Hɔrɔya 1
1
Bani Isirayila kaanu la tɔɔrɛ
1Isirayila, min tɔgɔ Yaguba, a la deŋɛnu tɔgɛnu le mu ka minnu tagata Misira, anun anu baaba Yaguba, bɛ nun a la denbaya: 2Rubɛn, Simeyɔn, Lewi, Juda, 3Isakari, Sabulɔn, Bunyamin, 4Dan, Nafutali, Gadi anun Aseri. 5Yaguba juruya kɔnte be tabɛnden mɔgɔ bi wɔrɔwila le ma. Wo ka a taran Yusufu be Misira nun. 6Yusufu naata na faga, ale nun a baabadɔndɛnu bɛ, sa ale nun a filaɲɔgɛnu la. 7Kɔnɔ wo bɛ butɔ, bani Isirayila kaanu mata le den sɔtɔlanu la, anu jiidita, anu naata siya anu ka sɛnbɛ sɔtɔ han anu ɲan ka duge lafa.
8Wo kɔma, mansa nama do naata na sɔ Misira jamanɛ tɔ min ma Yusufu la ko lɔn. 9A ka a fɔ a la jama ye: «Wo ka a yen bani Isirayila jama bata siya han, anu mɛn bata sɛnbɛ sɔtɔ mɔ ko. 10Fɔ wo mɔ ni hakkili ɲinma ɲini anu la ko la alako anu kana siya. Bayi ka kɛlɛ wulita, anu si naa kafu le mɔ jaguenu ma anu ni mɔ kɛlɛ. Wo kɔma, anu ni bɔɔ duge tɔ.» 11Awa, anu nata kuŋɛnu sɔ bani Isirayila jama kunma anu tɔɔrɔ koe wali bɛlɛŋɛ la. Wo butɔ, bani Isirayila kaanu ka saanu labɔɔ dɔmɔ mandidula la Misira mansa ye, ka minnu tɔgɔ Pitɔmu anun Ramisɛsi. 12Kɔnɔ wali bɛlɛŋɛ be sɔla bani Isirayila kaanu ma ki min na, anu be siyala ɲɔgɔnna le, anu mɛn be mafatanna duge kunma ɲɔgɔnna le. Wo butɔ, Misira kaanu kilanta anu la, anu ka anu kɔn. 13Misira kaanu ka bani Isirayila kaanu ma joŋɛ la a bɛlɛma la. 14Wo butɔ, anu ka dunuya labɛlɛya bani Isirayila kaanu ma wali bɛlɛŋɛ la: anu ni bangue ɲiɲa birike la, ka sɛnɛ wale mɔɔle bɛ ma. Fayida, Misira kaanu ka jonya wale mɔɔle bɛ don bani Isirayila kaanu bolo a bɛlɛma la.
Misira mansa la yamɔre
15Hebure kaanu#1:15 Bani Isirayila kaanu tɔgɛ do le mu Hebure kaanu la. la den nabitala musu fila be ɲɔ, dɔndɛ tɔgɔ Sifura, doe tɔgɔ Puwa. Lun do, Misira mansa ka anu kele, a ko anu ma: 16«Ka wo be Hebure musenu dɛmanna den sɔtɔdula, wo ni deŋɛ fɛlɛ koola, ka kaye le mu wo ni a faga, ka muse le wo ni a to a ni balu.» 17Kɔnɔ den nabitala musenu be kilanden Ala la. Anu ma sɔn Misira mansa la yamɔre labatula; anu ka kayenu to ɲɔ, anu ma anu faga. 18Wo kɔma, Misira mansa ka anu kele, a ko anu ma: «Wo ka kayenu to fenna anu baluta? Wo ka wo ma fenna?» 19Den nabitala musenu ka Misira mansa jaabi, anu ko: «I ni diɲa, bayi Hebure musenu bele toren iko Misira musenu. Sɛnbɛ be Hebure musenu la. Yannun den nabitala muse ni ke anu ma, wo si a taran anu bata deŋɛ sɔtɔ.»
20Wo butɔ, Ala ka a la ko ɲinma lakoti wo den nabitala musenu ye. Bani Isirayila jama nata siya anu ka sɛnbɛ sɔtɔ han. 21Den nabitala musenu to kilanta Ala la, Ala tugun ka anu kɔ deŋɛnu la. 22Wo butɔ, Misira mansa ka kɛ yamɔre don a la jama bɛ bolo, a ko: «Hebure den kayireŋɛ min bɛ be sɔtɔla, wo ni a bɛ lafili Nili je tɔ, kɔnɔ wo ni musenu kan to anu ni balu.»
Currently Selected:
Hɔrɔya 1: MOG
Highlight
Share
Compare
Copy
Want to have your highlights saved across all your devices? Sign up or sign in
