Hɔrɔya 16
16
Ala la dɔmɔ lasanba koe a la jama ma
1Anu la bɔɛ Misira duge tɔ, wo kari filaɲɔgɛ tele tan nun loolu luŋɛ, bani Isirayila jama bɛ bɔɔta Elimi, taga koe la Siini janfue tɔ, ka min be Elimi nun Turisinina kɔnkɛ tɛma. 2Wo butɔ, bani Isirayila jama bɛ tota kuma mɛsɛŋɛ mafɔla Musa nun Harona ma janfue tɔ. 3Anu ka a fɔ anu ye: «Fen de Alatala ma mɔ faga nun Misira duge tɔ, mɔ be sigiren nun mɔ la subu daganu kɛnna ka min na? Kaa mɔ te dɛgɛ dɔmɔ le ɲɔ han mɔ ni fa? Wo be mɔ natiren de kɛ janfue tɔ alako wo ni kɛ jama bɛ faga kɔnkɛ la.»
4Alatala ka a fɔ Musa ye, a ko: «I tolomasɔ, n be naala dɛgɛ layɛlɛnna le wo ye bɔɔla saŋɛ tɔ iko sange. Lun go lun, jama ni bɔɔ anu be min bere dɔmɔla anu ni wo matɔnbɔn. Wo butɔ, n si naa anu hakkile mafɛlɛ, ka anu be tagamanna n na sariya yati le la. 5A tele wɔɔrɔ luŋɛ yo tele wɔɔrɔ luŋɛ, anu be min matɔnbɔnna iko anu darita min matɔnbɔnna, anu tini wo ɲiɲa, wo yan kan be mala tele fila dɔmɛ le la.»
6Wo butɔ, Musa nun Harona ka a fɔ bani Isirayila kaanu bɛ ye, anu ko: «Bi wura la wo si a lɔn de ka a fɔla Alatala le ka wo labɔɔ Misira duge tɔ. 7Sinan saguma wo si naa Alatala la nɔɔra yen de, bayi a bata wo la kuma mɛsɛŋɛ mɔɛ ale mafanna. Mɔle ɲan mu fen na? Wo bele kuma mɛsɛŋɛ kitiren mɔle len na de.» 8Musa ka a fɔ, a ko: «Alatala si sube dii le wo ma bi wura la wo si min dɔmɔ. Saguma tugun a ni dɛgɛ dii wo ma min si wo fa. Wo be kuma mɛsɛŋɛnu minnu mafɔla a ma, a bata anu mɔɛ. Fenfen ma mɔle la. Wo bele a fɔla mɔle le ma de, wo be a fɔla Alatala le ma.»
9Wo kɔma, Musa ka a fɔ Harona ye, a ko: «A fɔ bani Isirayila jama bɛ ye, anu ni na anu madon Alatala la, bayi a bata anu la kuma mɛsɛŋɛnu mɔɛ.» 10Harona be kumala wagate min tɔ bani Isirayila jama bɛ ye, anu ka anu ɲamatelen janfue ma, Alatala la nɔɔra bɔɔta luuture tɔ kisanna. 11Alatala ka a fɔ Musa ye, a ko: 12«N bata bani Isirayila kaanu kulɛ mɔɛ, anu be kuma mɛsɛŋɛ min fɔla n ma. Kuma anu ye, i ko: ‹Fitiri ma, wo be sube le dɔmɔla. Saguma wo ni fa dɛgɛ la. Wo tɛmuɛ le, wo si a lɔn, nde Alatala mu wo la Ala le la.› »
13Awa, wo wura la le, kɔnkɔlɛ kurun banba nata jigi, anu ka daaka bɛ mabutin; saguma tugun, konbe naata na sa anu la daaka lamiliŋɛ bɛ tɔ. 14Wo konbe to bɔɔta ɲɔ, wo tɛmuɛ le, fondo kolo lanmanu ka janfue kunma mabutin iko sangi kole. 15Bani Isirayila kaanu to ka a yen, anu ka ɲɔgɔn maɲininka: «Ee, fen de mu ka?», bayi anu ma a lɔn fenfen min mu a la. Musa ka a fɔ anu ye: «Dɛgɛ le mu, Alatala be min diiren wo mɔ ma dɔmɔnɛŋɛ la. 16Alatala la yamɔre le ka, a ko: ‹Bɛ ni a la dɔmɛ bere matɔnbɔn min si bɛn a nun a la denbayanu ye, mɔgɔ dɔndɔ sumarifen dɔndɔ. Bɛ ni a matɔnbɔn a la mɔgɛnu ye min bere be a la tantaa kɔtɔ.› » 17Bani Isirayila kaanu ka a ma ɲɔgɔnna le. Donu ka a siyama matɔnbɔn, donu ka donden matɔnbɔn.
18Wo kɔma, anu ka wo bere suman sumarifeŋɛ tɔ: minnu tɛŋɛ siyata, a ma tanbi a tɔ, minnu tugun tɛŋɛ be dɔgɔyaren, wonu tugun tɛŋɛ ka anu tabɔɔ. Bɛ ka a la dɔmɛ bere matɔnbɔn.
19Musa ka a fɔ anu ye, a ko: «Mɔgɔ yo kana a tɔɛ to han saguma.» 20Kɔnɔ donu ma Musa kulɛ bita, anu ka do mandi han saguma. Tunbenu donta a tɔ, a kuɲɛ bɔɔta. Wo butɔ, Musa dumɛnta wo mɔgɛnu ma.
21Kabɔɔ wo lun de, saguma yo saguma, bɛ be a la dɔmɛ bere le matɔnbɔnna. Tele tini bandi, a tɔɛ min be tola duge tɔ a ni kunɛn. 22A tele wɔɔrɔ luŋɛ, anu ka anu la dɔmɛ sigi fila matɔnbɔn, tele fila kɔnte mɔgɔ dɔndɔ sumarifeŋɛ ɲa fila. Jama la ɲatɔnkanu bɛ tagata wo fɔ Musa ye. 23Musa ka a fɔ anu ye, a ko: «Alatala ka wolo fɔ, a ko sinan mu sulen lɔ́gɛ́ le la, lɔgɔ masubɛreŋɛ le mu Alatala ye. Wo be diren min bintanna, wo a bintan; wo be diren min barabarala, wo a taba. A tɔɛ min tini to, wo ni wo mandi han sinan saguma.» 24Anu ka wonu to han saguma, iko Musa ka anu yamɔri ki min na. Kɔnɔ tunbu yo ma don wo yan tɔ, a mɛn kuɲɛ ma bɔɔ. 25Musa ka a fɔ anu ye, a ko: «Wo ni a dɔmɔ bi, bayi bi lɔ́gɛ́ mu sulen lɔ́gɛ́ le la Alatala la biliya kɔtɔ. Wo te fenfen yen bi daaka kɔma. 26Wo be a matɔnbɔnna le tele wɔɔrɔ, kɔnɔ a tele wɔrɔwila luŋɛ mu sulen lɔ́gɛ́ le la, fenfen te yen wo lun.»
27Mɔgɛnu donu nɔn bɔɔta le a matɔnbɔndula wo tele wɔrɔwila luŋɛ, kɔnɔ anu ma fenfen yen. 28Wo butɔ, Alatala ka a fɔ Musa ye, a ko: «Wo ɲan be balanna n na yamɔre nun n na sariya makantala han tɛmu miniman? 29Wo ni a lɔn, nde Alatala le be sulen lɔ́gɛ́ diiren wo ma. Wolo be a maren, tele wɔɔrɔ luŋɛ, tele fila dɔmɛ kɔnte be diiren wo ma. Bɛ ni to a be ka min na, mɔgɔ yo kana bɔɔ a la dula tɔ a tele wɔrɔwila luŋɛ.»
30Wo butɔ, jama ka a sulen a tele wɔrɔwila luŋɛ.
31Bani Isirayila kaanu ka kɛ dɔmɛ tɔgɔ sa «Mana». A be mulunyaren fondi kole la, a beema, a mɛn di tugun iko lɛɛki kumunɛŋɛ. 32Musa ka a fɔ jama ye, a ko: «Alatala la yamɔre le ka, a ko: ‹Mana sumarifen dɔndɔ a fareŋɛ ni mandi wo bɔnsɛnu ye, minnu be naala sɔtɔla, alako anu ni kɛ dɛgɛ yen n ka wo daɲini min na janfue tɔ, n to ka wo labɔɔ Misira duge tɔ.› » 33Wo kɔma, Musa ka a fɔ Harona ye, a ko: «Dunbe dɔndɔ jigan, i ni a lafa Mana sumarifen dɔndɔ la, i ni a sigi Alatala ɲala, alako a ni mandi wo bɔnsɛnu ye minnu be naala sɔtɔla.» 34Harona to ka dunbe lafa, a ka a sigi seedeɲɔgɔya kankira ɲakɔtɔ, alako a ni mandi, iko Alatala ka Musa yamɔri ki min na.
35Bani Isirayila kaanu tota Mana dɔmɔla le san bi naani, han anu tagata ke duge do tɔ mɔgɛnu be sabatiren ka min na. Anu tota a dɔmɔla han anu keta Kanana duge naaniŋɛ tɔ.
36Sumarifeŋɛ min be lawalila, wo tɔgɔ le gomɛri; gomɛri ɲa tan be tabɛnden sumarifen banba dɔndɔ le ma, wo tɔgɔ le efa.
Currently Selected:
Hɔrɔya 16: MOG
Highlight
Share
Compare
Copy
Want to have your highlights saved across all your devices? Sign up or sign in
