bele bintanna.» 4Alatala to ka a yen Musa be kila bɔɔla a ma tagala ɲɔ fɛlɛdula, wo butɔ a ka Musa kele bapɛ tɛma, a ko: «Musa! Musa!» Musa ko: «Naamu!» 5Ala ko Musa ma: «I kana i madon yan na. I la samatanu bɔɔ i kɛŋɛnu tɔ, bayi i be sɔren dula min tɔ, a mu dugu saniyandeŋɛ le la.» 6A mɛn ko: «Nde le mu i baaba la Ala la, anun Iburahima la Ala, anun Isiyaka la Ala anun Yaguba la Ala.»

Wo butɔ, Musa ka a ɲakɔtɔ dogon, bayi a kilanta a ɲa sɔla Ala la. 7Alatala mɛn ko: «N bata a yen yati anu be n na jama ɲagankatala ki min na Misira. N bata anu diri kulɛ mɔɛ, anu ɲagankatalanu sabu la. Iyon, n ka anu la tɔɔrɛ lɔn. 8Awa, n be jigiren anu lakisidula Misira kaanu bolo. N ni anu labɔɔ Misira duge tɔ n ni anu doni dugu ɲinma lawasareŋɛ do tɔ, nɔnɛ nun kumɛ te ban ka min na. Kanana kaanu, anun Hɛti kaanu, anun Amɔri kaanu, anun Feresi kaanu, anun Hiwi kaanu, anun Jebusi kaanu be sabatiren wo duge le tɔ ka. 9Kɔtɛ, bani Isirayila kaanu diri kulɛ bata yɛlɛ han a bata ke n ma. N mɛn bata a yen yati Misira kaanu be anu jihadila mɔɔle min na. 10Kɔtɛ n be i kiila Firauna ma, i ni taga n na jama bani Isirayila kaanu labɔɔ Misira.»

11Kɔnɔ Musa ko Ala ma: «Nde mɔgɔndeŋɛ, n si nɔ tagala ba Firauna bata n ni bani Isirayila kaanu labɔɔ Misira?» 12Ala ka a jaabi, a ko: «N be i fɛ. A lɔn koe la, ko nde le be i lasanbaren, a tɔnkuma le ka: i tini bani Isirayila kaanu labɔɔ Misira, wo si naa nde Ala batu kɛ kɔnkɛ tɔ.» 13Musa ka Ala maɲininka, a ko: «Kɔnɔ, n tini taga bani Isirayila kaanu taran, n tini a fɔ anu ye: ‹Wo benbanu la Ala le be n nasanbaren wo ma›, ka anu ka n maɲininka: ‹A tɔgɔ kama?›, wo butɔ, n si anu jaabi kama le?» 14Ala ka Musa jaabi kɛ kuma le la, a ko: «NDE LEN MU MIN BE SABATIREN. A fɛlɛ i si naa min fɔ bani Isirayila kaanu ye, i ko: MIN BE SABATIREN, wolo be n nasanbaren wo ma.» 15Ala mɛn ko Musa ma: «I si a fɔ bani Isirayila kaanu ye, i ko: ‹Alatala#3:15 A fɔla Alatala Hebure kuma tɔ, Yawɛ le. Yawɛ be a fɔren de «A be sabatiren»., wo benbanu la Ala, annabi Iburahima, anun Isiyaka, anun Yaguba la Ala le be n nasanbaren wo ma.› » Ala mɛn ko Musa ma: «N tɔgɛ le mu ka kudai. N be diren yɛlɛman yo yɛlɛman wo ni n talɔn ɲɔgɔnna le. 16Taga bani Isirayila kuntigenu madɛn, i ni a fɔ anu ye, i ko: ‹Alatala, wo benbanu la Ala, anun Iburahima, anun Isiyaka, anun Yaguba la Ala bɔɔta n ma. A ko, aa a si naa hinnɛ wo la, aa a bata a yen anu be min mala wo la Misira. 17Kɔtɛ a bata a fɔ: aa a si wo labɔɔ jihade tɔ wo be min tɔ ka Misira. Aa a ni wo doni Kanana kaanu, anun Hɛti kaanu, anun Amɔri kaanu, anun Feresi kaanu, anun Hiwi kaanu, anun Jebusi kaanu la jamanɛ tɔ. Nɔnɛ anun kumɛ te ban wo jamanɛ tɔ.› 18Awa, bani Isirayila kaanu si i kulɛ mɔɛ le. Wo kɔma, ile nun bani Isirayila kuntigenu si taga Misira mansa bata, wo ni a madiya, wo ko: ‹Alatala, Heburenu la Ala, a bata a yɛtɛ labɔɔ mɔ ma. Kɔtɛ, i ni a to yandi, mɔ ni taga tele saba tagamaŋɛ ma janfue butɔ, alako mɔ ni sarika bɔɔ Alatala ye, mɔ la Ala.› » 19Ala mɛn ko Musa ma: «N ka a lɔn yati Firauna te naa wo boloka fɔ ka min sɛnbɛ fisa a sɛnbɛ ko. 20N si n bole sɛnbɛ yita Firauna la jamanɛ la, n ni a botege jihade mɔɔle bɛ la. Wo kɔma, a si wo boloka wo ni taga. 21N si dɛmare ma le yati bani Isirayila jama ye, Misira kaanu ni hinnɛ anu la. Wo butɔ, wo be tagala lun min na wo te taga wo bolo tɛsɛŋɛ la. 22Wo lun, bani Isirayila kaa musu yo musu si a sigiɲɔgɛ Misira musenu táran, minnu be sabatiren ɲɔ. Anu si Misira musenu táran fondonu la iko kaalise, iko sanuɛ anun donfeŋɛnu, wo si naa min najigi wo la den kayireŋɛnu, anun wo la den musereŋɛnu ma. Wo si wo bosi Misira kaanu bolo ɲɔgɔn na.»

Currently Selected:

Hɔrɔya 3: MOG

Highlight

Compare

Copy